قىزىلوردا وبلىسىندا وقۋشىلار مەن ۇستازدارعا مەكتەپتە سمارتفون ۇستاۋعا تىيىم سالىندى، دەپ حابارلايدى Qamshy.kz BNews.kz - كە سىلتەمە جاساپ.

«رەسپۋبليكا بويىنشا تەك قىزىلوردا وبلىسىندا العاش رەت بارلىق 299 مەكتەپتىڭ جارعىسىنا وزگەرىستەر ەنگىزىلدى. وعان سايكەس، وقۋ مەكەمەلەرىنىڭ اۋماعىندا ينتەرنەتكە كىرۋ مۇمكىندىگىنە يە سمارتفونداردى پايدالانۋعا تىيىم سالىنادى. قوڭىراۋ شالۋ مەن سمس فۋنكسياسى بار قاراپايىم تەلەفونداردى ۇستاۋعا رۇقسات»، - دەپ ءتۇسىندىردى وبلىس پروكۋراتۋراسىنىڭ باسپا ءسوز حاتشىسى بوتاكوز سەيىل.

زاماناۋي گادجەتتەرگە قاتىستى مۇنداي قاتاڭ شارانىڭ نە ءۇشىن قاجەت بولعانىن وبلىس پروكۋرورى حاليدۋللا داۋەشوۆ ءتۇسىندىرىپ بەردى.

«باستى سەبەپ – سمارتفونداردىڭ وقۋ پروسەسىنە تەرىس ىقپال ەتەتىنى. بالالار كەز كەلگەن ۋاقىتتا ينتەرنەتكە كىرىپ، رۋحاني دامۋعا، مىنەز-قۇلىققا تەرىس ىقپالىن تيگىزەتىن دۇنيەلەردى وقيدى، كورەدى»،- دەيدى ول.

پروكۋراتۋرا «ۆكونتاكتە» الەۋمەتتىك جەلىسىنە كەزەكتى رەت مونيتورينگ جۇرگىزىپ، 106 قىزىلوردالىق جەتكىنشەكتىڭ سۋيسيدكە ۇگىتتەيتىن توپتارعا تىركەلگەنىن انىقتاعان. سونداي-اق، قىزىلورداداعى 26 مەكتەپتىڭ وقۋشىلارى وزىنە قول جۇمساۋعا يتەرمەلەيتىن 13 توپقا تىركەلگەن.

«ونىڭ ۇستىنە مەكتەپ قابىرعاسىندا قىمبات گادجەتتەر ءجيى ۇرلانىپ جاتادى. تىيىم سالۋداعى ماقساتىمىزدىڭ ءبىرى – بالالار اراسىندا قىلمىستىڭ بەلەڭ الۋىنا جول بەرمەۋ. تەك وقۋشىلارعا عانا ەمەس، مۇعالىمدەرگە دە سمارتفون ۇستاۋعا تىيىم سالىنادى»، - دەپ تولىقتىردى داۋەشوۆ.