ۆەنادا (اۆستريا رەسپۋبليكاسى) ەكونوميكالىق، اۋىل شارۋاشىلىعى، تابيعات قورعاۋ، ونەركاسىپتىك، تەحنيكالىق جانە تەحنولوگيالىق ىنتىماقتاستىق جونىندەگى قازاقستان-اۆستريا ۇكىمەتارالىق كوميسسياسىنىڭ (ۇاك) 7-وتىرىسى ءوتتى. وندا ق ر ينۆەستيسيالار جانە دامۋ مينيسترلىگى تەحنيكالىق رەتتەۋ جانە مەترولوگيا كوميتەتى مەن اۆستريا ستاندارتتاۋ ينستيتۋتى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.

قۇجات قازاقستان ەكونوميكاسىنىڭ باسىم سالالارىن ستاندارتتاۋدى دامىتۋعا اۆستريا تاراپىنىڭ قاتىسۋىن قامتاماسىز ەتۋگە باعىتتالعان. تاراپتاردىڭ ايتۋىنشا، ستاندارتتاۋ سالاسىنداعى ىنتىماقتاستىق ەكونوميكالىق قاتىناستى دامىتۋدىڭ جانە ساۋداداعى تەحنيكالىق كەدەرگىلەردى الىپ تاستاۋدىڭ باستى قۇرالى بولىپ تابىلادى.

سونداي-اق، تاراپتار مەموراندۋمدى ورىنداۋعا ارنالعان جول كارتاسى جوباسىن كەلىستى. وندا تەحنيكالىق ساراپشىلارعا وقۋ باعدارلامالارىن ازىرلەۋ، بىرلەسكەن سەمينارلاردى وتكىزۋ جانە ستاندارتتاۋ سالاسىندا تاجىريبە الماسۋ، ونىڭ ىشىندە قۇرىلىس، قىزمەت قورسەتۋ، قىزمەتكەرلەر قۇرامىن سەرتيفيكاتتاۋ، جاڭعىرتىلاتىن ەنەرگيا كوزدەرى جانە ت.ب. باعىتتار بويىنشا ءوزارا ىنتىماقتاستىق مۇددەلەرى انىقتالدى.

قازاقستان-اۆستريا ۇكىمەتارالىق كوميسسيانىڭ وتىرىسىنا ق ر سىرتقى ىستەر ءمينيسترىنىڭ ورىنباسارى ر. ۆاسيلەنكو جانە اۆستريانىڭ عىلىم، زەرتتەۋ جانە ەكونوميكا ءمينيسترىنىڭ ورىنباسارى م. گيرلينگەر، سونىمەن بىرگە ق ر يدم تەحنيكالىق رەتتەۋ جانە مەترولوگيا كوميتەتى مەن «قازاقستان ستاندارتتاۋ جانە سەرتيفيكاتتاۋ ينستيتۋتى» رمك وكىلدەرى قاتىستى.

سونىمەن بىرگە، كوميسسيا وتىرىسىندا اۋىل شارۋاشىلىعى، ەنەرگەتيكا، قورشاعان ورتانى قورعاۋ، ازاماتتىق عارىش، دەنساۋلىق ساقتاۋ، ايماقارالىق ىنتىماقتاستىق  جانە ت.ب. ماسەلەلەر تالقىلاندى.