"Ninety one" توبىنىڭ 2 قازان كۇنى شىمكەنت قالاسىندا وتەتىن كونسەرتى كەيىنگە شەگەرىلدى، - دەپ حابارلايدى Qamshy.kz.

ك-پوپ ستيلىندە ساحناعا شىعىپ جۇرگەن توپتىڭ مۇشەلەرى بۇل تۋرالى ينستاگرامداعى رەسمي پاراقشالارىندا ايتتى. 

"شىمكەنتتە وتەتىن كونسەرتىمىز اكىمدىكتىڭ سۇراۋى بويىنشا كەيىنگە شەگەرىلدى. سول كەزدە كورىسكەنشە" دەدى ولار.

ايتا كەتەيىك، بۇعان دەيىن شىمكەنتتىك ءبىر توپ جاستار جينالىپ، 91 توبىنا قارسىلىق بىلدىرگەنىن حابارلاعان بولاتىنبىز. 

«بىزگە ازعىندار ەمەس، ازاماتتار كەرەك! بىزگە قۇزعىندار ەمەس، قىراندار كەرەك! ەلىن سۇيگەن ۇلاندار كەرەك!» دەگەن شىمكەنت جاستارى ارنايى بەينەماتەريال دايىنداپ، قازاق ساحناسىندا قىزىلدى-جاسىلدى جىگىتتەردىڭ جۇرۋىنە قارسى ەكەندەرىن ايتقان ەدى. 

سونداي-اق، بەينەماتەريالدا بەلگىلى ءانشى زاتتىبەك كوپبوسىن ۇلى دا بوي كورسەتىپ، قازاق ساحناسىندا «91» توبىنىڭ جۇرۋىنە قارسى ەكەنىن جەتكىزگەن.

اتالمىش ۆيدەو الەۋمەتتىك جەلىدە قىزۋ تالقىعا ءتۇسىپ، جەلى قولدانۋشىلارىنىڭ پىكىرى ەكىگە جارىلدى. ءبىرى شىمكەنتتىك جاستاردى قولداسا، ەندى كەيبىرى 30-40 ادامنىڭ بارلىق وڭتۇستىك جاستارىنىڭ اتىنان سويلەۋگە بولمايتىنىن ايتقان ەدى.