قانات يسلامعا ارناۋ
ەلىڭ امان ءجۇرسىڭ بە، باسىڭ امان،
جانىڭ جايساڭ جىگىتسىڭ جاسىماعان.
باقىر باستى ۇل تاپپاي، باتىر تاپقان،
تەكتى جەردىڭ قىزى ەكەن اسىل اناڭ!
اردا تۋعان اتادان ۇلانبىسىڭ،
اڭىزبىسىڭ الاشقا، ۇرانبىسىڭ!
باۋىرىنا الاتاۋ باستى بۇگىن،
التىن توپشى التايدىڭ قىران قۇسىن.
ارىستانداي ايباتتى دارا تۋعان –
اينالايىن سوم بىلەك قاناتىمنان!
قارسىلاسىن قاڭباقتاي دومالاتقان،
جۇدىرىعى تەمىردەن جاراتىلعان.
تۇك وسكەن بە جۇرەككە، ءبۇر وسكەن بە،
(جۋاسيدى نە مىقتى ءۇنى وشكەندە)
سۇرىنۋگە حاقىڭ جوق، جەڭىلۋگە،
اتامەكەن تورىندە كۇرەسكەندە.
ازات كۇنگە جەتكەندە، ازات تاڭعا،
كىم توزەدى قورلىق پەن مازاقتارعا...
قاناتى بار قازاقتا ارمان بارما،
ارمان بارما قاناتتا قازاق باردا!!!
عالىم قاليبەك ۇلى،
اقىن، حالىقارالىق «الاش»
ادەبي سىيلىعىنىڭ يەگەرى.
