قىركۇيەك ايىنىڭ 18-ىندە الماتى وبلىسى جامبىل اۋدانىندا ءۇش بىردەي ازامات جوعالىپ، 24 قىركۇيەك كۇنى ولاردىڭ قىلمىسكەرلەر قولىنان قازا تاپقانى ءمالىم بولدى. سول ءۇش ازاماتتىڭ ءبىرى قادىلبەك ءالىمحان ۇلىنىڭ ۇستازى قۇسىمان اۋەزوۆ قيىن ساتتە تۋعان قوس ولەڭىن رەداكسيامىزعا جولداپتى.

قادىلبەكتى ىزدەۋ

قادىلبەك قارعام بارمىسىڭ،

بار ەدى تۇلعاڭ نار مۇسىن.

اللاعا تىلەك قىلامىن،

تۇسپەسىن ساعان جان قىسىم.

جولداسىڭ، جوراڭ وزىڭمەن،

سەزگەنەم باقىت كوزىڭنەن.

قالاي ءبىر قاستىق سايلادى،

بەزبۇيرەك، سۇمدار، بەزىنگەن.

جىگەرىم قۇم بوپ وتىر-اۋ،

جەتە الماي سەنىڭ قاسىڭا.

قۇتىلعان اۋىر تىرلىكتەن،

كورگەندە كۇنىڭ وسى ما؟!

جاپانى تارتىپ ءبىر كەزدەر،

دەگەندە ەندى جەتتىم-اۋ.

قازاق دەپ شىركىن، قارعام-اۋ!

اكەڭدەي سەنىپ كەتتىڭ-اۋ،

باۋىرىم امان بولسا ەكەن،

وتەدى-اۋ، دۇنيە وي دەگەن.

ساپتى اياقتان اس ىشسەڭ،

سابىنا قاراۋىل قوي دەگەن.

ءۇش بىردەي قايرەن بوزداقتار،

ءبىر اللا عانا جار بولسىن.

جارقىلداپ تۇرعان ءجۇزىڭدى،

كورەتىن كۇندەر بار بولسىن.

ەلجىرەپ جاتقان ەلىڭ بار،

جامىراپ جاتىر جاقىنىڭ.

سەن ءۇشىن ايعاي سالىندى،

سەن ءۇشىن شىقتى باتىل ءۇن.

اۋ باستا جازعان ماڭدايعا،

تەلەيىڭ، قۇتىڭ، ب ا ق، قايعىڭ.

بولىڭدار امان باۋىرلار،

اللاعا اماناتتايمىن.

2016 جىلعى 23 قىركۇيەك، جۇما

كوڭىل ايتۋ

جەتپەي كەتى-اۋ، امال نە ارمانىنا،

كونەسىڭ اللا باسقا سالعانىنا.

بايان تىرلىك بەرەكە، بىرىلىك بەر،

تۋعان-تۋىس، بالا-شاعا، قالعانىنا.

اعالار ايتتى اقىل قۇپ الاتىن،

ارمانىڭ الا تاۋدان قۇلاماسىن،

ارقالى ەل، اتا زاڭ تۇرعانىندا،

جەگەنىن جەلكەسىنەن شىعاراتىن.

سابىردان ساناڭىزعا كۇش كەسە ەكەن،

بىرلىك بەرەكەتىڭ ۇستەسە ەكەن،

جەتەسىز جەل وكپەنىڭ قىلىعىنا،

اعايىن اراڭا جىك تۇسپەسە ەكەن.

2016 جىلعى 24 قىركۇيەك

قادىلبەك ءالىمحان ۇلىنىڭ ۇستازى قۇسىمان اۋەزوۆ