«بتا بانكى» اق باسقارماسى باسشىسىنىڭ بۇرىنعى ورىنباسارى جاقسىلىق جارىمبەتوۆتىڭ ايتۋىنشا، وسىدان 8 جىل بۇرىن باستالعان قىلمىستىق ءىس كەزىندە ۇرەي-قورقىنىش بولدى. سول سەبەپتى جارىمبەتوۆ بىردەن بوي تاسالاپ كەتتى. ال ءابىليازوۆ ءۇشىن ونىڭ ەلگە ورالعانى ءتيىمسىز بولدى.

«شىنىمدى ايتسام، مەن ءوزىم قاتتى قورىقتىم. بۇل جاقتا تەرگەۋگە تۇسكەن ادامدى قينايدى، زورلىق-زومبىلىق كورسەتەدى، ءتىپتى ولتىرەدى دەپ ايتقاننان كەيىن كەز كەلگەن ادام ۇرەيلەنەدى. ارينە، ءابىليازوۆتىڭ ءوزى شوقتى كوسەپ وتىردى. وعان مەنىڭ وسى جاققا كەلگەنىم ءتيىمسىز بولدى دەپ ويلايمىن. ءيا، سول كەزدە قورقىنىش بولدى. مەن وتباسىم ءۇشىن، بالالارىم ءۇشىن الاڭدادىم»، - دەيدى جارىمبەتوۆ.

ونىڭ ايتۋىنشا، باس كەزىندە ول ۇلىبريتانيادا بوي تاسالاپ ءجۇردى. ودان كەيىن ەۋروپانى كەزىپ، تۇركياعا باردى. اقشا جاعىنان ءابىليازوۆتىڭ نەمەسە ونىڭ ادامدارى كومەكتەستى. وعان قوسا، جارىمبەتوۆتىڭ ءوز جيناقتارى بولعان.

 بۇگىندە «بتا بانكى» اق باسقارما باسشىسىنىڭ بۇرىنعى ورىنباسارى ءوز كىناسىن مويىنداپ وتىر. الايدا ول قىلمىستى قاساقانا جاسادىم دەپ سانامايدى. سەبەبى سول كەزدە باسشىلىقتىڭ بۇيرىعىن ورىنداۋعا تۋرا كەلدى.

 «كەز كەلگەن ىستە نۇكتە قويعان دۇرىس قوي. ونسىز باسقا ادامدار قينالىپ جۇرە بەرەدى. بۇعان دەيىن بەيمالىم بولىپ كەلگەن دەتالداردى اشۋ قاجەت. اشىعىن ايتايىن، قازىرگى كەزدە مەن تەرگەۋگە كومەك بەرۋگە كەلىستىم. وسىنىڭ ارقاسىندا مەن بۇعان دەيىن سوتتالعان ازاماتتاردىڭ، شەتەلدە ءالى كۇنگە دەيى قاشىپ جۇرگەندەردىڭ جازاسىن جەڭىلدەتۋگە ءوز سەپتىگىمدى تيگىزەمىن دەپ سەنەمىن»، - دەپ اتاپ كورسەتتى جارىمبەتوۆ.

ايتا كەتەيىك، بۇگىن جارىمبەتوۆ ارنايى باسپا ءسوز ءماسليxاتىن وتكىزىپ، وزىنە قاتىستى تارالىپ جاتقان الىپ-قاشپا اڭگىمەلەردى جوققا شىعاردى. ونىڭ سوزىنە قاراعاندا، قاڭتاردىڭ 17ء-سى كۇنى تۇركيانىڭ شەكارا قىزمەتى ونى جالعان تولقۇجاتپەن جۇرگەنى ءۇشىن ۇستاعان بولاتىن.

 «پوليسيا ۋچاسكەسىندە وتىرعاندا مەن ءوزىمنىڭ شىن ءاتى-جونىمدى ايتتىم. سوسىن ىستانبۇلداعى قازاقستاننىڭ رەسمي وكىلدىلىگىنە xابارلاسۋدى ءوتىندىم. ءسويتىپ، قاڭتاردىڭ 20-سى كۇنى مەنى قازاقستانعا ەكستراديسيالادى. ەرتەسىندە مەنى تەرگەۋ اباقتىسىنا قامادى. وسى ۋاقىتقا دەيىن سوندا بولدىم. ماعان ەشقانداي زورلىق-زومبىلىق پەن قىسىمنىڭ جاسالماعانىن مالىمدەگىم كەلىپ وتىر»، - دەيدى ول.