حالىقارالىق Stratfor ساراپتاما اگەنتتىگىنىڭ ماماندارى رەسەيدەگى بىلىكتى مامانداردىڭ، ءىرى جاڭالىقتار اشقان كورنەكتى عالىمداردىڭ شەت ەلگە كوپتەپ كەتكەنى تۋرالى زەرتتەۋ قورىتىندىسىن جاريالادى، - دەپ حابارلايدى Qamshy.kz.  

تەك 2015 جىلدىڭ وزىندە رسەيدەن 350 مىڭ ادام شەت ەلگە ءبىرجولاتا قونىس اۋدارىپتى. ال 2009 جىلعى ەكونوميكالىق داعدارىس كەزىندە بوتەن ەلگە كەتكەندەردىڭ سانى 32 مىڭنان اسپاعان ەكەن.

ساراپشىلار رەسەيدىڭ مىقتى دەگەن دارىگەر، ينجەنەر، عالىم، ۇستازدارىنىڭ باسقا جاققا لەك-لەگىمەن كەتىپ جاتقانىنا الاڭداۋلى. 2014 جىلعى دەنساۋلىق ساقتاۋ رەفورماسى ماسكەۋلىك 7 مىڭعا جۋىق دارىگەردى جۇمىسسىز قالدىرعان. قىزمەتىنەن ايرىلعانداردىڭ باسىم بولىگى اقش، گەرمانيا، كانادا، فينليانديا سياقتى مەملەكەتتەردەن ورىن تاپقان.

Stratfor-دىڭ بايانداماسى بويىنشا، جوعارى ءبىلىمى بار رەسەي ازاماتتارىنىڭ 23 پايىزى بوتەن ەلگە كەتكىسى كەلەدى ەكەن. ال جاستاردىڭ 38 پايىزى، توپ-مەنەدجەرلەردىڭ 42 پايىزى باسقا مەملەكەتتە جۇمىس ىستەۋگە نيەتتى. ولاردىڭ ورنىنا بۇرىنعى كەڭەستىك رەسپۋبليكالاردان شىققان مۇسىلماندار رەسەيگە اعىلىپ كەلۋدە.

ساراپشىلار رەسەيگە جاقىن جىلدارى عىلىم مەن ءبىلىم جۇيەسىنىڭ قۇلدىراۋ ءقاۋىپ بارىن ەسكەرتۋدە. Bloomberg ساراپشىسى لەونيد بەرشيدسكييدىڭ سوزىنە سەنسەك، 2015 جىلى رەسەيگە تمد مەملەكەتتەرىنەن 500 مىڭنان استام ادام جۇمىس ىزدەپ بارعان. ولاردىڭ باسىم بولىگى ورتا ازيا رەسپۋبليكالارى، مولدوۆا مەن ءازىربايجان سياقتى ەلدەردىڭ وكىلدەرى.

 رەسەيگە بارعان ورتا ازيا وكىلدەرىنىڭ دەنى زاۋىت-فابريكالاردا، ساۋدا-ساتتىق ورىندارىندا جانە قارا بازاردا جۇمىس تاپقاندىعى بەلگىلى.  

ال، قازاقستان سوڭعى 20 جىلدا قانشا عالىمىنان ايرىلدى؟ نەشە ءجۇز نەمەسە مىڭ بىلىكتى مامان ەلىن تاستاپ، كاپيتاليستىك مەملەكەتتەرگە ءبىرجولاتا كوشىپ كەتتى؟ وسىنى زەرتتەگەن مامان بار ما؟

دانا قامشىبەك