ونىڭ ەسىمى ايجان. جاسى وتىزدان اسسا دا ومىرلىك سەرىگىن ءالى كەزدەستىرمەگەن ول قازىرگى قوعامدا كارى قىزدارعا دەگەن سىننىڭ كوبەيىپ كەتۋىنە بايلانىستى ءوز ويىن جايىپ سالدى.

"ءيا، بالكىم مەنى دە بىرەۋلەر كارى قىز دەيتىن شىعار. ءبىراق ءوزىمدى كارى قىز دەپ ەسەپتەمەيمىن. جالپى تۇرمىسقا شىقپاعان قىزداردى بۇلاي اتاپ كەمسىتۋدىڭ كەرەگى جوق. قاي بويجەتكەن ومىرلىك جولداسىن تاۋىپ، بالالى-شاعالى بولىپ، ءبىر ءۇيدىڭ كەلىنى اتانعىسى كەلمەيدى دەيسىز؟  بىرەۋلەر "قىزدار كۇيەۋگە تيمەي قالسا وزدەرى كىنالى. جاقسى جىگىتتەردى مەنسىنبەي ءجۇرىپ الادى" دەپ، جازعىرىپ جاتادى. بۇل دا دۇرىس ەمەس. مەندە مىسالى، بىرەۋدى مەنسىنبەۋ دەگەن بولعان ەمەس.

ستۋدەنت كەزىمدە بار ۋاقىتىمدى وقۋعا ارنادىم. باسقا قىزدار جىگىت ىزدەپ، 4-كۋرستىڭ سوڭىندا كۇندە "جاسىمىز ءوتىپ بارادى، بىرەۋدى تاۋىپ كەتەيىك" دەپ، نەشە ءتۇرلى جىگىتتەرمەن تانىسىپ، قىدىرىپ ءجۇردى. ال مەن بولسام ولارعا ەرمەيتىنمىن. ولاردى بۇزىلعان قىز دەپ ويلايتىنمىن. بۇگىن قاراسام سولار تورت-بەس بالانىڭ اناسى اتانىپ، جاپ-جاقسى ايەل بولىپ وتىر.

ءقازىر ەندى بار نيەتىمدى جۇمىسقا اۋدارعاندىقتان با، كۇيەۋگە شىعۋ  قاجەتتىگىنە اسا ءمان بەرمەيمىن. جالپى كۇيەۋگە شىعۋ جونىندە نەگە قىز ويلاۋى كەرەك؟ بۇل تاعدىردىڭ جازۋىمەن بولاتىن ءىس ەمەس پە؟ بىرەۋ ەرتە، بىرەۋ كەش دەگەندەي، بويداق قىز ايتەۋىر كۇندەردىڭ ءبىر كۇنىندە سەرىگىن كەزدەستىرەر. ال كەزدەسپەسە، ول دا ماڭدايعا جازىلعان ءىس بولار.

ارينە، مەنىڭ كۇيەۋگە شىققىم كەلەدى. بىرەۋلەر "ءالى كۇنگە كۇيەۋگە شىقپاي نەعىپ ءجۇرسىڭ؟ دەپ جاتادى. ول مەنىڭ قولىمداعى ءىس ەمەس. مۇمكىن ۋاقىتى ءالى كەلمەگەن شىعار. بەرەر جاۋابىم وسى.

اينالامدا جاقسى ازاماتتار كوپ. مەن جاسىم وسكەن سايىن ادامداردى بارىنشا جاقسى كورەتىن بولدىم. بۇرىن مەيلىنشە تۇيىق، كىسىلەردەن الشاق جۇرەتىن ەدىم. ءقازىر ورتام ۇيرەتتى مە، ادامدارسىز تۇرا المايمىن. ماعان مەيىرىم شۋاعىن توگىپ تۇراتىن جىگىتتەردى كورگەن سايىن سولاردىڭ بويىنان ءوزىمنىڭ بولاشاق جارىما ءتان قاسيەتتەردى ىزدەيمىن. "كۇيەۋىم وسىنداي بولسا ەكەن" دەپ ويلايمىن. ءبىراق بىرەۋدى وتباسىنان بۇزىپ، ايەلى بار ەركەككە جابىسۋ ويىمدا جوق. اينالامداعى مەنى سىيلايتىن ەر ازاماتتارعا مەنىڭ دە سىي-قۇرمەتىم ەرەكشە.  ال، ومىرلىك جولداس تابۋ ول قىزدىڭ قولىنداعى نارسە ەمەس، تاعدىردىڭ ءىسى.

ايعانىم ءبىرتۋار