ساۋديا ەلشىسى: «ەردوعاننىڭ پرەزيدەنتتىككە ءوتۋىن قولداعان ءبىزبىز. توڭكەرىستەن كەيىن دە قولدادىق. الايدا، ول سيرياداعى بار ىلگەرىلەۋشىلىكتى كەرى كەتىرىپ قيانات جاسادى. ءوز مۇددەسى ءۇشىن رەسەي مەن يزرايلگە جاقىندادى» دەدى.

ساۋد ارابيانىڭ انكاراداعى توتەنشە جانە وكىلەتتى ەلشىسى دوكتور اديل يبن سارراچ مارداد تۇركياعا قاتىستى BBC-گە بەرگەن سۇحباتىندا،  ەردوعاندى قاتاڭ ايىپتايتىنىن ءبىلدىردى.  مارداد تۇركيانىڭ مۇددەلەرى مەن ىشكى ساياسي داعدارىستان قاشۋ ءۇشىن رەسەي مەن يزرايلگە جاقىنداعانىن ايتتى.

وكىلەتتى جانە توتەنشە ەلشى مارداد پرەزيدەنتتىك تاققا كەلۋ ءۇشىن ەردوعاندى قولداۋشىنىڭ ءبىرى ساۋد ارابيا بولعانىن، توڭكەرىستىڭ ءىزىن الا تۇركيانى جانە تاڭدالعان ۇكىمەتتى العاشقى بولىپ قولداعان ەلدەردىڭ اراسىندا ساۋد ارابيا بولعانىن، بۇگىنگى كۇنگە دەيىن قولداپ كەلگەندەرىن ءبىلدىردى.

ەلشى تۇركيانىڭ 6 جىل بۇرىن سيرياداعى حالىق كوتەرىلىسىن قارۋلى وپپوزيسياعا اينالدىرعانىن ءارى سيريا پرەزيدەنتىنە قارسى وپپوزيسيالىق توپتارعا قۇشاق اشقانىن، كەيىننەن ەردوعاننىڭ ءار جولى «اساد كەتۋى ءتيىس» دەگەن ۇستانىمىن سيرياداعى داعدارىستىڭ شەشىمىنىڭ ءبىر عانا جولى رەتىندە جاريا ەتكەنىن ءبىلدىردى.

ەردوعان مەن ادىلەت جانە دامۋ پارتياسى اينىپ كەتتى

ەلشى ەردوعاننان باستاپ تۇرىك ۇكىمەتىنىڭ كەزىندە «قىزىل سىزىق» دەپ قابىلداعان اسادتىڭ كەتۋى ۇستانىمىنان سوڭعى ۋاقىتتاردا اينىپ شىعا كەلگەنىن ءبىلدىردى. ساۋد ەلشىسى تۇركيانىڭ سيرياداعى وسى ۇستانىمىنداعى وزگەرىستىڭ وسمانلى كەزەڭىنەن بەرى تۇرىكتەردىڭ مۇددەلەرى وزگەرگەندە اراب ەلدەرىنە قارسى جاسالعان قياناتتىڭ ءبىر باسقا ءتۇرى ەكەنىن العا تارتتى.

ءسوز ءتۇيىنى رەتىندە ەلشى مارداد سيرياداعى بەيبىت تۇرعىنداردىڭ ءولىمى، ميلليونداعان ادامنىڭ باسپاناسىز قالۋى جانە بوسقىندار ءۇشىن تۇركيا جاۋاپتى ەكەنىن ءبىلدىردى.

بۇدان كەيىن ىلە-شالا دۋبايدان دا ەردوعانعا قارسى نارازىلىق كەلدى.

دۋباي پوليسيا باسشىسى داحي قالفان ەردوعاندى سيريا ساياساتى ءۇشىن قاتتى ايىپتادى. ەردوعاننىڭ سيريانى تىپ-تيپىل ەتۋگە اتسالىسقانىن ايتتى.

دۋباي پوليسيا باسشىسى: ەردوعان بۇنى ىستەمەي تۇرىپ وعان ايتتىق. وپپوزيسيانى اسادقا قارسى جينادى جانە ولاردى اسادقا قارسى ايداپ سالدى. ەندى وپپوزيسيانى رەجيم كۇشتەرىنە قۇربان ەتىپ ۇسىنۋدا. ەردوعان سيريانى قيراتۋعا اتسالىستى.

CNN Arabic- تە جاريالانعان حابار بويىنشا بىرىككەن اراب امىرلىكتەرىندە مەيلىنشە ىقپالدى بيۋروكرات بولعان دۋباي پوليسيا باسشىسى داحي قالفان تۆيتتەردەگى پاراقشاسىندا ەردوعاندى سىنادى. قالفان تۆيتتەردە «ەردوعان وپپوزيسيانى اسادقا قارسى جيناپ، اسادقا قارسى ايداپ سالدى. ەندى ءۇمىت ۇزگەننەن كەيىن وپپوزيادان قۇتىلعىسى كەلۋدە. وپپوزيسيانى رەجيم كۇشتەرىنە قۇربان رەتىندە ۇسىنۋدا. بۇل قاتەلىكتى ىستەمەۋىن ءبىز بۇرىنىراقتا وعان ايتقانبىز…» دەپ جازدى.

ەردوعاننىڭ سيريادا بولعان ادامزات تراگەدياسىن جاساۋعا اتسالىسۋشىلاردىڭ ءبىرى ەكەنىن ايتقان پوليسيا باسشىسى بىلاي دەدى: «ەردوعان وپپوزيسيانى سەندەلەتتى، حالقىن اۋا كوشتىردى جانە سيريانىڭ قيراۋىنا ورتاقتاستى. اششى شىندىق وسى. ەردوعان مۇسىلمان باۋىرلارىنىڭ ارباۋىنا تۇسكەن قۇربان» دەگەن.

بەرىك مىڭجاسار