انە-مىنە دەگەنشە، جاڭا جىل دا ەسىكتەن سىعالاپ تۇر. الەم بويىنشا تويلاناتىن بۇل مەرەكەنى ەل بولىپ كۇتەمىز، وتباسىمىزبەن جينالامىز، جىلداعى ءداستۇر بويىنشا تەلەديداردان پرەزيدەنتتىڭ قۇتتىقتاۋ ءسوزىن تىڭدايمىز. پرەزيدەنت قولىنا اققاينار قۇيىلعان بوكال الىپ، حالىققا اق جارما تىلەگىن ايتىپ،  جاڭا جىلمەن قۇتتىقتايدى. ەلباسىمىزدىڭ قۇتتىقتاۋ سوزىنەن كەيىن عانا وتباسىمىزبەن ءبىر-بىرىمىزدى قۇتتىقتاپ، مارە-سارە بولىپ جاتامىز.

الايدا جىلدىڭ 365 كۇنىندە ءدال وسى كۇنى الكوگولدى سۋسىندار كوپ ىشىلەدى ەكەن. سوندىقتان جاڭا جىلدى قارسى الساق تا، قازاقتىعىمىزدى تانىتىپ، ىشىمدىكپەن ەمەس، قىمىزبەن قارسى الساق، نۇر ۇستىنە نۇر بولار ەدى! ەلىمىز وسى ماسەلەمەن بىرنەشە جىلدار بويى كۇرەسىپ كەلەدى. ولاردىڭ ساتىلىمىنا شەكتەۋ قويىپ، قوعامدىق ورىنداردا ىشۋگە، جارنامالاۋعا دا تىيىم سالدى. بۇل ءوز كەزەگىندە وڭ ناتيجەسىن دە بەرىپ ءجۇر. جاستارىمىز يسلام دىنىنە بەت بۇرىپ كەلە جاتىر. الكوگولدى ونىمدەردى تۇتىناتىنداردىڭ سانى ءبىرشاما ازايعان. ەسەسىنە ۇلتتىق سۋسىندارىمىزعا سۇرانىس ارتىپ كەلەدى. تەك قازاقستان عانا ەمەس، وعان الەم ەلدەرى دە قىزىعۋشىلىق ءبىلدىرىپ وتىر. ۇلتتىق سۋسىنىمىزدى الەمدىك برەندكە اينالدىرۋ ماقساتىندا كوپ ناسيحاتتاۋ جۇمىستارى جۇرگىزىلسە، قازاق ءۇشىن يگى ءىس بولار ەدى! ونىڭ ۇستىنە «اققا قۇداي جاق» دەگەن قازاق «اق» ءتۇستى تەك جاقسىلىق، مولشىلىقپەن بايلانىستىرادى. سوندىقتان، جاڭا 2017 جىل قازاقستاندىقتار ءۇشىن تابىستى، بەرەكەلى جىل بولسىن دەگەن نيەتپەن وسىناۋ ءۇردىستى ەلباسىمىز ءبىرىنشى بولىپ باستاپ، جاڭا جىلدا فرانسۋزدىڭ اققاينارىمەن ەمەس، قازاعىمنىڭ «اق قاينارى» قىمىزبەن قۇتتىقتاسا ەكەن دەگەن جاڭا جىلدىق تىلەك بار.

بارلىقتارىڭىزدى كەلە جاتقان جاڭا جىلدارىڭىزبەن قۇتتىقتاي وتىرا، كەلەر جىل – مولشىلىق  جىلى بولسىن دەپ تىلەيمىن! ەلىمىز امان، جۇرتىمىز تىنىش بولعاي!

قامشىگەر: مارال شايحى