اقش پرەزيدەنتى باراك وباما ءوزىنىڭ قوشتاسۋ سوزىندە امەريكاندىقتاردى دەموكراتيانى قورعاۋعا شاقىردى. ءسوزىنىڭ سوڭىنا قاراي كوز جاسىنا ەرىك بەردى دەپ حابارلايدى bbc.com.

ءوز سوزىندە ناسىلشىلدىك پەن ەكونوميكالىق تەڭسىزدىكتى اقش دەموكراتياسىنىڭ ەڭ  باستى ءقاۋپى ەكەنىن ايتتى.

امەريكانىڭ دەموكراتياسىنا ءقاۋىپ توندىرەتىن تاعى بىرنەشە فاكتورلاردى اتاپ ءوتتى. ونىڭ ىشىندە وباما اكىمشىلىگى بەلسەندى جۇمىس ىستەپ، ورناتقان ەرەجەلەرىنە دونالد ترامپتىڭ بەيجاي قاراۋى دا بار ەكەنىن ايتتى.

باراك وباما  الەمدىك تارتىپكە ءدىني فاناتتار مەن شەت ەلدىك اۆتوكراتيا ءقاۋىپ توندىرەتىنىن العا تارتتى.  

«رەسەي مەن جۇڭگو سەكىلدى باسەكەلەستەر ءدال وسىنداي ىقپالعا يە بولماۋى ءۇشىن، ءبىز ءوز سەنىمدەرىمىزگە ساتقىندىق جاساماۋىمىز كەرەك. سول كەزدە كىشكەنتەي كورشى ەلدەرگە تىنىشتىق بەرمەيتىن ەلگە اينالمايمىز» دەيدى وباما.

اقش پرەزيدەنتى باراك وباما چيكاگوداعى «ماككورميك-پلەيس» كونگرەسس-ورتالىعىندا ءوزىنىڭ قوشتاسۋ ءسوزىن ايتتى. ول سوڭعى ءسوزىن اق ۇيدە ەمەس، 2008 جىلى پرەزيدەنت سايلاۋى كەزىندەگى العاشقى جەڭىستەرىنىڭ كۋاسى بولعان چيكاگوداعى ورتالىقتا ايتقىسى كەلگەنىن ايتتى.

كونگرەسس-ورتالىققا باراك وبامامەن بىرگە ايەلى ميشەل وباما جانە ۆيسە-پرەزيدەنت دجو بايدەن جۇبايىمەن كەلدى.

زالعا 20 مىڭعا جۋىق ادام جينالدى. باستاپقى كەزدە ءىس-شاراعا بيلەتتەر تەگىن تاراتىلعان. الايدا وعان سۇرانىس ارتىپ، الىپساتارلاردىڭ عالامتورداعى باعاسى مىڭ دوللاردان اسىپ كەتكەن.

باراك وباما 2008 جانە 2012 جىلعى پرەزيدەنت سايلاۋىندا جەڭىسكە جەتكەندە چيكاگودا ءسوز سويلەگەن.

وباما مىنبەردەن  ايەلى ميشەلگە قاراتا سويلەپ تۇرىپ، كوز جاسىنا ەرىك بەردى:  «سوڭعى 25 جىلدا سەن تەك مەنىڭ جۇبايىم، بالالارىمنىڭ اناسى عانا ەمەس، مەنىڭ ەڭ جاقىن دوسىم بولدىڭ...جانە مەن سەنى ماقتان تۇتامىن. ەل ماقتان تۇتادى».

اقش-تىڭ العاشقى قارا ءناسىلدى 55 جاسار پرەزيدەنتى 2008 جىلى سايلاندى. ونىڭ ءىزباسارى دونالد ترامپ وبامانىڭ كەيبىر رەفورمالارىن جوياتىنىنا ۋادە بەردى.

2017 جىلدىڭ 20 قاڭتارىندا سايلانعان پرەزيدەنتتىڭ يناۋگۋراسياسى وتكەننەن كەيىن رەسمي تۇردە قىزمەتىنە كىرىسەدى.