جاقىن ارادا «قامشى» پورتالى داعىستانداعى ايەلدەردىڭ سۇندەتكە وتىرعىزۋى جايلى جاريالاعان بولاتىن.  ول ماتەريالدا قىزداردىڭ دەلىتكىلەرىن كەسىپ، سۇندەتكە وتىرعىزاتىنى جايلى ءسوز قوزعالعان. بۇل ءداستۇر سۋمادين، بوتليح، سۋنتين، بەجتين اۋداندارىنداعى تاۋلى ايماقتاردا ءالى دە كەزدەسەتىن كورىنەدى. قىزدار ءۇش جاسقا دەيىن بۇل وتادان ءوتۋ كەرەك ەكەن، سيرەك جاعدايدا 12 جاسقا دەيىن. مۇنداي وتا ءتۇرى قىزدار مەن ايەلدەردىڭ قۇقىعىنا قول سۇعۋشىلىق بولىپ تابىلاتىنى جايلى  دا ايتىلعان بولاتىن. ويتكەنى قىزداردى سۇندەتتەۋ اۋرۋحانالاردا ەمەس، كوبىنە جاسىرىن جاسالاتىندىقتان ارتى قابىنۋ مەن قانسىراۋعا ۇلاسادى. الايدا بۇل تاجىريبەدەن وتكەن قىزداردىڭ پسيحيكاسىندا اۋىر ءىز قالعانى جايلى، سترەسسكە شالدىققانى جايلى ماقالامىزدا ايتىلادى. وسى تاقىرىپ بويىنشا پىكىر بىلدىرگەن سولتۇستىك كاۆكازداعى مۇسىلمانداردىڭ ۇيلەستىرۋ ورتالىعىنىڭ باسشىسى يسمايل بەردييەۆ رەسەيدەگى بارلىق ايەلدى سۇندەتكە وتىرعىزۋعا ۇندەدى.

«الەمدە جەزوكشەلىك، ويناس بولماۋى ءۇشىن بارلىق ايەلدى سۇندەتكە وتىرعىزۋ كەرەك»، – دەپ مالىمدەدى مۋفتي «ينتەرفاكسكە» بەرگەن سۇحباتىندا. ول داعىستاننىڭ كەيبىر ايماقتارىندا بۇل ءداستۇر ساقتالعانىن ايتتى. وعان قوسا، بەردييەۆتىڭ سوزىنشە، يسلام قىزداردى سۇندەتكە وتىرعىزۋدى جاقتامايدى، الايدا ايەلدەردىڭ سەكسۋالدىعىن تومەندەتۋ كەرەك ەكەن.  – ەگەر بۇل بارلىق ايەلدەرگە قولدانىلعاندا ءتىپتى كەرەمەت بولار ەدى. قۇداي ايەلدەردى بالا تۋۋعا جانە ولاردى تاربيەلەۋ ءۇشىن جاراتتى. ال، سۇندەتتەلۋدىڭ وعان ەشقانداي قاتىسى جوق. ايەلدەر بۇدان بالا تۋۋىن توقتاتپايدى. ال، كەرىسىنشە بۇزىلعاندىلىق ازاياتىن ەدى»، – دەپ مۋفتي ءسوزىن قورىتىندىلادى.