قازاقستاندىق ءانشى ديماش قۇدايبەرگەنوۆ حۋنان تەلەارناسىنىڭ قىتايدىڭ كوكتەم مەرەكەسىنە (قىتايدىڭ جاڭا جىلى) ارنالعان كونسەرتكە قوناق بولىپ ونەر كورسەتتى.

ديماش ساحناعا: «اسسالاۋماعالايكۋم اعايىن، جاڭا جىل قۇتتى بولسىن!»، - دەپ شىقتى. سونداي-اق، «وپەرا 2» انىمەن قىتايلىق كورەرمەندەردى تاعى دا ءتانتى ەتىپ، مەرەكەلىك كوڭىل-كۇي سىيلادى.  

قىتايدىڭ كونە كۇنتىزبەسى بويىنشا ءار جىل سايىن جۇڭگو جاڭا جىلى 12 قاڭتار مەن 19 اقپان ارالىعىندا كەلەدى. وسى ۋاقىت جىل باسىنداعى جاڭا تۋعان ايعا سايكەس كەلەدى. گرەگوريان كۇنتىزبەسى ەنگىزىلگەننەن كەيىن بۇل مەرەكەنى باتىستىق جاڭا جىلدان اجىراتۋ ءۇشىن «كوكتەم مەرەكەسى» دەپ اتايتىن بولدى.  جۇڭگو ءداتۇرسى بويىنشا بۇل جۇڭگو حالقىنىڭ ەڭ ۇلكەن مەرەكەسى. مەرەكە باستالعان كۇندەرى بۇكىل قىتايدا ءوندىرىس ورىندارى توقتاپ، ەل ىشىندە ءولى تىرشىلىك ورنايدى. بارشا جۇڭگو حالقى مەرەكەنى ءوز وباسىلارىندا قارسى الادى.

قانداسىمىز ديماش حۋنان تەلەارناسىنىڭ «Singer2017» ءان بايقاۋىنا قاتىسىپ جاتىر. ول بۇعان دەيىن بايقاۋدىڭ الدىڭعى ەكى كەزەڭىندە دە ءبىرىنشى ورىن العان ەدى. ونىڭ ونەرىنە قىتايلىق تىڭدارماندار ىستىق ىقىلاسپەن قولداۋ كورسەتىپ جاتىر. وعان Sina Weibo ميكروبلوگىنا جازىلۋشىلارىنىڭ سانى 1 ميلليون 200 مىڭنان اسىپ كەتكەنى دالەل. 

ەسكە سالايىق، ديماش قۇدايبەرگەنوۆ ۆيتەبسكتە وتكەن "سلاۆيان بازارى-2015" حالىقارالىق بايقاۋىندا جەڭىمپاز اتانعان ەدى. ول، سونىمەن قاتار، "شىعىس بازارى" جانە "مەيكين ازيا" بايقاۋلارىنىڭ گران-پري يەگەرى.