قازاقستان رەسپۋبليكاسى سيريا اراب رەسپۋبليكاسىنىڭ حالقىنا 500 تونناعا جۋىق ۇن، ەت كونسەرۆتەرى، كۇرىش، ماكارون مەن شاي مولشەرىندەگى گۋمانيتارلى جاردەمىن جەتكىزدى دەپ حابارلايدى ق ر ءسىم باسپا ءسوز قىزمەتى.

گۋمانيتارلى جۇك سيريالىق تارتۋس پورتىنا رەسەي فەدەراسياسىنىڭ ىقپالداسۋىمەن جەتكىزىلدى. قازاقستاننىڭ يوردانياداعى ەلشىسى ازامات بەردىباي تاپسىرعان گۋمانيتارلى جاردەمدى سيريالىق تاراپتان تارتۋس پروۆينسياسى كەڭەسىنىڭ ءتوراعاسى ياسەر ديببا قابىلدادى.

قازاقستاننىڭ گۋمانيتارلى جاردەمىن قاجەتتەنگەن سيريالىقتارعا تاراتۋ سيرياعا كومەك كورسەتۋ جونىندەگى جوعارعى كوميسسيا قاداعالاۋىمەن جۇزەگە اسىرىلاتىن بولادى.

«سيرياداعى اۋقىمدى گۋمانيتارلى داعدارىستى ەسەپكە الا وتىرىپ، بۇل ەلگە گۋمانيتارلى جاردەمدى كورسەتۋ جونىندەگى شەشىمدى قازاقستان رەسپۋبليكاسى پرەزيدەنتى نۇرسۇلتان نازاربايەۆ قابىلدادى»، - دەدى ا. بەردىباي.

بۇل قازاقستاننىڭ سيريا حالقىنا كورسەتىپ جاتقان تۇڭعىش كومەگى ەمەس. 2012 جىلى بوسقىندار لاگەرلەرىندە ورنالاسقان سيريالىقتارعا گۋمانيتارلى جاردەم رەتىندە يسلام ىنتىماقتاستىعى ۇيىمى ارقىلى قازاقستان يوردانيا مەن ليۆان ۇكىمەتتەرىنە 400 مىڭ اقش دوللارىن بولگەن.

سونداي-اق، 2015 جىلعى قازاندا استانادا وتكەن سيريالىق وپپوزيسيا وكىلدەرى اراسىنداعى كەلىسسوزدەردەن كەيىن تۇركيا-سيريا شەكاراسىندا شوعىرلانعان سيريالىق بوسقىندارعا فارماسيەۆتيكالىق، ازىق-تۇلىك جانە تۇرعىن ماسەلەلەرىن جاقسارتۋ ءۇشىن سيريالىق بوسقىندارعا قازاقستان 300 مىڭ ەۋرو كولەمىندە گۋمانيتارلى جاردەم بەرۋى تۋرالى مەموراندۋمعا قول قويىلعان.