الماتىنىڭ ورتالىق اۋداندارىنىڭ بىرىندە 27 جاسار ارسەن (ءاتى-جونى كەيىپكەردىڭ قاۋىپسىزدىگى ءۇشىن تولىق اتالمايدى) ەسىمدى جىگىت تۇرادى. پاتەر جالداپ تۇرعانىنا ءۇش جىل بولدى. ءۇش جىل بۇرىن ايەلى ونى ەكى بالاسىمەن تاستاپ، باسقا بىرەۋمەن كەتىپ قالعان.

ارسەن 4 جاسار جانەل مەن 3 جاسار ديانانى باعۋ ءۇشىن جۇمىس ىستەپ ءجۇر. "ەكى قىزىمدى اسىراۋ ءۇشىن ىستەيمىن جۇمىستى. ايتپەسە ماعان ايەل دە باسقاسى دا كەرەك ەمەس. جالپى ايەل اتاۋلىدان ءتۇڭىلدىم" دەيدى ول.

ارسەننىڭ ايتۋىنشا ايەلى ەكىنشى بالاسىن تۋا سالا تاستاپ كەتكەن. ەكەۋى نەكەدە بولعان كەزىندە-اق باسقا جىگىتتەرمەن جۇرگەن ايەلىنىڭ ارەكەتىنە نارازىلىق بىلدىرگەن ارسەن قايىن جۇرتىنا جاقپايدى. ايەلىنىڭ تۋىستارى ونى "قىزىمىزدى قورلادى" دەپ جاماندايدى. ال ايەلىنىڭ ەسىل-دەرتى ارسەننەن تەزىرەك قۇتىلىپ، اناعۇرلىم قالتالى جىگىتتەرگە كەتۋ بولاتىن.

ايەلى ديانانى بوسانعاننان كەيىن كوپ ۇزاماي كيىم-كەشەگىن الىپ كەتىپ قالادى. ارسەن ونىڭ ارتىنان ىزدەپ بارىپ، بالالار ءۇشىن كەيىن قايتۋىن وتىنەدى. "مەن وعان بىرنەشە رەت بارىپ، ۇيگە قايت دەپ جالىندىم. ءبىراق ول جاڭا باقىتىن تاپقانىن ايتىپ، مەنى دە، بالالارىن دا كورگىسى كەلمەيتىنىن ءبىلدىردى. مەن ەركەكتىك نامىسىمدى تاپتاپ، كىشىرەيىپ باردىم عوي وعان. ايەلىم ءمىز باقپادى. "كوزدەگەنى اقشا، ماتەريالدىق بايلىق ەكەن، قالا بەرسىن" دەپ اقىل ايتتى دوستارىم. دوستارىمنىڭ سوزىنە قۇلاق اسىپ، ەكى بالانى جەتىمحاناعا وتكىزبەي تولىققاندى اسىراۋعا كوشتىم. ءۇش جىلدان بەرى ول بالالارىن كورۋگە كەلمەدى دە. نەتكەن قاتىگەز ايەل ەدى؟!

بولاشاقتى بالالارىمدى  جاقسى مەكتەپتە وقىتىپ، تاربيەلى ازاماتشا ەتىپ وسىرگىم كەلەدى. قاراجاتىمنىڭ تەڭ جارتىسىنا جۋىعى پاتەراقىعا كەتەدى. بالالارىم ەش تارشىلىق كورمەسىن دەپ ەكىنشى جۇمىسقا ورنالاستىم".

"كىشكەنتاي بالانى جالعىز باعۋ ەركەك ءۇشىن قيىن با؟" دەگەن سۇراعىمىزعا ارسەن بىلاي دەپ جاۋاپ بەردى:

— قينالعانىمدى اينالاما كورسەتكىم كەلمەيدى. ءبىراق مەنىڭ ارىپتەستەرىم، جاقىن دوستارىم باسىمنان وتكەن جاعدايدى ءتۇسىنىپ، ماعان قولۇشىن بەرۋدە. ارىپتەس قىز-كەلىنشەكتەر اپتا سايىن كەلىپ، پاتەردى جۋىپ-شايىپ، بالالارعا نەشە ءتۇرلى تاماق ءپىسىرىپ بەرەدى. بالارىمنىڭ دا كيىم-كەشەگىن دوستارىم جۋادى. سولاردىڭ ارقاسىندا ايەلىمنىڭ جوقتىعى بايقالمايدى دا. ءبىراق تاڭەرتەڭ بالالاردى تۇرعىزىپ، باقشاعا اپارۋ وڭاي بولماي تۇر. اسىرەسە ديانا جىلاپ، بالالار باقشاسىنا بارعىسى كەلمەيتىنىن ايتادى. ۇلكەنىم  ەس ءبىلىپ قالدى دەسەم بولادى. بولاشاقتا ماعان قولعانات بولاتىن سولار دەپ بىلەمىن.

ازىرلەگەن ايعانىم ءبىرتۋار