بۇرىنعى ەكونوميكا ءمينيسترى قۋاندىق بيشىمبايەۆقا قاتىستى تەرگەۋ شارالارى جۇرگىزىلىپ جاتىر. بۇل تۋرالى قازاقستان پرەزيدەنتى نۇرسۇلتان نازاربايەۆ ايتتى، - دەپ حابارلايدى Tengrinews.kz ءتىلشىسى اقورداعا سىلتەمە جاساپ.
ق ر سىرتقى ىستەر مينيسترلىگىنىڭ باسشىلارىمەن كەزدەسۋ بارىسىندا نۇرسۇلتان نازاربايەۆ ۇلتتىق ەكونوميكاداعى تاعايىنداۋلاردا بولىپ جاتقان وزگەرىستەر جايلى ايتتى.
"ۇلتتىق ەكونوميكا ءمينيسترى قۋاندىق بيشىمبايەۆ "بايتەرەك" حولدينگىندەگى قىزمەتىندە پايدا بولعان ماسەلەلەر ءۇشىن ۇلتتىق ەكونوميكا ءمينيسترى قىزمەتىنەن بوساتىلدى. قازىرگى ۋاقىتتا وعان قاتىستى تەرگەۋ شارالارى جۇرگىزىلىپ جاتىر. ۇلتتىق ەكونوميكا ءمينيسترى بولىپ تيمۋر سۇلەيمەنوۆ تاعايىندالدى. ول الدا قويىلعان تاپسىرمالاردى شەشە الادى دەپ ويلايمىن"، - دەدى مەملەكەت باسشىسى.
ايتا كەتەيىك، كەشە، 29 جەلتوقساندا تيمۋر سۇلەيمەنوۆ ۇلتتىق ەكونوميكا ءمينيسترى بولىپ تاعايىندالعان بولاتىن. وعان دەيىن بۇل مينيسترلىكتى قۋاندىق بيشىمبايەۆ باسقارعان بولاتىن. ول بۇل قىزمەتتە 8 اي عانا بولعان. قۋاندىق بيشىمبايەۆ ۇلتتىق ەكونوميكا ءمينيسترى قىزمەتىنە دەيىن "بايتەرەك" حولدينگىن باسقارعان.
17 قاراشادا "بايتەرەك DEVELOPMENT" اق باسشىلارى ۇستالعان بولاتىن. سىبايلاس جەمقورلىققا قارسى ءىس-قيمىل ۇلتتىق بيۋروسى "بايتەرەك DEVELOPMENT" اق باسشىسىنىڭ پارا الۋ دەرەگىنە قاتىستى سوتقا دەيىنگى تەرگەۋ جۇمىستارىن جۇرگىزگەن ەدى. تەرگەۋ بارىسىندا "بايتەرەك DEVELOPMENT" اق لاۋازىمدى جاقىپوۆ ا. (باسقارما ءتوراعاسىنىڭ ورىنباسارى)، ايتىمبەتوۆ ب. (مەملەكەتتىك-جەكەمەنشىك سەرىكتەستىك ديرەكسياسى دەپارتامەنتىنىڭ باسشىسى) جانە سارييەۆ ع. (باسقارۋشى ديرەكتور) ەسىمدى لاۋازىمدى تۇلعالار جۇيەلى تۇردە "نۇرلى جول" مەملەكەتتىك باعدارلاماسى اياسىندا جالدامالى تۇرعىن ءۇي كەشەنىن ساتۋ قىزمەتتەرىن كورسەتەتىن قۇرىلىس كومپانيالارىنان ءىرى كولەمدە پارا العانى انىقتالدى.
