بۇگىن استانادا الماتى وبلىسىنىڭ كۇندەرى باستالدى. «قۋاتتى ايماق - قۋاتتى قازاقستان» تاقىرىبىمەن وتەتىن مادەني-الەۋمەتتىك شارا بارىسىندا ءبىرقاتار يگى ىستەر اتقارىلۋ كوزدەلگەن. بۇگىن وسى ماسەلەگە وراي قازاقستان رەسپۋبليكاسى اقپارات جانە كوممۋنيكاسيالار مينيسترلىگى جانىنداعى ورتالىق كوممۋنيكاسيالار قىزمەتىندە الماتى وبلىسى اكىمىنىڭ ورىنباسارى باقتيار ونەربايەۆتىڭ قاتىسۋىمەن باسپا ءسوز بريفينگى ءوتتى، دەپ حابارلادى وبلىس اكىمىنىڭ باسپا ءسوز قىزمەتى. 

بريفينگتە قازاقستان تاۋەلسىزدىگىنىڭ 25 جىلدىعىنا وراي ءوتىپ جاتقان وبلىس كۇندەرىنىڭ اياسىندا جەتىسۋ جەرىنىڭ جەتىستىكتەرى جايلى ءسوز بولدى.

بريفينگتە وبلىس اكىمىنىڭ ورىنباسارى الماتى وبلىسىنىڭ الەۋمەتتىك - ەكونوميكالىق دامۋى مەن ءوڭىردىڭ تاۋەلسىزدىك جىلدارىنداعى قول جەتكىزگەن جەتىستىكتەرىنە توقتالدى.

جۋرناليستەر الدىندا سويلەگەن سوزىندە وبلىس اكىمنىڭ ورىنباسارى ب. ونەربايەۆ ەلباسىنىڭ تاپسىرماسىنا سايكەس الماتى وبلىسىندا اگرارلىق كەشەندى دامىتۋعا ۇلكەن كوڭىل ءبولىنىپ جاتقاندىعىن دا تىلگە تيەك ەتتى.

وزدەرىڭىز جاقسى بىلەتىندەي، ءبىزدىڭ وبلىس اگرارلى ءوڭىر بولىپ سانالا ۇزاق جىلدار بويى ەلىمىزدەگى قىزىلشا وسىرەتىن ءوڭىر مارتەبەسىن يەلەنىپ كەلدى.

بىلتىر 4020 گەكتارعا ءتاتتى ءتۇبىر وتىرعىزىلسا، بيىل 6500 گەكتارعا ورنالاستىرىلدى. سونداي-اق، بىرنەشە جىل تۇرىپ قالعان كوكسۋ قانت زاۋىتى بىلتىر ينۆەستورلاردىڭ ارقاسىندا قايتا ىسكە قوسىلدى. بيىل بۇل كاسىپورىندا جاڭعىرتۋ جۇمىستارى ورىندالدى. ال اقسۋ قانت زاۋىتىن قايتا قالپىنا كەلتىرۋ جۇمىستارى باستالدى. بيىلعى جىلى ءوڭىردىڭ قانت قىزىلشاسىن وسىرۋمەن اينالىساتىن شارۋالارى مول ءونىم الۋدى جوسپارلاۋدا. اتاپ ايتار بولساق، وتكەن جىلى ورتاشا ونىمدىلىك گەكتارىنان 300 سەنتنەردى قۇراسا، اعىمداعى جىلى ديقاندار ءار گەكتارىنان 350 سەنتنەر ءونىم الۋدى كوزدەۋدە. وسىلايشا، الماتى وبلىسى بولاشاقتا ەلىمىز تۇرعىندارىن ءوزىمىزدىڭ قانتپەن قامتاماسىز ەتۋ جانە بىرتىندەپ ەكسپورتقا شىعارۋ ماقساتىندا قولدا بار مۇمكىندىكتى بەلسەندىلىكپەن پايدالانۋدا. ۇستىمىزدەگى جىلدىڭ 7 ايىندا اۋىلشارۋاشىلىعى سالاسى جالپى ءونىمىنىڭ كولەمى 176،4 ملرد. تەڭگەگە جەتىپ، ناقتى كولەمنىڭ يندەكسى 102،7%-دى قۇرادى، - دەدى وبلىس اكىمىنىڭ ورىنباسارى باحتيار ءالتاي ۇلى.

الماتى وبلىسى اكىمىنىڭ ورىنباسارى ءوز سوزىندە وڭىرگە ينۆەستيسيا تارتۋ، ءتۋريزمدى دامىتۋ، سونداي-اق مەكتەپكە دەيىنگى ءبىلىم بەرۋمەن قامتاماسىز ەتۋگە ۇلكەن كوڭىل ءبولۋ، تۇرعىن ءۇي جانە وزگە دە الەۋمەتتىك نىسانداردىڭ قۇرىلىسىن بەلسەندى جۇرگىزۋ جۇمىستارى وبلىس باسشىلىعىنىڭ باستى نازارىندا ەكەندىگىن جەتكىزدى.

بريفينگ بارىسىندا باقتيار ونەربايەۆ مەملەكەتتىك قولداۋدىڭ ارقاسىندا وبلىس ورتالىعى تالدىقورعان قالاسىن دامىتۋعا ۇلكەن كوڭىل ءبولىنىپ وتىرعاندىعىن، ونى سوڭعى كەزدەگى قالاداعى قۇرىلىس جۇمىستارىنىڭ قارقىندى جۇرگىزىلىپ جاتقاندىعىمەن تۇسىندىرۋگە بولاتىندىعىن ءتۇسىندىردى.