قازاقستاندا بيلىكتى ازاماتتاردى ۋاقىتشا مەكەنجايى بويىنشا تىركەلۋگە مىندەتتەيتىن زاڭ تالابىن جويۋعا شاقىرعان پەتيسيا جاريالانعان Avaaz.org سايتىنا كىرۋ شەكتەلدى. سايتتا جاريالانعان پەتيسيا اۆتورلارى ازاماتتاردى ءبىر ايدان استام ۋاقىتقا ساپار شەگىپ بارعان جەرىندە 10 كۇن مەرزىم ىشىندە ۋاقىتشا تىركەۋگە تۇرۋدى مىندەتتەيتىن زاڭ تالابىن جويۋعا شاقىرادى، دەپ حابارلايدى "ازاتتىق" راديوسى.
"ءبىز زاڭنىڭ اتالعان نورماسى ازاماتتاردىڭ ءجۇرىپ-تۇرۋ ەركىندىگىن كادىمگىدەي شەكتەيدى دەپ سانايمىز" دەلىنگەن پەتيسيادا. پەتيسيا اۆتورلارىنىڭ پىكىرىنشە، تىركەۋگە مىندەتتەۋ قازاقستان ماقۇلداعان بۇۇ-نىڭ ازاماتتىق جانە ساياسي قۇقىقتار جونىندەگى حالىقارالىق پاكتىنى بۇزادى.
Avaaz.org سايتىنىڭ قازاقستاندىق قولدانۋشىلارعا ارنالعان پەتيسيا بار پاراقشاسىنىڭ اشىلماي قالعانى تۋرالى 8 قاڭتار كۇنى كەشكە حابارلانا باستاعان. ال بۇگىن قازاقستاندا secure.avaaz.org سايتىنا قازاقستاندىق بارلىق تۇتىنۋشى كىرە الماي وتىر. پەتيسياعا قول قويعاندار سانى جەتى جارىم مىڭنان اسادى.
قاڭتاردىڭ باسىندا قازاقستاندا ازاماتتاردى ۋاقىتشا مەكەنجايى بويىنشا تىركەۋ تۋرالى كوشى-قون زاڭدارىنا ەنگىزىلگەن تۇزەتۋلەر كۇشىنە ەنگەن. ەندى تۇرعىلىقتى جەرىنەن تىسقارى جاققا ءبىر ايدان اساتىن مەرزىمگە بارعان ءار قازاقستاندىق مەملەكەتتىك باج سالىعى رەتىندە 227 تەڭگە تولەپ ءارى حالىققا قىزمەت كورسەتۋ ورتالىعىنا بارىپ ۋاقىتشا مەكەنجايى بويىنشا تىركەۋگە تۇرۋى ءتيىس. بۇل تالاپ قوناقۇيدە تۇرىپ، وزگە قالادا جۇمىس ىستەيتىن ادامدارعا دا، وزگە قالاداعى اۋرۋحانادا جاتىپ ۇزاق ەمدەلەتىن ادامدارعا دا قاتىستى. العاشقىلارىن ءقوناقۇي ورنالاسقان مەكەنجاي، ال ەكىنشىلەرىن ەمدەلەتىن ورنى بويىنشا تىركەيدى. بۇل تالاپتى ورىنداماعاندارعا جەتى اەك (ايلىق ەسەپتىك كورسەتكىش) كولەمىندە، ياعني 16 مىڭ تەڭگە ايىپپۇل سالىنادى.
قازاقستاندا بيلىككە جاقپايتىن سايتتاردىڭ بۇعاۋلانۋ نەمەسە جابىلۋ وقيعاسى بۇعان دەيىن دە بولعان. اvaaz.org قازاقستاندا تامىزدا سول كەزدەگى پرەمەر-مينيستر كارىم ءماسىموۆتىڭ وتستاۆكاعا كەتۋىن تالاپ ەتكەن پەتيسيا جاريالانعان سوڭ اشىلماي قالعان ەدى. 2014 جىلى تەڭگە ديەۆالۆاسيالانعان 11 ساۋىردە avaaz.org سايتىندا پرەزيدەنت نۇرسۇلتان نازاربايەۆقا يمپيچەنت جاريالاۋم تۋرالى پەتيسيا باسىلعان سوڭ دا قازاقستاندىق قولدانۋشىلار سايتقا كىرە الماعان. ءبىراق كەيىن سايت قايتا اشىلعان.
