ءال-فارابي اتىنداعى قازاق ۇلتتىق ۋنيۆەرسيتەتىندە حالىقارالىق اباي كلۋبىنىڭ جانە «AMANAT» ادەبي جورنالىنىڭ 15 جىلدىعىنا ارنالعان سالتاناتتى شارا ءوتتى، - دەپ حابارلايدى Qamshy.kz.

جازۋشىلاردىڭ شىعارماشىلىق كەشى اباي ادەبي كلۋبىنىڭ قۇرىلتايشىسى روللان سەيسەنبايەۆتىڭ 70 جىلدىق مەرەيتويىمەن تۇسپا-تۇس كەلىپ وتىر. شاراعا وتاندىق جانە شەتەلدىك اقىن-جازۋشىلار، بەلگىلى قوعام قايراتكەرلەرى، عالىمدار، ۇستازدار مەن ستۋدەنتتەر قاتىستى.

قازۇۋ رەكتورى، اكادەميك عالىم مۇتانوۆ قۇتتىقتاۋ سوزىندە اتاپ وتكەنىندەي، حالىقارالىق اباي كلۋبى مەن «امانات» ادەبي جۋرنالى قازاقستاننىڭ الەمدىك برەندى بولىپ تابىلادى.

 «بۇگىندە قازاق جازۋشىسى روللان سەيسەنبايەۆتىڭ كلۋبى زاماناۋي اۆتورلاردىڭ، الەم ادەبيەتى كلاسسيكتەرىنىڭ جانە تاڭدامالى باسىلىمداردىڭ بىرەگەي 200 تومىن شىعارىپ، كوپشىلىك وقىرماندارعا ۇسىنۋدا.

ءبىزدىڭ قوعام ءۇشىن بۇل وسكەلەڭ ۇرپاق تاربيەلەۋدەگى ۇزدىك ۇلگى بولىپ تابىلادى.  قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ ايتقانداي، «ءبىزدىڭ بۇگىنىمىز بەن بولاشاعىمىزعا قۇندى دۇنيە بەرە الاتىن قازىنالى  كىتاپتار قورىن جاساۋ – جوعارى تالاپتى قاجەت ەتەتىن  ەڭ جاۋاپتى مىندەت»، – دەپ اتاپ ءوتتى عالىم مۇتانوۆ.

شارا اياسىندا «مەنىڭ ءجۇز كىتابىم» سەرياسى باسىلىمىنىڭ تاڭداۋلى جوباسىنىڭ تۇساۋكەسەرى ءوتتى. سونداي-اق، ءال-فارابي كىتاپحاناسىندا ۇيىمداستىرىلعان كورمەدە دۇنيەجۇزىنىڭ بەلگىلى كلاسسيكتەرى مەن زاماناۋي اقىن-جازۋشىلاردىڭ كىتاپتارى قويىلدى.

اباي جانە شاكارىم سياقتى قازاق اقىندارى مەن ويشىلدارىنىڭ ۇرپاعى روللان سەيسەنبايەۆ الەمدىك ادەبيەت پەن قازاق كلاسسيكتەرىنىڭ رۋحاني مۇراسىن، ۇلى اقىن-جازۋشىلاردىڭ شىعارمالارىن كەڭىنەن تاراتۋدى ماقسات تۇتادى. ءسوزدىڭ قاس شەبەرى بولىپ تانىلعان تۇلعا لوندوندا اباي ءۇيى مەن ەۋروپادا قازاقستاننىڭ كوركەمونەر ورتالىعىن اشتى.

سونداي-اق روللان شاكەن ۇلى ءال-فارابي  اتىنداعى قازۇۋ جانىنداعى الەم حالىقتارى ادەبيەتى ينستيتۋتىنىڭ جانە حالىقارالىق اباي كلۋبىنىڭ ديرەكتورى بولىپ تابىلادى. ينستيتۋتتىڭ باعىت-باعدارى – ەلدىڭ مادەني ءومىرىن دامىتۋ، قازاق ءتىلىن وركەندەتۋ جانە شەتەلدىك باسپالارمەن قارىم-قاتىناستى نىعايتۋ. مۇندا ستۋدەنتتەر مەن قوناقتار ءۇشىن بەلگىلى قازاقستاندىق جانە شەتەلدىك اقىن-جازۋشىلارمەن بولاتىن ادەبي كەشتەر مەن كەزدەسۋلەر ۇدايى وتكىزىلەدى.

 روللان سەيسەنبايەۆ ۇلكەن ۇجىمنىڭ شەتەلدەردە قازاق ەلى مەن ۋنيۆەرسيتەت مارتەبەسىن كوتەرەتىن ءىرى وكىلى ەكەندىگى قازۇۋ ءۇشىن ۇلكەن ماقتانىش.

روللان سەيسەنبايەۆ  – دۇنيەجۇزىلىك ونەر جانە مادەنيەت اكادەمياسىنىڭ (سان-فرانسيسكو)  اكادەميگى،  موتوۆۋندىق حالىقارالىق باسپاگەرلەر توبىنىڭ مۇشەسى، كوپتەگەن رەسپۋبليكالىق،  حالىقارالىق ماراپاتتار مەن الەمدىك مادەنيەتكە قوسقان ۇلەسى ءۇشىن بەرىلگەن ادەبي سىيلىقتاردىڭ يەگەرى.

«بەلسەندى ازاماتتىق كوزقاراسى، سانقىرلى تالانتى، دارىندىلىق قاسيەتتەرى ونى زاماناۋي كورنەكتى جازۋشىلار قاتارىنا قوستى. روللان شاكەن ۇلىنىڭ شىعارمالارى كوپتەگەن الەم تىلدەرىنە اۋدارىلىپ، قازاقستان، تمد، ەۋروپا، اقش  ەلدەرىنىڭ مەكتەپ باعدارلامالارىنا ەنگىزىلگەن»، – دەپ اتاپ ءوتتى قازۇۋ-دىڭ قازاق ادەبيەتى مەن ادەبيەت تەورياسى كافەدراسىنىڭ مەڭگەرۋشىسى الۋا تەمىربولات.

روللان سەيسەنبايەۆتىڭ ايرىقشا جوبالارىنىڭ ءبىرى – حالىقارالىق «امانات» جورنالى. قازاقستان وقىرماندارى ىزدەپ ءجۇرىپ الاتىن كوركەمدىك جانە قوعامدىق-ساياسي باسىلىم بەتتەرىنەن وقىرماندار بەلگىلى قوعام قايراتكەرلەرى مەن مەملەكەت باسشىلارىنىڭ وي-تولعاۋلارى، الەمدەگى بەلگىلى جازۋشىلاردىڭ شىعارماشىلىعى تۋرالى اقپارات الىپ وتىرادى.

ماسكەۋ جازۋشىلار وداعىنىڭ حاتشىسى ەۆگەنيي پوپوۆ: «مەن روللانمەن 40 جىلدان بەرى تانىسپىن. ول ماعان قازاق مادەنيەتى مەن پوەزيا الەمىنىڭ ەسىگىن اشىپ، مەن بىلمەيتىن جاڭا كەڭىستىكتەرگە جەتەلەدى. روللان اشقان حالىقارالىق اباي كلۋبى مەن ادەبي «امانات» جورنالى – كوركەم سوزبەن جازىلعان كەرەمەت دۇنيەلەر. مۇنداي بىرەگەي باسىلىمدار تمد ەلدەرىندە عانا ەمەس، بۇكىل دۇنيەجۇزىندە دە جوق»، – دەپ اتاپ ءوتتى. 

ال ۋكراينانىڭ حالىقارالىق ادەبيەت جانە ونەر اكادەمياسىنىڭ پرەزيدەنتى  سەرگەي دزيۋبا 70 جاسقا تولىپ وتىرعان قازاقتىڭ ءبىرتۋار اقىن-جازۋشىسى روللان سەيسەنبايەۆقا «مەرتۆىە بروديات ۆ پەسكاح» اتتى شىعارماسى ءۇشىن نيكولاي گوگول اتىنداعى ادەبي سىيلىعىن تابىستادى. سونداي-اق ۋكراين جازۋشىسى روللان شاكەنۇلىنا ۋكراينا عىلىم اكادەمياسىنىڭ اكادەميگى اتاعى بەرىلگەنىن جاريالادى.

سەرگەي دزيۋبا قازۇۋ رەكتورى، اكادەميك عالىم مۇتانوۆتىڭ ۋكراين تىلىنە اۋدارىلعان «سلەد نا پەسكە» اتتى ولەڭىن وقىدى.  «مەن رەكتوردىڭ ولەڭدەرىن ۋكراين تىلىنە اۋداردىم. اسىرەسە، «قۇمداعى ءىز» جانە «جۇلىنعان جاپىراق» ولەڭدەرى ماعان قاتتى ۇنايدى. جاقىن ارادا ولەڭدەر ۋكراينانىڭ  بەلگىلى «ۆسەلەننايا» جورنالىندا جاريالانادى»، – دەپ اتاپ ءوتتى سەرگەي دزيۋبا.  

سونداي-اق، جينالعان قاۋىم الدىندا قازۇۋ رەكتورى عالىم مۇتانوۆقا حالىقارالىق ادەبيەت جانە ونەر اكادەمياسىنىڭ فيلوسوفيالىق پوەزياعا قوسقان ۇلەسى ءۇشىن ماراپاتىنىڭ تابىستالۋى كەشتىڭ قۋانىشتى توسىنسىيىنا اينالدى.

«حالىقارالىق اباي كلۋبى مەن «امانات» جورنالى الەم حالىقتارىنىڭ ءتىلى مەن مادەنيەتىن، رۋحاني بايلىعىن ساقتاپ قالۋ ءۇشىن تەڭدەسسىز ۇلەس قوسىپ وتىرعان  شىعارماشىلىق زيالى قاۋىمنىڭ باسىن بىرىكتىرۋدە»، – دەدى روللان سەيسەنبايەۆ.

شىعارماشىلىق كەزدەسۋ بارىسىندا روللان سەيسەنبايەۆ جينالعان قاۋىمعا ريزاشىلىعىن ءبىلدىرىپ، تمد  ەلدەرىنەن كەلگەن كورنەكتى اقىن-جازۋشىلاردى حالىقارالىق اباي كلۋبىنىڭ مەدالىمەن ماراپاتتادى.