اتىراۋ وبلىسى قىزىلقوعا اۋدانىنداعى شارۋا قوجالىقتارىنىڭ بىرىندە قويلار جاپپاي قىرىلۋدا،-دەپ حابارلايدى Qamshy.kz قازاقپاراتقا سىلتەمە جاساپ. 

الدىن الا دياگنوز بويىنشا، مال ولىمىنە پاستەرەللەز سەبەپ.

«قىزىلقوعا اۋدانى جاسقايرات اۋىلدىق وكرۋگىندەگى ۇساق مالدىڭ كەسەلى تۋرالى العاشقى فاكتى اتىراۋ وبلىسىنىڭ ۆەتەريناريا باسقارماسىنا 13 قىركۇيەك كۇنى كەلىپ ءتۇستى. قىرىلعان مالدان بيولوگيالىق ۇلگىلەر الىنىپ، زەرتحاناعا جونەلتىلدى. الدىن الا قويىلىپ وتىرعان دياگنوز - پاستەرەللەز. الىنعان مالىمەتتەردى انىقتاۋ ءۇشىن زەرتحانالىق تەكسەرۋلەر قايتا جاسالىنۋدا. ايتا كەتۋ كەرەك، كەسەلگە تەك كوكتەمدە تۋعان جاس مال شالدىققان. ولاردىڭ اۋىرۋ سەبەبى كوكتەمگى جاۋىن-شاشىن مەن ىلعال بولۋى مۇمكىن. ويتكەنى، قىرىلعان قوزىلار كوكتەمدە سۋىق جەر ۇستىندە ءجيى تۇنەگەنى انىقتالدى. بۇگىنگى كۇنى 185 باس مال ءولدى. ۆەتەرينارلار سىرقاتتانعان قوزىلارعا ەگۋ جۇمىستارىن جۇرگىزۋدە. وقيعا ءبىر عانا شارۋا قوجالىعىندا تىركەلدى»، - دەپ مالىمدەدى اتىراۋ وبلىسى اكىمدىگىنىڭ باسپا ءسوز قىزمەتىنەن.