شەنەۋنىكتەر الاتىن ورتاشا جالاقى مولشەرىنە جاندوس بايىرحانوۆ قازاق ەسترادا جۇلدىزدارىمەن ەۋروپادا دەمالىپ قايتتى دەپ حابارلايدى www.ratel.kz. "قامشى" پورتالى ءوز كەزەگىندە بۇل ماتەريالدى قازاقشاعا اۋدارىپ، قوعامدىق تالقىعا سالۋدى ءجون كوردى.
بارىنە كۋاگەر – الەۋمەتتىك جەلى
اقتوبە قالاسى اكىمىنىڭ ءبىرىنشى ورىنباسارى قىزمەتىنە جاندوس بايىرحانوۆتىڭ تاعايىندالعانىنا قاراشادا ءبىر جىل بولادى. وعان دەيىن جاندوس مىرزا قالانىڭ الەۋمەتتىك جانە مادەني دامۋىنا جاۋاپ بەرگەن ەدى. باتىس قازاقستان وبلىسىنا شىعىستان، ناقتىراق ايتساق، وسكەمەننەن قونىس اۋدارعان.
شەنەۋنىكتەردىڭ دەمالعانىنا قارسى ەمەسپىز. جۇمىستارى اۋىر بولعاندىقتان دەمالعانى دۇرىس، ارينە. 2016 جىلدىڭ جازى قاربالاسقا تولى بولدى. جولدار جوندەلىپ، قالانى كورىكتەندەرۋ جۇمىستارى جاسالدى. اقتوبە وبلىسىنىڭ اكىمى ءىلياس يسپانوۆپەن ولار كوپتەگەن تەكسەرىس جاساپ، رەيدتەرگە شىقتى.
سۋعا شومىلۋ ماۋسىمى بىتەر شاقتا ءبىرىنشى ورىنباسار وتباسىنا قۋانىش-مەرەكە سىيلاۋدى ويلاستىرادى.
اڭگىمە – يتاليا مەن فرانسياعا شەگەر ساياحات. ەلىسەي الاڭىمەن قىدىرىپ، ەيفەل مۇنارىنان قولداعى بار بالمۇزداقپەن اينالاڭا كوز تاستاۋ جەتكىلىكسىز بولدى. باعىت كانن مەن ريمگە الىندى.
مىنانداي عاجايىپ ساياحات جايلى شەنەۋنىكتىڭ تەك جاقىندارى بىلگەن بولۋى كەرەك. الايدا اكىم ورىنباسارىنىڭ سۋرەتتەرى Instagram جەلىسىنەن ءبىراق شىقتى. ناقتىلاساق، دوستارىنىڭ پاراقشالارىنان. قازبالاساق، ميلليوننان استام وقىرمانى بار قازاقستاندىق تانىمال "مۋزارت" توبىنىڭ ءسوليسى مەيرامبەك بەسپايەۆتىڭ اككاۋنتىنەن. بەسپايەۆتىڭ فوتولارىن قىزىعا قارايتىن جۇرت بايىرحانوۆتى دا تانىپ قالدى. فوتو استىنا قالدىرىلعان پىكىرلەرگە قاراساق، تانىعاندار بارشىلىق.
بارىنە كىنالى – كانن
قىرسىق ءبىر شالسا، شىڭ شالادى دەگەندەي جاندوس بايىرحانوۆ دەمالىستان قايتىپ كەلگەننەن سوڭ جەرگىلىكتى ءبىر گازەت شەنەۋنىكتەر الاتىن جالاقى مولشەرىن انىقتاپ، جالپىعا جاريا ەتتى. جۋرناليستتەر وبلىس اكىمىنە رەسمي حات جولداپتى. بىرنەشە كۇننەن كەيىن اقتوبە ءوڭىرى باسشىسىنىڭ اپپارات جەتەكشىسى قول قويعان جاۋاپ-حات كەلەدى. حاتتا بەردىبەك ساپاربايەۆتان باستاپ شەنى تومەنگە دەيىنگىلەردىڭ الاتىن اقشاسى اشىق كورسەتىلەدى. كاننعا بارىپ دەمالۋدى جانى سۇيەتىن جاندوس بايىرحانوۆتىڭ تا ايلىعى اتالمىش ءتىزىم تۇر. 194 000 تەڭگە. بۇل جالاقى ەلىمىزدەگى ورتاشا ايلىق مولشەرىنەن كوبىرەك بولسا دا شەتەلدە ارقانى كەڭگە سالىپ دەمالۋعا جەتكىلىكسىز.
بارىنە جاۋاپ – ۇنەمشىلدىك
ratel.kz سايتى اينالشاقتاماي شەنەۋنىككە تىكەلەي قوڭىراۋ شالىپ، مۇنداي ايلىقپەن قازاقستاننىڭ شوۋ-بيزنەس جۇلدىزدارىمەن ەۋروپاعا وتباسى بولىپ قالاي بارىپ كەلۋگە بولاتىندىعى جايلى سۇرادى.
ديالوگ ءبىراق كوڭىلدەن شىقپادى. جالپى ەكى تاراپ اراسىنداعى اڭگىمە جاراسىم تاپپادى.
– قايىرلى كۇن! جۇمىسىڭىزعا كەدەرگى كەلتىرىپ جاتقان شىعارمىن. ءبىراق قوڭىراۋ شالماسام بولمادى. شەتەلدە وتكەن دەمالىس فوتولارىڭىزدى كەزدەيسوق ينستاگرامنان كورىپ قالدىم. شەنەۋنىكتىڭ شوۋ-بيزنەس جۇلدىزدارىمەن دوس بولعانى قىزىق ەكەن.
– بىلمەدىم. كىمدى ايتىپ تۇرسىز؟
– «مۋزارتتاعى» مەيرامبەك شە؟
– ءوز باسىڭىزعا بۇل مالىمەت نە ءۇشىن قاجەت؟
– ءسىز حالىق الدىندا جۇرگەن شەنەۋنىكسىز...
– بۇل مەنىڭ جەكە ءومىرىم.
– ءسىزدىڭ جەكە ومىرىڭىزگە ارالاسامىن دەگەن وي جوق مەندە. جاقىندا اقتوبەلىك ءبىر بەدەلدى گازەت اكىميات قىزمەتكەرلىرىنىڭ جالاقىسىن جاريا ەتكەن ماتەريال شىعاردى. ءسىز الاتىن ايلىقپەن كاننعا جەتۋ مۇمكىن ەمەس. اقشانى قالاي ۇنەمدەسەك، قالاي جيناساق بولادى دەپ كەڭەس سۇراماقشى ەدىم. بارلىعىمىز دا ەۋروپا كورسەك دەيمىز.
– ونى ايتا المايمىن. تۋراگەنتتىگىم مولسا ءبىر مەيلى. وكىنىشكە وراي، اتالمىش ماسەلە بويىنشا كەڭەسشى بولا المايمىن.
– شەتەلگە بارىپ كەلۋ ءۇشىن مۇنداي ايلىقپەن دە قور جيناۋعا بولادى عوي؟
– ايتا المايمىن. مۇنىڭ جۇمىسقا بايلانىسى جوق.
– شوۋ-بيزنەس وكىلدەرىمەن كوپتەن بەرى دوسسىز با؟
– بالا كەزدەن. ءبىراق ناقتى كىم جايلى ايتىپ جاتقانىڭىزدى بىلمەدىم.
– «مۋزارت» توبى جايىندا ايتىپ وتىرمىن.
– ول جەردە (فوتودا-رەد.) مەن ەمەس تە شىعارمىن...
– ول ءسىزسىز. وتباسىمەن تۇسكەن فوتودا ءسىزدى بەلگىلەپ قويىپتى.
– ايتا المادىم.
***
جاعداي وسىنداي، ەشتەڭە بىلمەيمىن، ەشنارسە ايتپايمىن. ماتەريال شىققاننان سوڭ شەنەۋنىك مەيرامبەك دوسىنا ءوز Instagram-عى مەن بار فوتولاردى ءوشىرىپ تاستاشى دەپ ايتا ما ەكەن الدە بالالىق شاق دوستىعىن قيماي قالا ما ەكەن؟
