بۇگىن ق ر ۇلتتىق ەكونوميكا ءمينيسترى قۋاندىق بيشىمبايەۆ قىزمەتىنەن كەتتى، - دەپ حابارلايدى Qamshy.kz.

مينيستر پورتفەلى تيمۋر سۇلەيمەنوۆكە بۇيىرىپتى. جاڭا ءمينيستردى مينيسترلىك ۇجىمىنا پرەمەر-مينيستر باقىتجان ساعىنتايەۆتىڭ ءوزى تانىستىرىپ كەتكەن. تيمۋر سۇلەيمەنوۆ 2010-2012 جىلدارى ق ر ەكونوميكا جانە ساۋدا ۆيسە-مينيسترى بولعان. رەسمي اقپارات بىرنەشە ۋاقىتتان سوڭ تارايدى.

قۋاندىق بيشىمبايەۆ ق ر ۇلتتىق ەكونوميكا ءمينيسترى بولىپ 2016 جىلدىڭ 6 مامىرىندا تاعايىندالعان ەدى. ارادا 8 اي وتكەننەن كەيىن قىزمەتىنەن بوسادى.

تيمۋر سۇلەيمەنوۆ 1978 جىلى 5 ساۋىردە تۋعان.

2000 جىلى پاۆلودار مەملەكەتتىك ۋنيۆەرسيتەتىن بىتىرگەن. 2002 جىلى “بولاشاق” باعدارلاماسى بويىنشا مەريلەند ۋنيۆەرسيتەتىن ىسكەرلىك اكىمشىلەندىرۋ ماگيسترى ماماندىعى بويىنشا بىتىرگەن.

2009 جىلدان باستاپ قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ ۆيسە-مينيسترى.

2010 جىلدان باستاپ 2012 جىل ارالىعىندا – قازاقستان رەسپۋبليكاسىنىڭ ەكونوميكالىق دامۋ جانە ساۋدا ۆيسە-مينيسترى.

2012 جىلعى 1 اقپاننان باستاپ – ەۋرازيالىق ەكونوميكالىق كوميسسيانىڭ ەكونوميكا جانە قارجى ساياساتى جونىندەگى القا مۇشەسى (ءمينيسترى).