امەريكا بيلىگىندەگىلەر اقش-تان رەسەيلىك 35 مامىلەگەردى ەلدەن شىعارىپ، جۇمادان بەرى رەسەيدىڭ مەريلەند پەن نيۋ-يورك شتاتىنداعى ەكى مامىلەگەرلىك وكىلدىكتى جاۋىپ جاتىر، - دەپ حابارلايدى Reuters اگەنتتىگى اقش اكىمشىلىگىندەگى جوعارى قىزمەتتەگى شەنەۋنىككە سىلتەمە جاساپ.

جوعارى قىزمەتتەگى شەنەۋنىكتىڭ ايتۋىنشا، رەسەي ازاماتتارى 72 ساعات ىشىندە اقش اۋماعىنان كەتۋى ءتيىس.

ازاتتىقتىڭ جازۋىنشا، بۇل - ۆاشينگتوننىڭ اقش-تاعى پرەزيدەنت سايلاۋى كەزىندە «رەسەي ۇيىمداستىردى» دەپ سيپاتتالعان حاكەرلىك شابۋىلعا جاۋابى.

9 جەلتوقساندا The Washington Post گازەتى سرۋ رەسەيلىك حاكەرلەر تەك امەريكالىق سايلاۋ جۇيەسىنە نۇقسان كەلتىرىپ قويماي، ترامپتىڭ پرەزيدەنت سايلاۋىندا جەڭىپ شىعۋىنا كومەكتەسپەك بولدى دەپ حابارلاعان. The New York Times گازەتى حاكەرلەردىڭ رەسپۋبليكالىق پارتيانىڭ كومپيۋتەرلەرىنە دە بۇزىپ كىرگەنىمەن بۇل پارتياعا نۇقسان كەلتىرەتىندەي ەلەكتروندىق حاتتار مەن ماتەريالداردى اشكەرە ەتپەگەن دەپ جازعان.

ال ريا نوۆوستي مالىمەتىنشە، اقش پرەزيدەنتى باراك وباما ەلدەن شىعارىلىپ جاتقان مامىلەگەرلەردى «بارلاۋشىلار» دەپ اتاعان. باراك وبامانىڭ ايتۋىنشا، اقش-تاعى ەكى مامىلەگەرلىك وكىلدىك ەلدەگى جاعدايدى بارلاۋ ءۇشىن قولدانىلىپ جۇرگەن.

29 جەلتوقساندا، بەيسەنبىدە باراك وباما رەسەيگە قاتىستى جاڭا سانكسيالار تۋرالى قاۋلىعا قول قويدى. اقش قارجى مينيسترلىگىنىڭ مالىمەتىنشە، سانكسيا رەسەيدەگى التى ادام مەن بەس ۆەدومستۆو ءۇشىن ەنگىزىلىپ وتىر. ولاردى امەريكالىق جۇيەلەرگە كيبەرشابۋىل جاسادى دەپ ايىپتاپ وتىر. ايتا كەتەيىك، تىزىمدەگى التى ادامنىڭ ىشىندە باس بارلاۋ باسقارماسىنىڭ باسشىسى يگور كوروبوۆ، ءبىرىنشى ورىنباسارلار ۆلاديمير الەكسەيەۆ پەن يگور كوستيۋكوۆ، ورىنباسار سەرگەي گيزۋنوۆ، الەكسەي بەلان مەن ەۆگەنيي بوگاچيەۆ بار.

ايتا كەتەيىك، قاۋلى بويىنشا، سانكسياداعى تىزىمگە ەنگىزىلگەن جەكە تۇلعالاردىڭ مۇلىگىنە تىيىم سالىناتىن بولادى.

اقش-تىڭ فەدەرالدىق تەرگەۋ بيۋروسى (نەمەسە FBI) مەن ىشكى قاۋىپسىزدىك مينيسترلىگى پرەزيدەنت سايلاۋى كەزىندەگى كيبەرشابۋىلدار تۋرالى ەسەبىن جاريالادى. ۆەدومستۆولاردىڭ مالىمەتىنشە، كيبەرشابۋىلدارعا رەسەي ارنايى قىزمەتىنىڭ قاتىسى بار.