قايران ەلدىڭ مولتىلدەپ جاس كوزىندە،
سىنا تۇسكەن سىن ساتتە تاس توزىمگە،
ءبىر توپ ۇلان "الاش!" دەپ سۋىرىلدى
جيىرماسىنشى عاسىردىڭ باس كەزىندە.
عالامات كۇش تەرەڭدە تۇنىپ كەلدى،
ساي تاسىنداي كىلەڭ ەر ىرىكتەلدى.
ابىلايدىڭ اق تۋىن ارقالانىپ،
تۇڭعىش "الاش ورداعا" بىرىككەن-دى.
بىردەڭەنى سەزگەندەي دالا تىنعان،
كوز شالادى بۇركىتتىڭ قاناتىن قان...
جارقىلدادى التايدان نايزاعايلار
ەر تۇرىكتىڭ تەگىنەن جاراتىلعان.
از ۋاقىتقا حالقىمنىڭ باعى جاندى-اي،
بولاشاقتىڭ اتادى تاڭى قانداي؟..
ۇل شىققىن-دى: ءاليحان، احمەتتەي،
ءمىرجاقىپ پەن مۇستافا، ماعجانداي…
بار قازاقتان ارىستار – الداسىڭدار،
ءبارىڭنىڭ دە بۇگىننەن جالعاسىڭ بار.
باقىتجان مەن رايىمجان، تۇراعۇلدار،
حالەل، جاھانشا، قوشكەلەر، قايداسىڭدار؟
كوكتەسىڭدەر، بىلەمىن ايداسىڭدار،
قازاعىمنىڭ تورىنە جايعاسىڭدار.
مۇحامەتجان، ماعجان، شاكارىمدەر،
الاشتىڭ اردا ۇلدارى قايداسىڭدار؟
ۋاقىت جىلجىپ، وتكەن كۇن الىستادى،
وتقا ورتەندى ارىستار نامىستارى.
سەندەردى ىزدەپ، بۇل قازاق الاڭداۋدا،
قايداسىڭدار، الاشتىڭ ارىستارى؟
بۇل قازاقتىڭ جايلاۋى، كۇزدەۋمەنەن
تۇگى قالماي جوعالعان سىزدەرمەنەن.
تاۋەلسىزدىك العالى جيىرما جىلدا
قازاعىم ءجۇر باقىتىن ىزدەۋمەنەن.
الاياقتار جورتىپ ءجۇر بەزدەڭدەگەن،
ۇندەمەيتىن ءقاۋىپتى سەزگەنمەنەن...
وتسە داعى ءبىر عاسىر سودان بەرى
قازاق ءالى سول كەزدەن وزگەرمەگەن
كەنەۋى جوق تۇراتىن قىل-قۇرتتاردان،
كىلەڭ قىزىل ماسكەۋدەن بۇيرىقتى العان،
اتىپ-اسىپ الاشتىڭ كوزىن قۇرتقان
كىلەڭ تەكسىز قۇل-قۇتان بيلىكتى العان.
شىندىقتى ايتسام جۇرەكتەن شىقتى زارىم،
كەششەلەرگە مەن قالاي ۇقتىرامىن؟..
سول قۇلداردىڭ ءتورتىنشى ۇرپاعى ما،
بيلىكتەگى بۇگىنگى «مىقتىلارىڭ»؟..
اۋلەكىلەر تورىمدە تايراڭداعان
شۇلدىرلەگەن تىلىنە قايران قالام!..
«قۇل جيىلىپ، باس بولماس...» دەگەن ءسوزدى
بوستان-بوسقا ايتپاعان قايران بابام!
ءبىر، ءبىر نارى قازاقتىڭ – شەت كۇندەردە،
شىڭدارىنا التايدىڭ شوكتىڭدەر مە؟
كۇننەن تۋعان كىلەڭ ەر وتقا ورانىپ،
كۇنگە ساپار شىنىمەن شەكتىڭدەر مە؟
قۇم بولعانىن كورگەندە كەكتىڭ دەمدە،
كولدەي-كولدەي كوز جاسىن توكتىڭدەر دە،
ادىلەتتىك تابا الماي التى الاشتان
كوكبورىگە اينالىپ كەتتىڭدەر مە؟...
تۋعان ۇلتتىڭ جۇرگەندە قوزعاپ ءقالىن،
قيا جولدان سان رەت وزدى اتتارىڭ.
ەل بولعانىن كورە الماي بۇل قازاقتىڭ
كەتتىڭدەر مە، ارماندا بوزداقتارىم!؟
قويار ەمەس وتپەنەن ويناعاندار،
وبىپ جاتىر، جەپ جاتىر... تويماعاندار.
سەنەسىڭ بە، ساۋساقپەن سانارلىقتاي
قازاق قامىن بۇگىندە ويلاعاندار...
قاجەت ەمەس اقىلگوي، اقىن ەلگە،
جارىماعان ۇلت بولدىق: باتىر، ەرگە!
كەلىپ الىپ بيلىككە تەكسىز قۇلدار
اڭگىر تاياق ويناتىپ جاتىر ەلگە.
سول باياعى وڭشەڭ قۇل اساپ جاتىر،
ءبىرىن-بىرى ۇرۋعا تاس اپ جاتىر...
ءدىنسىز، ءتىلسىز قۇل-قۇتان ەلدى توناپ،
ويلارىنا كەلگەنىن جاساپ جاتىر...
تالتاڭ قاعىپ قازاعىن تانىماعان
بيلىكتەگى تورەنىڭ ءبارى نادان.
قۇل-قۇتاندار – شەتىنەن جاعىمپازدار
جانە جەمقور ۋىزعا جارىماعان.
جاعىمپازدار – ەرەكشە ەلەنگەندەر،
بيلىك تۇتاس تۇرادى كەرەڭدەردەن.
ۇرى-قارى جايلاعان قازاق ءىشىن
كەلىمسەكتەر – قۇرمەتكە بولەنگەندەر.
سىزدەر باردا جاعدايىم ەرتەگى ەدى،
وكىنىشتەن بۇگىن ءىش ورتەنەدى.
وسىلاردان ۇلتىمدى قۇتقاراتىن
قايداسىڭدار، الاشتىڭ سەركەلەرى؟..
سىزدەر ەدى-اۋ ۇلتىمنىڭ ناعىزدارى،
قايداسىڭدار، الاشتىڭ ابىزدارى؟
قۇل-قۇتاندار قازاقتى قورلاپ ءبىتتى-اۋ،
شايناڭداعان اۋىزدا ساعىزدارى...
سەندەر ەڭدەر – قازاقتىڭ نامىستارى،
سەندەر ەڭدەر – ۇلتىمنىڭ نار ۇستارى!
قۇتقاراتىن قازاقتى تەكسىزدەردەن
قايداسىڭدار، الاشتىڭ ارىستارى؟..
سول ءبىر كۇندەر ەرتەگى الىستادى،
قۇل-قۇتاننىڭ بيلەگەن اۋىشتارى.
قۇتقاراتىن قازاقتى كىرمەلەردەن
قايداسىڭدار، الاشتىڭ ارىستارى؟
جۇماش كوكبورى، اقىن.
