استاناداعى №2 ەسىل اۋداندىق سوتىندا سەيىتقازى جانە اسەت ماتايەۆتاردىڭ قىلمىستىق ءىسى بويىنشا سوت پروسەسى جالعاسىپ جاتىر. بۇگىنگى  سوت وتىرىسىندا سوتقا جاۋاپ بەرگەن IT-مامانى مارعۇلان دۇزەلدىكوۆ «قازتاگ» حالىقارالىق اقپارات اگەنتتىگىنىڭ مەملەكەتتىك اقپاراتتىق تاپسىرىس اياسىندا ءوز جاريالانىمدارىن 5 مىڭ تەڭگەگە ساتقانىن مالىمدەدى. ونىڭ ايتۋىنشا، كەلىسىم-شارتتىڭ تالاپتارى بويىنشا، س. ماتايەۆتىڭ يەلىگىندەگى «قازتاگ» اگەنتتىگى كۇن سايىن اشىق جاعدايدا جاڭالىقتار جاريالاۋى ءتيىس بولعانىمەن، ءبىراق بۇل تالاپ ورىندالماعان. ويتكەنى اگەنتتىك جاڭالىقتارى تەك اقىلى قىزمەت ءتۇرىن پايدالاناتىن وقىرماندارعا عانا ءقولجتىمدى بولعان.

«اگەنتتىك جاڭالىقتارىنىڭ كوپشىلىگىن كەز-كەلگەن وقىرمان وقي المايتىن، ويتكەنى ول تەك اقىلى قىزمەت ءتۇرىن پايدالانا الاتىن وقىرماندارعا قولجەتىمدى بولدى. مىسالى، ءار ماتەريالدى وقۋ ءۇشىن 5 مىڭ تەڭگە تولەۋگە ءتيىسسىڭ. سونىمەن قاتار، جاڭالىقتارعا جازىلۋشىلاردىڭ سانى 200-دەن اسپاۋى قاجەت دەگەن تالاپ قويىلدى»،- دەپ ءتۇسىندىردى ءىستىڭ اق-قاراسىن سوتقا بەرگەن جاۋابىندا م. دۇزەلدىكوۆ. ول سوتقا قازتاگ اگەنتتىگىنىڭ ورتاازيالىق ارىپتەستەرىنىڭ بارلىعى ءبىر سەرۆەردە ورنالاسقانىن ايتىپ بەردى. ماتەريالداردى رەداكسيالاۋعا تەك اسەت ماتايەۆتىڭ قۇزىرەتى بولعان.

  «قازتاگ اقپاراتتىق رەسۋرسىنا تولىق تەكسەرۋ جۇرگىزۋ ناتيجەسىندە قىرتاگ، اۋتاگ، وزتاگ جانە تاجىكتاگ اقپاراتتىق اگەنتتىكتەرى ءبىر سەرۆەردە ورنالاستى، ولاردىڭ اكىمشىلەرى مەن رەداكتورلارىنىڭ ءىس جۇزىندە بارلىق رەسۋرستارعا شىعا الاتىن مۇمكىندىگى بولدى. قىرتاگ، اۋتاگ، وزتاگ جانە تاجىكتاگ-تىڭ بارلىق جاريالانىمدارىن تەك اسەت ماتايەۆ قانا تۇزەتە الاتىن ەدى. ياعني، اتالعان اقپارات اگەنتتىكتەرى ارىپتەستەر ەمەس، تۋراسىندا اسەت ماتايەۆتىڭ يەلىگىندەگى رەسۋرستار»،-دەدى م. دۇزەلدىكوۆ.

ساراپشى مامانىڭ ايتۋىنشا، تەحنيكالىق ەرەكشەلىكتەرگە سايكەس، قويىلعان تالاپتىڭ ءبىرى فوتومۇراعاتتىڭ بولۋى. الايدا ونداي فوتومۇراعات بولماعان. بۇل تۋرالى سوتقا بەرگەن جاۋابىندا مارعۇلان دۇزەلدىكوۆ: «زەرتتەۋ بارىسىندا ديسكىدە ەشقانداي فوتومۇراعات تابىلماعان جوق. الايدا قازتاگ اتقارىلعان جۇمىستار تۋرالى ەسەپ بەرگەندە تاپسىرىس بەرۋشىنىڭ ەسەبىمەن قاتار ەلەكتروندى مۇراعاتتى قوسا تاپسىرۋعا مىندەتتى. ءبىراق ماتەريالداردى مۇراعاتتاۋ جۇمىسى جۇرگىزىلمەگەن»،- دەپ ءتۇسىندىردى.

ايتا كەتەلىك، سوتقا دەيىنگى تەرگەۋ ءىس-شارالارىنان انىقتالعانداي، 2010-2015 جىلدار ارالىعىندا سەيىتقازى ماتايەۆ ءوز ۇلى – «قازتاگ حاا» ءجشس-ىنىڭ باس ديرەكتورى اسەت ماتايەۆپەن بىرلەسىپ الدىن-الا ءبىر توپ ادامدارمەن ءسوز بايلاسىپ، الداۋ مەن سەنىمدى تەرىس ماقساتقا پايدالانۋ جولىمەن مەملەكەتتىك ساتىپ الۋ سالاسىنداعى ءىرى كولەمدەگى بيۋدجەت قاراجاتىن جىمقىردى. ۇرلانعان اقشانىڭ كولەمى 169 ملن. تەڭگەنى قۇراعان.

ءامىرلان ءالىمجان