التى جىل بويى «قازتاگ» حالىقارالىق اقپارات اگەنتتىگى مەملەكەتتىك اقپاراتتىق ساياساتتى ىسكە اسىرۋ بويىنشا لوتتاردى زاڭسىز الىپ كەلگەن،- دەپ مالىمدەدى «ماتايەۆتار ءىسى» بويىنشا سوت وتىرىسىندا كۋاگەر شىڭعىس ەسجانوۆ. قارجى مينيسترلىگىنىڭ قارجىلىق باقىلاۋ كوميتەتىنىڭ مامانى ش. ەسجانوۆ سوتقا بەرگەن جاۋابىندا بايلانىس، اقپاراتتاندىرۋ جانە اقپارات كوميتەتى مەن «قازتاگ» حالىقارالىق اقپارات اگەنتتىگىنىڭ اراسىنداعى شارتتار زاڭسىز جاسالعانى تۋرالى اڭگىمەلەدى. 

«2010 جىلى مەملەكەتتىك اقپاراتتىق ساياساتتى بۇقارالىق اقپارات قۇرالدارى ارقىلى ىسكە اسىرۋ جونىندە مەملەكەتتىك ساتىپ الۋدى وتكىزۋگە كونكۋرس جاريالاندى. كونكۋرستىڭ ناتيجەسىندە كەيبىر لوتتار بويىنشا ول وتكىزىلمەگەن بولىپ ەسەپتەلدى. ويتكەنى اتالعان لوتتار بويىنشا كونكۋرسقا قاتىسۋعا ەشكىم جىبەرىلگەن جوق. ودان كەيىن ۇيىمداستىرۋشىلار كونكۋرسقا مۇلدەم قاتىسپاعان «قازتاگ» حالىقارالىق اقپارات اگەنتتىگى» جشس-مەن «ءبىر كوزدەن» قارجىلاندىرۋ تاسىلىمەن كونكۋرس وتكىزۋگە زاڭسىز شەشىم قابىلدايدى. وسىلايشا «قازتاگ»-پەن زاڭسىز شارت جاسالادى»،- دەدى كۋاگەر سوتتاعى سوزىندە. 

شىڭعىس ەسجانوۆ 2011 جىلى دا وسىعان ۇقساس جاعداي قايتالانعانىن ايتتى. «2011 جىلى مەملەكەتتىك اقپاراتتىق ساياساتتى بۇقارالىق اقپارات قۇرالدارى ارقىلى ىسكە اسىرۋ جونىندە مەملەكەتتىك ساتىپ الۋدى وتكىزۋگە كونكۋرس جاريالاندى. ول كونكۋرس تا وتكىزىلمەگەن بولىپ سانالدى. ودان ارىدە مەملەكەتتىك ساتىپ الۋدى «ءبىر كوزدەن» قارجىلاندىرۋ تۋرالى شەشىم قابىلدانادى. ءسويتىپ تاعى دا «قازتاگ» حالىقارالىق اقپارات اگەنتتىگىنە كونكۋرسقا قاتىسۋعا شاقىرۋ جىبەرىلەدى»،- دەپ اڭگىمەلەدى كۋاگەر. ونىڭ ايتۋىنشا، تەندەرلەردى زاڭسىز ءبولۋ 2015 جىلعا دەيىن قايتالانىپ وتىرعان. وندا دا ارتىقشىلىق تەك «قازتاگ»-قا عانا بەرىلىپ كەلگەن. 

بۇعان دەيىن سوتتا سويلەگەن كۋاگەرلەر سەيىتقازى ماتايەۆتىڭ يەلىگىندەگى «قازتاگ» حالىقارالىق اقپارات اگەنتتىگىنىڭ شارتتا كورسەتىلگەن تالاپتاردى ورىنداماعانىن حابارلادى. ماسەلەن، اگەنتتىك بايلانىس، اقپاراتتاندىرۋ جانە اقپارات كوميتەتىمەن جاسالعان شارتتاردا كورسەتىلگەندەي، كۇن سايىن مەملەكەت ءومىرى مەن ەلىمىزدە ىسكە اسىرىلىپ جاتقان مەملەكەتتىك باعدارلامالار جونىندەگى اقپاراتتاردى اشىق جاريالاپ وتىرۋعا مىندەتتى بولعان. ءبىراق وسى تالاپ ورىندالماي كەلگەن. مۇنى قارجىلىق باقىلاۋ كوميتەتىنىڭ مامانى ءداريعا الپەيىسوۆا راستادى. ول ماتەريالداردىڭ قازاق جانە ورىس تىلدەرىندە جاريالانۋى تيىستىگىن، ءبىراق ونداي تالاپتىڭ دا بۇزىلعانىن حابارلادى. «اگەنتتىكتىڭ بەرگەن ەسەبى مەن اتقارىلعان جۇمىستار تۋرالى اكتىلەرىن الىپ قاراساق، بارلىعى 199 ماتەريال جاريالانعان. ارينە بۇل از.

مىسالى، كۇن سايىن كەم دەگەندە 5-7 ساراپتامالىق ماتەريالدار شىعۋى ءتيىس بولعان. ءبىراق ونداي ماتەريالدار مۇلدەم شىقپاعان. اي سايىن كەم دەگەندە 12 سۇحبات جارىق كورۋى كەرەك بولاتىن، قاراپ وتىرساق بار-جوعى 5 سۇحبات جاريالانعان. ايتارلىعى، ماتەريالدار قازاق جانە ورىس تىلدەرىندە جاريالانۋى ءتيىس بولعان، ءبىراق بۇل تالاپ تا ورىندالماي كەلگەن»،- دەپ ءتۇسىندىردى ءمان-جايدى ءداريعا الپەيىسوۆا. اۋديتتىك تەكسەرۋ بارىسىندا انىقتالعان تاعى ءبىر جايت، 2011 جىلعى ءساۋىر ايىندا شارت بويىنشا 300-450 جاڭالىق جاريالانۋى ءتيىس بولعان. ءىس جۇزىندە بار-جوعى 150 جاڭالىق جاريالانعان. مامىر ايىنداعى جاعداي دا وسىعان ۇقساس.

ايتا كەتەلىك، سوتقا دەيىنگى تەرگەۋدەن انىقتالعانداي، 2010-2015 جىلدار ارالىعىندا سەيىتقازى ماتايەۆ ءوز ۇلى – «قازتاگ حالىقارالىق اقپارات اگەنتتىگى» ءجشس-ىنىڭ باس ديرەكتورى اسەت ماتايەۆپەن بىرگە الدىن-الا ءبىر توپ ادامدارمەن ءسوز بايلاسىپ، الداۋ مەن سەنىمدى تەرىس ماقساتقا پايدالانۋ جولىمەن مەملەكەتتىك ساتىپ الۋ سالاسىنداعى ءىرى كولەمدەگى بيۋدجەت قاراجاتىن جىمقىردى دەپ ايىپتالۋدا. ۇرلانعان اقشانىڭ كولەمى 169 ملن. تەڭگەنى قۇرايدى.
    
ءامىرلان ءالىمجان