تۇركياداعى قىرعىزستاننىڭ ەلشىسى يبراگيم جۋنۋسوۆ «ازاتتىققا» انكارادا وتكەن «رەسەي تۇرىكتىڭ كوزىمەن» كورمەسىندە ورىن العان قايعىلى جاعدايعا بايلانىستى سۇحبات بەرىپتى. جۋنۋسوۆ سۇحبات بارىسىندا اۋىر جاراقاتتان كوز جۇمعان مارقۇم كارلوۆتىڭ قاسىندا بولعانىن حابارلادى.

«مەن جانە وزبەكستان ەلشىسى جانە كارلوۆ مىرزا ۇشەۋمىز اڭگىمەلەسىپ تۇردىق. قاسىمىزدا اينالشاقتاپ ءبىر جىگىت ءجۇردى. مەن ونى كۇزەت قىزمەتكەرى دەپ ويلاپ قالدىم. كارلوۆقا ءسوز بەرىلگەندە ءبىز مىنبەردىڭ جانىندا قالدىق. وق جاۋدىرعان قىلمىسكەر «اللاح اكبار» دەپ ايعايلادى دا بارىمىزگە جەرگە جاتۋعا بۇيىردى. بىرەۋ مەنىڭ اياعىم شالدى دا مەن جەرگە جاتتىم. رف ەلشىسى بىزدەن 3-4 مەتر جەردە بولاتىن. قىلمىسكەر «قيمىلداماي جاتىڭدار، قوزعالماڭدار» دەپ ايعايلادى. سوسىن قايتادان اتىس باستالدى. بىردە ونىڭ وعى تاۋسىلدى. ءبىز ول كەزدە سىرتقا شىعىپ ۇلگەردىك. بىزدەن كەيىن ول تۇتقىنداردى سىرتقا شىعارۋىن قويدى.