مەملەكەت باسشىسىنىڭ جارلىعىمەن يمانعالي تاسماعامبەتوۆ ق ر پرەمەر-مينيسترىنىڭ ورىنباسارى بولىپ تاعايىندالعان بولاتىن. ەلباسى قورعانىس مينيسترلىگى ۇجىمىمەن كەزدەسۋدە وسى تاعايىنداۋعا قاتىستى ويىن ءبىلدىردى، - دەپ حابارلايدى Qamshy.kz.
كەزدەسۋ بارىسىندا نۇرسۇلتان نازاربايەۆ ساكەن جاسۇزاقوۆتىڭ قورعانىس ءمينيسترى لاۋازىمىنا تاعايىندالعانى تۋرالى ايتىپ، قازىرگى سىن-قاتەرلەردىڭ الدىن الۋ جانە ونى جويۋ ىسىندەگى اسكەردىڭ ايرىقشا ءرولىن اتاپ ءوتتى.
– كەلەسى جىلى قازاقستان قارۋلى كۇشتەرىنىڭ قۇرىلعانىنا 25 جىل تولادى، بۇل ەلىمىزدىڭ تاريحىنداعى ماڭىزدى بەلەس بولىپ سانالادى. اسكەر – ەگەمەندىكتىڭ باستى كەپىلى. وڭىردە جانە الەمدە قالىپتاسقان قازىرگىدەي كۇردەلى كەزەڭدە قارۋلى كۇشتەردىڭ ءرولى ارتىپ كەلەدى. حالىقارالىق تەرروريزمنىڭ قاۋىپ-قاتەرلەرى، گيبريدتى سوعىستار، بەلەڭ الىپ كەلە جاتقان قارۋلانۋ باسەكەسى ۇلتتىق قاۋىپسىزدىك ماسەلەلەرىنە باسا كوڭىل بولۋگە ماجبۇرلەپ وتىر، – دەدى قازاقستان پرەزيدەنتى.
ەلباسى ايرىقشا نازار اۋدارۋدى قاجەت ەتەتىن ءبىرقاتار باسىم باعىتتى اتاپ ءوتتى.
«اسكەري ءتارتىپتى جەتىلدىرۋ، اسكەري قىزمەتشىلەردى الەۋمەتتىك قامسىزداندىرۋ جانە قازاقستان اسكەرىنىڭ جاۋىنگەرلىك دايارلىعىن جوعارى دەڭگەيدە ۇستاۋ جونىندەگى جۇمىستاردى جالعاستىرۋ قاجەت. قارۋلى كۇشتەردى زاماناۋي قارۋ-جاراقپەن جانە تەحنيكامەن جاراقتاندىرا وتىرىپ، اسكەري دايىندىق ماسەلەلەرىن ودان دا ساپالى دەڭگەيگە جەتكىزۋ كەرەك. ول ءۇشىن بارلىق قاجەتتى قاراجات بولىنەتىن بولادى. ءبىز ءوزىمىزدىڭ دامىعان اسكەري-تەحنيكالىق ونەركاسىبىمىزدى قالىپتاستىرۋعا ءتيىسپىز. وسىعان بايلانىستى، ءتيىستى قۇرىلىمدى ارنايى كورپوراسياعا نەمەسە اسكەري-ونەركاسىپتىك كەشەن جونىندەگى مينيسترلىككە اينالدىرۋ ماسەلەسى قاراستىرىلاتىن بولادى»، – دەدى مەملەكەت باسشىسى.
نۇرسۇلتان نازاربايەۆ تاعى ءبىر ماڭىزدى ماسەلە اسكەري قىزمەتشىلەردىڭ جاڭا بۋىنىن قالىپتاستىرۋ ەكەنىن ايتتى.
«سول ءۇشىن ءتيىستى وقۋ ورىندارى، ۋنيۆەرسيتەتتەر اشىلدى. ەندى اسكەري قىزمەتشىلەردى دايارلاۋ ساپاسىن ارتتىرۋمەن اينالىسۋ كەرەك، – دەدى قازاقستان پرەزيدەنتى.
جاڭا قورعانىس ءمينيسترى س.جاسۇزاقوۆتى تانىستىرعان مەملەكەت باسشىسى ونىڭ مول تاجىريبەسى مەن كاسىبي ماشىعى بار ەكەنىن اتاپ ءوتتى.
سونداي-اق نۇرسۇلتان نازاربايەۆ ي.تاسماعامبەتوۆكە اتقارعان جۇمىسى ءۇشىن ريزاشىلىق ءبىلدىرىپ، ەلدىڭ پرەمەر-مينيسترىنىڭ ورىنباسارى لاۋازىمىنا تاعايىندالۋىمەن قۇتتىقتادى.
«يمانعالي نۇرعالي ۇلى تاسماعامبەتوۆ مەنىڭ ايتقان تاپسىرمالارىمدى جاقسى ورىندادى. مەنىڭ جارلىعىم بويىنشا پرەمەر-مينيستردىڭ ورىنباسارى قىزمەتىنە كەلدى. ول وسى قىزمەتتە دە ءادىل بولاتىنىنا جانە بەرىلگەن تاپسىرمالاردى تولىقتاي ورىندايتىنىنا سەنەمىن. يمانعالي تاسماعامبەتوۆقا مينيسترلىكتە اتقارعان جۇمىسى ءۇشىن العىس ايتامىن، تەك ساتتىلىك تىلەيمىن»، - دەدى نۇرسۇلتان نازاربايەۆ.
سوڭىندا قازاقستان پرەزيدەنتى قاتىسۋشىلارعا ەلدىڭ قورعانىس قابىلەتىن نىعايتۋ، قازاقستان ارمياسىنىڭ جاۋىنگەرلىك دايارلىعىن ارتتىرۋ ىسىندە تابىس تىلەدى.
