كەشە ۇقك قىزمەتكەرلەرى كوميتەتتى 2001-2006 جىلدارى باسقارعان نارتاي دۇتبايەۆ پەن نۇرلان حاسەن جانە ەرلان نۇرتايەۆ دەگەن ەكى ازاماتتى ۇستاعان بولاتىن. بۇل وقيعا قوعام نازارىن اۋدارىپ، قىزۋ تالقىعا نەگىز بولدى.

دۇتبايەۆقا جانە ونىمەن بىرگە ۇستالعان ەكى ازاماتقا ازىرگە «مەملەكەتتىك قۇپيالاردى جاريا ەتتى» جانە «لاۋازىمدىق وكىلەتتىكتەرىن اسىرا پايدالاندى» دەگەن ايىپتار تاعىلىپ وتىر. تەرگەۋ ورگاندارى رەسمي حابارلامادان باسقا، اتالعان ءىستىڭ ءمان-جايىن اشىپ ايتپادى.

ن. دۇتبايەۆتىڭ ۇقك-نى بەس جىل ۋاقىت باسقارعانىن، ول جىلدارى ەلدە ساياسي ماڭىزى بار ءىرى وقيعالاردىڭ بولعانىنا قاراپ، ونىڭ تۇتقىندالۋىنان ساياسي سەبەپ ىزدەۋشىلەر دە جوق ەمەس.

ماسەلەن، دۇتبايەۆپەن بىرگە ۇقك اباقتىسىنا جابىلعان نۇرلان حاسەننىڭ 2013 جىلى قازاقستاننىڭ يتالياداعى ەلشىلىگىندە ساياسي ماسەلەلەر جونىندە كەڭەسشى بولىپ قىزمەت اتقارعانى ايتىلۋدا. سول 2013 جىلى ن. حاسەننىڭ ۇستىنەن ريم پروكۋراتۋراسى قىلمىستىق ءىس قوزعاعانى بەلگىلى بولىپ وتىر. Corriere della Sera حابارلاۋىنشا، يتاليادا قازاقستان ەلشىلىگى قىزمەتكەرىنە قاتىستى تەرگەۋ امالدارى جۇرگەن. ريم پروكۋراتۋراسى ن. حاسەندى جانە ەلشىلىكتىڭ تاعى ەكى قىزمەتكەرىن قازاقستاندىق ەكس-بانكير م. ءابلازوۆتىڭ ايەلى الما شالابايەۆانى يتاليادان قازاقستانعا ەكستراديسيالاۋ ماسەلەسىنە بايلانىستى تەرگەگەن. يتاليا پروكۋراتۋراسى قازاقستاننىڭ قۇقىققورعاۋ ورگاندارى جۇرگىزگەن بۇل وپەراسيانى زاڭسىز دەپ تانىپ، ادام ۇرلىعىمەن تەڭ دەپ باعالاعان.  كەيىن ا. شالابايەۆانىڭ قايتادان قازاقستاننان شىعىپ كەتۋىنە مۇمكىندىك جاسالعانىمەن، تەرگەۋدىڭ قالاي اياقتالعانى ازىرگە بەلگىسىز.

ن. دۇتبايەۆتىڭ ۇستالۋىن م. ابلازوۆپەن بايلانىستىرۋداعى باستى سەبەپ – وسى. ەستەرىڭىزگە سالساق، كەشە ۇستالعان ن. دۇتبايەۆتىڭ ءقازىر قاماۋدا وتىرعان مۇحتار جاكىشيەۆپەن (ەكس-بانكير م. ابلازوۆپەن دوستىق قارىم-قاتىناسى بار – رەد.) بايلانىسىنا قاتىستى ۆيدەو جاريالانعان بولاتىن.