ءبىراق ولاردىڭ تەرگەۋگە الىنعانىنا ارىپتەستەرى مەن تۋىستارى نارازىلىق تانىتتى دەپ حابارلايدى ktk.kz. ماقسات شلياشيەۆ پەن ەرمەك شوقانوۆ بۇيرىقتان ەش جالتارعان جوق دەيدى ولار. قايتا، سول كەزدە قول قۋىسىرىپ وتىرعان ايماقتاعى لاۋازىمدى تۇلعالار جازالانسىن دەيدى پروكۋراتۋرا الدىنا جينالعاندار. 

-اقتوبەدە ادىلدىك جوق. ەكى پوليسەيدى وتىرعىزعىسى كەلەدى، 8 جىلعا دەيىن. باسقالارى قايدا؟

جانۇشىرا ايقايلاعان بۇل كەلىنشەك جولداسىنىڭ جازىقسىز ەكەنىنە سەنىمدى. اقتوبەنىڭ جەرگىلىكتى پوليسيا قىزمەتىن باسقارعان كۇيەۋى ماقسات شلياشيەۆ پەن ورىنباسارى ەرمەك شوقانوۆقا جازدا سودىرلار سويقان سالعاندا قول قۋسىرىپ قاراپ وتىردى دەگەن ايىپ تاعىلعان. لاڭكەستەر اسكەري ءبولىمدى باسىپ العاندا، ءتارتىپ ساقشىلارىنىڭ ىشكە كىرىپ اتىسپاعانىنا باسشىلار كىنالى دەپ تانىلىپتى. ءبىراق مۇنىمەن ولاردىڭ ارىپتەستەرى كەلىسپەيدى. ويتكەنى، ىشكى ىستەر ءمينيسترىنىڭ بۇيرىعى بويىنشا جەرگىلىكتى پوليسيا قىزمەتىنە تەك سول نىساندى قورشاپ، تۇرعىنداردى جولاتپاۋ جۇكتەلگەن ەكەن.

نۇرعالي قاناتوۆ، پوليسيا قىزمەتكەرى:

-سول جەرگە ادام جىبەرمەۋىمىز كەرەك بولدى.  ءارى قاراي ىشكى ىستەر دەپارتامەنتىنىڭ باستىعى بار، ورىنباسارى بار وسىلار قيمىلداۋ كەرەك.

وبلىستىق پروكۋراتۋرا الدىنا جينالعان الپىستاي ادام قىلمىستىق ءىستىڭ جارتى جىل وتكەندە قوزعالعانىنا دا كۇماندانىپ وتىر. ايتۋلارىنشا، تەرگەۋشىلەر ايماقتاعى ۇلتتىق قاۋىپىسىزدىك جانە ىشكى ىستەر دەپارتامەنتتەرى باسشىلارىنىڭ باسقا ايماققا قىزمەت اۋىستىرۋىن كۇتكەن كورىنەدى.

سانسىزباي جۇگىنىسوۆ، اقتوبە قالاسىنىڭ تۇرعىنى:

-تۇيەمەن تۇيە سۇيكەنسە ورتاسىندا شىبىن ولەدى دەيدى. بۇل ورتاسىندا جۇرگەن شىبىندار. بۇل كۇش قۇرىلىمدارىنىڭ قىرقىسۋى. ەگەر كىنالىلەردى ىزدەيتىن بولسا كنب قايدا قارادى؟

ايقايدى ەستىپ، وبلىستىق ىشكى ىستەر دەپارتامەنتى باستىعىنىڭ ورىنباسارى دا كەلدى. تەك، ارىپتەستەرىنە قولداۋ ءبىلدىرۋ ەمەس، جينالعان جۇرتتى تاراتۋ ءۇشىن جەتكەن ەكەن.

قانىبەك جاقسىعالييەۆ، اقتوبە وبلىستىق ءىىد باستىعىنىڭ ورىنباسارى:

-بارىمىزگە دە ارىپتەس قوي. حالىق جينالعان جەرگە قوعامدىق ءتارتىپتى بۇزباۋدى سۇرايمىن. تاراڭىزدار.

ەسىگىنىڭ الدىنا جينالعاندارعا ءمان-جايدى پروكۋرورلار دا اشىپ ايتپادى. تەك تەرگەۋدى جۇرگىزىپ جاتقان سولار دەپ، باس پروكۋراتۋراعا سىلتەدى.

جەرگىلىكتى پوليسيا قىزمەتىنىڭ قوس باسشىسى تەرگەۋ كەزىندە قاماۋعا الىنبايتىن بولدى. ولاردى كەپىلمەن بوساتقان. ول ءۇشىن ماقسات شلياشيەۆ كولىگىن تىكسە، ورىنباسارى ەرمەك شوقانوۆ باعالى مۇلكى بولماعاندىقتان بالدىزىنىڭ تەمىر تۇلپارىن سۇراپ العان.