رەسپۋبليكالىق "ءقازبىلىم" ورتالىعى ديرەكتورى اياتجان احمەتجان وتىز جاسىنا ەسەپ بەردى. بۇل تۋرالى ول الەۋمەتتىك جەلىدە جازدى. 

"ال، اعايىن مەنەن 25 جىلدىققا تارتۋ وسى بولدى...

بيىل ءوزىم 30-عا تولدىم، قازاق ەلىنە كەلگەنىمە 10 جىل! قازاق تاۋەلسىزدىگىنىڭ 25 جىلى، جەلتوقساننىڭ 30 جىلى... بۇل ارينە بەر جاعى عوي، اباي اتام ايتپاقشى، وزىمنەن ۇنەمى ەسەپ الاتىن ادام رەتىندە 30 جاسقا تولعاندا وزىمە ەسەپ بەرگىم كەلدى، تاۋەلسىزدىككە وزىمشە سىي جاساعىم كەلدى... جىلدىڭ باسىندا بۇرىننان بار ءبىراز دۇنيەمنىڭ باسىن قۇراپ، جازىپ-سىزىپ جۇرگەن دۇنيەلەرىمدى 4 كىتاپقا جيناقتاۋدى ءجون كوردىم، انە-مىنە دەگەنشە جىل اياقتالدى، جىل بويى سول قۋ بىتپەس شارۋانىڭ قامىندا جىلدىڭ سوڭىنا جىتكىزبەي بىتىرەم دەگەن 4 كىتابىم 2017-گە ءوتىپ كەتەتىندەي بولعان سوڭ جانتالاستىم، ءبىراق، امال نە، ءتورتىنشىسىن تولىق اياقتاۋعا ەنەرگيا دا ەكونوميكا دا جەتپەدى، سونىمەن تومەندەگى ۇشتىكپەن توقتادىم.

ەڭ ءبىرىنشىسى، "مىنەز (ولەڭدەر جيناعى)"
وسى 30 جاسقا دەيىنگى شابىتتىڭ تۋىندىسىن مىنەز، - دەپ بەردىم... 
سەبەبى، مەنىڭ سىرتىمنان كوپ جۇرت ءارقيلى تون پىشەدى، بىرگە ىستەيتىندەردەن اياتجاننىڭ مىنەزىمەن سىيىسا الاسىڭدار ما؟ مىنەزى وتە شاتاق قوي، - دەيتىن كورىنەدى))) ءبىراق، ماڭىمداعىلار، جاقسى تۇسىنەتىندەر وسى مىنەزىمدى جاقسى كورەدى ءھام قۇرمەتتەيدى... ءبىراق، كىتاپتىڭ تاقىرىبى بۇعان ەمەس، بيىل 150 جىلدىق تويىن الەم تويلاپ جاتقان ءاليحان اتامنىڭ "ۇلتقا قىزمەت ەتۋ بىلىمنەن ەمەس، مىنەزدەن" - دەيتىن سوزىنەن العانمىن عوي، مەن دە اتاجۇرتىما ءبىر پەندە تانىماي تاۋەكەلمەن كەلىپ وسىنشالىق كۇنگە (شۇكىرلىك) جەتۋىمنىڭ ءبىرىنشى سەبەبى سول مىنەز عوي... كىتاپ سونىڭ قۇرمەتى...

ەكىنشىسى، وسى كۇنگە دەيتىن ءبىلىم سالاسى مەن ۇرپاق تاربيەسىنىڭ ءبىراز قىرىنا ۇڭىلدىك، الەمدىك ءبىلىمدى دە الىمىزشە زەرتتەدىك، ءار جەردە جاريالادىق، سول ماقالالاردىڭ باسىن قۇراپ "ۇلت بولام دەسەڭ..." - دەپ بەردىك...
ارينە، ۇرپاق ۇلتتىڭ بولاشاعى، بولاشاققا دۇرىس باعىت بەرۋ ۇلتتىڭ بولاشاعىن انىقتاسا كەرەك، ءبىز ۇلت بولىپ ماڭگىلىك ەلدە ماڭگى تۇرماق ءۇشىن نە ەتپەك كەرەك، وزىمىزشە پايىمداپ كوردىك.... ول سونىڭ قۇرمەتى...

ءۇشىنشىسى، مەنىڭ سۇيىكتى ءپانىم حيميا. ءاربىرىمىز ماقتانعاندا ەلىمىزدىڭ جەرىمەن، جەر استى بايلىعىمەن ماقتانامىز، ال، ونىڭ يگىلىگىن كورمەك ءۇشىن حيميانى تىرىلىتپەسەك باسقانىڭ ءبارى دالباسا، ۇستاعاننىڭ قولىندا كەتەرى انىق، ال حيميانىڭ ىرگەتاسى مەكتەپتە 8-سىنىپتا قالىپتاسادى. مىنە، ءۇشىنشى كىتاپتى سول 8-سىنىپتىڭ وقۋشىلارىنا ارنادىق، ويىمىز بالالاردىڭ حيمياعا بۇرۋ، قازاق ۇلتىنان بولاشاق قانىش ساتبايەۆتار مەن بۋكەتوۆتاردى، ينجنەرلەردىڭ قالىپتاسۋىنا ءۇن قوسۋ... 
بۇل وسىنىڭ قۇرمەتى، "حيميادان 8-سىنىپ ەسەپتەرى مەن جاتتىعۋلارى جيناعى"

ءتورتىنشىسى، قازاقتىڭ ءار بالاسى دارىندى، ءار بالاسى تالانتتى سول تالانتتىلاردى تانۋ مەن پاندىك وليمپيادالارعا باۋلۋدىڭ ادىستەمەسى ەدى... ونىڭ 80%-ى دايىن، امال جوق، ول كەلەشەكتىڭ ەنشىسىنە قالدى، بيىلعا ەنەرگيا دا، ەكونوميكا دا قالعان جوق)))

سونىمەن 30 جاستا بۇزساق دەگەن وردامىز وسىنداي-اق بولدى، ءوزىم دە تىرلىك پەن شىعارماشىلىقتى قاتار الام دەپ شارشاعان سياقتىمىن... ونىڭ ۇستىنە كۇندە 6-7 ساعات توقتاماي ساباق سويلەۋ كەرەك... ەندى نە قالعان ءبولىمدى جازۋ كەرەك، نە ءسال تىنىعۋ كەرەك)))"

وقىرمان نازارىنا تانىستىرا كەتسەك، احمەتجان اياتجان –  قازاقستان رەسپۋبليكاسى ءبىلىم جانە عىلىم ءمينيسترىنىڭ «قۇرمەت» گراموتاسىنىڭ يەگەرى،  جوعارى ساناتتى حيميا ءپانى ءمۇعالىمى، حيميا عىلىمدارىنىڭ ماگيسترى، ءقازبىلىم (kazbilim.kz) پورتالىنىڭ باس رەداكتورى، اقىن. بلوگەر. 1986 جىلى 18 شىلدەدە قحر، ش ۇ ا ر، مۇڭعۇلكۇرە اۋدانى، اعاياز اۋىلىندا تۋىلعان.

2011 جىلى ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ جاراتىلىستانۋ عىلىمدار فاكۋلتەتىندە حيميا باكالاۆرىن تامامداعان؛

2015 جىلى ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىندە وقۋىن جالعاستىرىپ،  حيميا عىلىمدارىنىڭ ماگيسترى بولدى.

وقۋشىلارى وبلىستىق، رەسپۋبليكالىق، حالىقارالىق وليمپيادالاردىڭ جەڭىمپازى؛

رەسپۋبليكالىق، وبلىستىق، قالالىق اقىندار ايتىسى جەڭىمپازى؛

رەسپۋبليكالىق، وبلىستىق، قالالىق ءمۇشايرالار جەڭىمپازى؛

2010 جىلى «ەركىمە كونشى، ەي، ءومىر» اتتى جىر جيناعى جارىق كورگەن؛

عىلىمي – ساراپتامالىق جانە پۋبليسيستيكالىق ماقالالارى، ولەڭدەرى مەرزىمدى، مەرزىمسىز باسىلىمداردا ۇزدىكسىز جاريالانىپ تۇرادى؛