بەلسەندىلەر اتىراۋدىڭ حقكو ۋاقىتشا تىركەۋگە نارازىلىق رەتىندە فلەشموب وتكىزدى دەپ حابارلايدى azh.kz. نارازى توپ قويدىڭ ماسكاسىن كيىپ، قولدارىنا ءتۇرلى جازبالارى بار پلاكاتتار ۇستاپ شىقتى.
«كەشە بەلگىلى بولعانداي ىشكى ىستەر ءمينيسترى قاسىموۆ كۇندەردەن شاتاسا باستادى. ول زاڭنىڭ قاشان قابىلدانعانىن شاتاسىپ ءجۇر. ادامداردىڭ وزگەرىستەردى قالاي قابىلداعانىن وزدەرىڭىز كورىپ وتىرسىزدار» دەيدى فلەشموبقا قاتىسۋشىلارىنىڭ ءبىرى قاسىم قوجانتايەۆ.
«ءبىز تاۋەلسىز قازاقستاندا تۇرامىز عوي. ەگەمەندىگىمىز قايدا ءبىزدىڭ؟! تەرروريزممەن كۇرەسىپ جاتىرمىز دەپ حالىقتى قايتا كەڭەس ۇكىمەتىنە الىپ كەلگىسى كەلەتىندەي. ءبىز زاڭعا مويىنسۇناتىن ازاماتتارمىز. ءبىراق مۇنداي زاڭدار مۇقيات قارالىپ، قولدانىسقا تولىقتاي دايىن بولعاندا عانا قابىلداۋ قاجەت. ول قازاقستاندىقتاردىڭ قالىپتى ومىرىنە ەش كەدەرگىسىن كەلتىرمەۋى كەرەك. ءبىز ازات پەرۋاشيەۆ سەكىلدى دەپۋتاتتارعا ريزامىز. سەبەبى ول قوعامنىڭ ويىن جەتكىزدى. احمەت مۇراتوۆ اششى شىندىقتى ايتتى. ءبىز بۇرىڭعى قاتەلىكتى قايتا قايتالاپ وتىرمىز. ءدال وسىلايشا جەر كودەكسىنە قاتىستى زاڭ قابىلدانىپ، حالىق نارازىلىعىن بىلدىرگەن ەدى» دەپ ءسوزىن جالعادى قاسىم قوجانتايەۆ.
