پەتروپاۆلدا سىرقات سابيلەر تۋرالى اقپاراتتى پايدالانىپ، عالامتور ارقىلى ەلدەن قارجى جيناعان ادام ۇستالدى دەپ حابارلايدى ktk.kz. 20 جاستاعى اككى جىگىت وسىنداي جولمەن جارتى ميلليوننان ارتىق اقشا تاپقان. الايدا تەرگەۋشىلەر ارام پيعىلمەن تابىلعان اقشا الدەقايدا كوپ بولۋى مۇمكىن دەپ وتىر.

ءبىر جارىم جاسار الەكسەي ساۆەليەۆ پەن ونىڭ اناسىنىڭ كۇندەگى تىرلىگى وسى. جاتتىعۋ جۇمىستارىن ءبىر ساتكە دە دوعارۋعا بولمايدى. تۋعاننان سال اۋرۋىنا شالدىققان ءسابي جىلىنا ەكى رەت استانادا تەگىن ەمدەلەدى. ءبىراق بۇل تىم از دەپتى دارىگەرلەر. سوندىقتان، ەكى اي سايىن رەسەيدىڭ ەكاتەرينبۋرگ قالاسىنا اتتانادى. ال وعان 800 مىڭ تەڭگە كەرەك. بۇل اقشانى جيناۋ ءۇشىن ۆلاديسلاۆا الەۋمەتتىك جەلىلەردە ۇندەۋ تاستاعان. قايىرىمدى جاندار جەتەرلىك. ءبىراق جۋىردا عانا جىلۋ جيناۋ ىسىنە بىرەۋلەردىڭ قول سۇعا باستاعانىن بايقاپتى.

ۆلاديسلاۆا ساۆەليەۆا، پەتروپاۆل قالاسىنىڭ تۇرعىنى:

- جۋىردا الەۋمەتتىك جەلىدەگى پاراقشاما جازىلعان جانداردىڭ ءبىرى حابارلاسىپ، مەنىڭ اتىمنان وزگە بىرەۋدىڭ اقشا جيناپ جاتقانىن ايتتى. دەرەۋ سول سىلتەمە بويىنشا جالعان پاراقشانى تاۋىپ، جاعامدى ۇستادىم. وندا بالامنىڭ سۋرەتى قويىلىپ، دياگنوزى جازىلىپتى. ءبىراق ەسەپ شوت بىزدىكى ەمەس. دەرەۋ ءتارتىپ ساقشىلارىنا حابارلاستىق.

الاياق الىسقا بارمادى. قايىرىمدى جاماعاتقا ءوزىن اۋرۋ بالانىڭ اعاسىمىن دەپ تانىستىرعان ونىڭ وڭاي ولجاعا قۇنىققانى سونشا، ىستەپ جۇرگەن تەمىرجولداعى تۇراقتى جۇمىسىن دا تاستاپ كەتىپتى. ەسەسىنە، ءبىر جىلدا  جارتى ميلليون تەڭگە تابىس تاپقان.

- ۆكونتاكتە جەلىسىندە اۋرۋ بالا تۋرالى پاراقشانى تاپتىم. سونان سوڭ ءوزىم دە ءدال سونداي فەيك پاراقشا جاسادىم. سول جەرگە بارلىق اقپاراتتى سالىپ، ءوز ەسەپ شوتىمدى كورسەتتىم. وسىلايشا 500-600 مىڭداي اقشا جينادىم.

ءبىراق كۇدىكتىنىڭ سوزىنە پوليسەيلەر كۇدىكپەن قارايدى.

نۇربەك باەكين، سقو ءىىد باسپا ءسوز قىزمەتىنىڭ مامانى

-كۇدىكتىنىڭ ايتۋىنشا، ول ءۇش ناۋقاس بالاعا فەيك پاراقشالار ىستەگەن. بۇگىنگى تاڭدا ول ۇشەۋ ما، الدە تاعى دا ودان كوپ پە، وسىعان قاتىستى تەرگەۋ امالدارى جۇرگىزىلۋدە. تەكسەرۋ جۇمىستارى جۇرگىزىلىپ جاتىر. كۇدىكتىنىڭ كىناسى دالەلدەنسە ول 4 جىلعا باس بوستاندىعىنان ايرىلۋى مۇمكىن.

سوڭعى كەزدەرى قىزىلجاردا قايىرىمدى جانداردىڭ قارجىسىنا قول سۇعاتىندار كوبەيىپ بارادى. ەستەرىڭىزدە بولسا، ءبىر اي بۇرىن جاعى كەمىس بولىپ تۋىلعان الەكساندر باتورينگە ارنالعان اقشا سالاتىن جاشىكتى دە تاپا تال تۇستە دۇكەننەن ۇرلاعان. 18 جاستاعى ارامتاماق ءقازىر تەرگەۋگە الىنعان. پوليسيا بولسا، اتا-انالاردى كومەك سۇراردا ساق بولۋعا شاقىرادى.