قازاقتىڭ تابان تىرەپ، جۇرت قارايتقان جەرىنىڭ قاي-قايسى بولسا دا كيەلى، قاسيەتتى. سوندىقتان دا ءان-جىرىمىزدىڭ باسىم بولىگى ەل مەن جەرگە، تاۋ مەن دالاعا، وزەن-كولگە ارنالىپ جاتادى. سونداي اندەردىڭ قاتارىن جاقىندا «اۋىلعا ساعىنىش» اتتى ءان تولىقتىردى.
«تۋلاعان تولقىن سەزىم باسىلمادى-اۋ،
ءبىر xابار كەلەر مە دەپ بوعدا تاۋدان...»، - دەپ كەلەتىن ءان جولدارىنان-اق ءاننىڭ قايدا ارنالعانىن تۇسىنەسىز. ءان اۆتورى تۋعان جەرىنە «سارى ارقادان كوشكەن بۇلتتاردان سالەم» جولدايدى. ساعىنىشىن جەتكىزەدى.
«شىن مانىندە ول ساعىنىش – «اعاجاي» دەپ ءان سالعان التاي اۋعان قانداستاردىڭ ساعىنىشىنداي؛ تاعى سول «التايىم» دەپ الپىس جىل اڭساعان، «قايران التاي» دەپ ءان سالعان حاليفا التايدىڭ ساعىنىشىنداي؛ جايىر تاۋدى جىرلاعان، جايىرىن اتامەكەنگە اكەپ العىسى كەلەتىن شايىر، جاركەن بودەشتىڭ ساعىنىشىنداي؛ «باۋىرىڭا ءبىر بارىپ، ەنەيىنشى كۇنەس-اي» دەيتىن ەرمۇرات زەيىپxاننىڭ ساعىنىشىنداي باسىلمايتىن ساعىنىش»، - دەيدى اۆتور.
بۇل ءاندى تىڭداعان كىسى ۇلكەن قيماستىقتىڭ، جات قولىندا، بوگدەنىڭ تابانىندا قالعان توپىراققا دەگەن «اتتەگەن-اي» كوڭىلدىڭ ساعىنىشپەن قابىسقان، وكىنىش بۇركەلگەن ەموسياسى جاسىرۋلى جاتقانىن دا بايقاي الادى.
ءاننىڭ اۆتورى – ۇلت مۇددەسىن ۇران ەتكەن ايتۋلى ازامات، اقىن، جۋرناليست ەرلان تولەۋباي. ەرەكەڭ بۇعان دەيىن دە ءوزىنىڭ جانە باسقا دا اقىندار سوزىنە بىرنەشە ءان جازعان.
«جاڭعىرىپ جارتاسىڭنان ەستىلەتىن،
داۋىسىن ۇلارىڭنىڭ ساعىنامىن»، - دەپ اياقتالاتىن اندەگىدەي، بوعدا تاۋى - ورمانى اڭنىڭ الۋان ءتۇرى جورىتقان، قىرى مالعا شۇرايلى، اسپانىندا قىران قالىقتاعان قۇتتى ايماقتاردىڭ ءبىرى. بوعدا – قىتايداعى قازاق دياسپوراسى قونىستانعان اۋماقتارداعى سايرام، قاناس سياقتى ءۇش ءىرى كولدىڭ ءبىرىنىڭ اتاۋى. قازاقتىڭ كوز مارجاندارىنىڭ ءبىرى دەسە دە بولادى. بوعدا تاۋى تەڭىز دەڭگەيىنەن 4545 م بيىكتىكتە ورنالاسقان. ۇلار قۇسى دا، بيىك جارتاستا، قۇزار شىڭداردا تىرشىلىك ەتەتىن كيەلى قۇستاردىڭ ءبىرى. ءان اۆتورىنىڭ ساعىنىشى - ءان سوزىندە سيمۆول ەتىلگەن «ۇلارداي» بيىككە ورلەگەن، اسقاق قالىقتاعان تاۋ ساعىنىش بولسا كەرەك. ول، ساعىنىش قانا ەمەس، جىراقتاعى ەلگە، الىستاعى اعايىنعا، سولاردىڭ اتامەكەنگە دەگەن اڭسارىنا تۋعان ماxابباتتىڭ ءدال ءوزى.
ءاندى «قازاقستان داۋىسى» مەگاجوباسىنىڭ 2015 جىلعى جەڭىمپازى مۇراتبەك حايروللا ورىندايدى. ءان ورنالاستىرىلعان قىتايداعى ەتنيكالىق قازاقتار قارايتىن ينتەرنەت كونتەنتتە، العاشقى كۇننىڭ وزىندە-اق ءان جارتى ميلليون رەتتەن ارتىق تىڭدالعان كورىنەدى.
«قامشى» پورتالى جاڭا ءاننىڭ تۇساۋىن كەسە وتىرىپ، ساعىنىشقا تولى ءان ءماتىنى مەن اۋەنىنىڭ اۆتورى ەرلان تولەۋبايعا شىعارماشىلىق تابىس تىلەيدى.
