قازاقستان رەسپۋبليكاسى ۇلتتىق قاۋىپسىزدىك كوميتەتىن 2001-2006 جىلدار ارالىعىندا باسقارعان نارتاي نۇرتاي ۇلى دۇتبايەۆ پەن بىرگە بىرنەشە لاۋازىمدى تۇلعانىڭ ۇستالعانى بەلگىلى بولدى، - دەپ حابارلايدى Qamshy.kz كوميتەتتىڭ باسپا ءسوز قىزمەتىنە سىلتەمە جاساپ.

«قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى مەملەكەتتىك ورگانداردىڭ ءبىرقاتار لاۋازىمدىق تۇلعالارىنا قاتىستى سوتقا دەيىنگى تەرگەپ-تەكسەرۋ جۇمىستارىن جۇزەگە اسىرۋدا.

جۇرگىزىلگەن جەدەل ىزدەستىرۋ ءىس-شارالارى بارىسىندا 2016 جىلدىڭ 26 جەلتوقسانىندا قازاقستان رەسپۋبليكاسىنىڭ قىلمىستىق كودەكسى 185-بابىنىڭ 3-بولىمىندە («مەملەكەتتىك قۇپيالاردى جاريا ەتۋ») جانە 362-بابىنىڭ 3-بولىمىندە («بيلىكتى نەمەسە لاۋازىمدىق وكىلەتتىكتەردى اسىرا پايدالانۋ») كوزدەلگەن قىلمىستاردى جاساۋعا كۇدىكتىلىگى بويىنشا دۇتبايەۆ نارتاي نۇرتاي ۇلى، حاسەن نۇرلان بولات ۇلى جانە نۇرتايەۆ ەرلان ءسۇيىمباي ۇلى ۇستالدى.

كورسەتىلگەن تۇلعالار قازاقستان رەسپۋبليكاسى قىلمىستىق-پروسەسسۋالدىق كودەكسىنىڭ 128-بابىنا سايكەس ۇقك تەرگەۋ يزولياتورىنا قامالدى.

كۇدىكتىلەردىڭ جانە ولاردىڭ تۋىستارىنىڭ تۇرعىلىقتى جەرلەرى بويىنشا تىنتۋلەر جۇرگىزىلدى، زاتتاي دالەلدەمەلەر الىندى.

تەرگەپ-تەكسەرۋ جالعاستىرىلۋدا، ونىڭ بارىسى جانە ناتيجەلەرى تۋرالى قوسىمشا حابارلانادى» دەلىنگەن ۇقك تاراتقان باسپا ءسوز حابارلاماسىندا.