ايشا ورازبايەۆا اقش-قا 2017 جىلدىڭ 27ء-شى ساۋىرىنە دەيىن كىرۋگە تىيىم  سالعان جەتى ەلدىڭ مۇسىلماندارىنا قولداۋ ءبىلدىردى دەپ حابارلايدى Slippedisc.

قازاقستاندىق سكريپكاشى ايشا ورازبايەۆا دونالد ترامپتىڭ كوشى-قونعا قاتىستى بۇيرىعىنان كەيىن دەبيۋتتىك كونسەرتىن اقش-تا وتكىزۋدەن باس تارتتى.

ايشا پيانينوشى دجوزيەۆ حيۋستونمەن وسى دەمالىستا اقش-تا كونسەرت وتكىزۋى  كەرەك بولعان.

«مۇسىلمان ەلدەرى ازاماتتارىنىڭ ەلگە كىرۋىنە تىيىم سالىپ، حالىقارالىق دجون كەننەدي اۋەجايىندا ۆيزاسى بار 7 بوسقىندى ۇشاقتان ءتۇسىرىپ، يران ازاماتىن گرين-كارتا بولعانىنا قاراماستان  اقش-قا كىرۋىنە تىيىم سالعانىن وقىعاندا اقش-تا كونسەرتىمدى وتكىزبەيمىن دەپ شەشتىم. The Guardian گازەتىن وقىپ وتىرىپ، اقش-قا بارا المايمىن دەگەن وي كەلدى» دەيدى ايشا ورازبايەۆا.

ترامپتىڭ بۇيرىعى بويىنشا اقش-قا – يران، يراك، ليۆيا، سومالي، سۋدان، سيريا جانە يەمەن ەلدەرىنىڭ ازاماتتارى كىرە المايدى.

قازاقستاندىق سكريپكاشى كونسەرتتى بولدىرماي تاستاعانى تۋرالى اقپاراتتى مۋزىكالىق سىنشى جانە كونسەرت ۇيىمداستىرۋشىسى پيتەر مارگاسك تاراتقان. ول سكريپكاشىنى تۇسىنەتىنىن جانە قولدايتىنىن جەتكىزگەن. سونىمەن قاتار، كونسەرتتىڭ بولمايتىنىنا قىنجىلاتىنىن دا ايتتى.

ايشا ورازبايەۆا لوندوندا «بولاشاق» باعدارلاماسى بويىنشا وقىعان. قازىرگى تاڭدا ول كلاسسيكالىق مۋزىكانىڭ جاڭادان شىعىپ كەلە جاتقان جۇلدىزى بولىپ ەسەپتەلەدى. ونىڭ كونسەرتتەرى يسپانيا، يتاليا، اۆتريا جانە ۇلىبريتانيادا وتەدى.