اقش-تىڭ جاڭا پرەزيدەنتى دونال ترامپتىڭ جۇرگىزىپ وتىرعان ساياساتىنا قاتىستى شەت ەلدە جۇرگەن قازاقستاندىق جولداس ورىسبايەۆ اتتى ازامات ءوزىنىڭ Facebook الەۋمەتتىك جەلىسىندەگى پاراقشاسىندا جازادى. ترامپتىڭ قابىلداعان جارلىقتارى مەن Green Card جوباسىنىڭ اقش حالقىنا قالاي اسەر ەتىپ جاتقاندىعى جايلى ساراپتاما جۇرگىزىپ، يسلام رەسپۋبليكالارىنا قاتىستى شىعارىپ وتىرعان شەشىمدەردىڭ ماڭىزىن جانە اقش-تا تۇراتىن وزگە ۇلت وكىلدەرىنىڭ بىلدىرگەن نارازىلىقتارىنىڭ ءمانىن ايتا كەتەدى. سونىمەن قاتار دونالد ترامپقا دەيىنگى پرەزيدەنتتەردىڭ تاقتان قالاي كەتكەندىگى جايلى شولۋ جاساپ وتەدى.

"ترامپ اق ۇيدەن ۋاقىتىنان ەرتە كەتكەن اقش-تىڭ التىنشى پرەزيدەنتى بولۋى مۇمكىن. وسىعان دەيىن لينكولن، گارفيلد جانە كەننەدي پرەزيدەنتتىك پوستى كەزىندە اتىلىپ كەتكەن بولسا، فرانكلين رۋزۆەلت ناۋقاستانىپ، ومىردەن وتەدى. ال نيكسونعا ۋوتەرگەيت ماسەلەسىنە قاتىستى يمپيچمەنت جاريالانادى.

Anti-Obama

دونالد ترامپ ءوزىنىڭ پرەزيدەنت ستاتۋسىنداعى ون كۇندە ءبىرتالاي وزگەرىستەر جاساپ ۇلگەردى. كەلگەن كۇنى وباماعا قاسارىسىپ، جالپىعا بىردەي مەديسينالىق ساقتاندىرۋدى (تابىسى تومەن ازاماتتارعا تەگىن) جوققا شىعاردى. تاعى دا، بۇرىنعى پرەزيدەنتتىڭ شەشىمدەرىمەن كەلىسپەيتىنىن سىرتقى ساۋداداعى ءبىرتالاي كەلىسىمدەردىڭ كۇشىن جويۋمەن كورسەتتى. رەسەيمەن قارىم-قاتىناستى جاقسارتىپ، ناتو ارەكەتتەرىنە كەدەرگى كەلتىرۋى مۇمكىن. وعان كونگرەستەگى رەسپۋبليكالىقتار دا، دەموكراتتار دا قارسى بولعانىن بىلەسىز.

Anti-Mexicans

سوسىن مەكسيكامەن شەكاراعا قابىرعا كوتەرىپ، وعان كەتەتىن قارجىنى مەكسيكاعا مىندەتتەيتىنىن مالىمدەدى. ول قالاي دەيسىز بە؟ جالپى مەكسيكانىڭ اقش-قا ەكسپورت جاسايتىن تاۋارلارىنا مەجەلەنگەن سالىقتى 20 پايىزعا كوتەرىپ، سول قارجىنى قابىرعا كوتەرۋگە جۇمساماق. قازىرگى تاڭدا اقش حالقىنىڭ 35 پايىزىن ورتالىق نەمەسە وڭتۇستىك امەريكادان كەلگەن ازاماتتار قۇرايدى. ولار ترامپتىڭ ارەكەتىنە قارسىلىعىن تانىتىپ وتىر. سەبەبى ترامپ مىرزا ەلدە زاڭسىز ەڭبەك ەتىپ جۇرگەن لاتىنامەريكالىقتاردى قاتاڭ قاداعالاۋدى مىندەتتەپ وتىر.

Anti-Muslims

ترامپتىڭ وتكەن جۇماداعى جارلىعى امەريكالىقتار اراسىندا تاعى ءبىر نارازىلىق تولقىنىنىڭ پايدا بولۋىنا نەگىز بولدى. ول "تەرروريزمگە قولداۋ كورسەتىپ ءجۇر" دەگەن ايىپپەن 7 مۇسىلمان ەلىنەن كەلگەن "ساياسي قاشقىن" نەمەسە "يمميگرانتتاردى" ۋاقىتشا قابىلداماۋ (90-120 كۇن) تۋرالى قۇجاتقا قول قويدى. راسىندا Green Card پروسەسى باستالعالى بەرى تىزىمدەگى سيريا (12 587)، يراك (9 880)، سومالي (9 020)، سۋدان (1 458)، يران (3 750)، يەمەن (26) جانە ليۆيا (1) سىندى ەلدەردەن 36 722 ازامات كەلگەن. Bloomberg مالىمەتىنە وراي، ولاردىڭ ەشبىرى اقش تەرريتورياسىندا تەررورلىق ارەكەتپەن كوزگە تۇسپەگەن. سونىڭ وزىندە ترامپتىڭ تىزىمىنە ەنىپ وتىر. وعان، ارينە، وزگە دە ساياسي سەبەپتەر بار ەكەنى بەلگىلى.

پرەزيدەنت ترامپ ءدال وسى مۇسىلمان ەلدەرىنە قاتىستى بۇيرىعىن ورىنداۋعا قارسى بولعان جوعارعى سوت باسشىسىن ورنىنان الىپ تاستادى. بۇگىن وزگە ءبىر ۇمىتكەردى جوعارعى سوتقا باسشى ەتىپ تاعايىندادى.

Anti-International Employee

ودان بولەك، ترامپ اقش تەرريتورياسىندا رەسمي جۇمىس ىستەۋگە رۇقسات ەتەتىن H1B ۆيزاسىن شەكتەۋ تۋرالى ماسەلەنى كوتەردى. وعان Microsoft، Google، Facebook جانە وزگە دە High-Tech كومپانيالار قارسى ەكەنىن ءبىلدىردى. سەبەبى سيليكوندى القاپتاعى كوپتەگەن كومپانيالاردا شەتەلدىك باعدارلاماشىلار ەڭبەك ەتەدى. ترامپ بۇل شەشىمىن اقش ازاماتتارىن جۇمىسپەن قامتۋ ماقساتىندا جاسايتىنىن مالىمدەدى.

Anti-Immigrants (Green Card)

امەريكا قۇراما شتاتتارىن يمميگرانتتار قۇرعان. سوڭعى ءۇش عاسىردا الەمنىڭ تۇكپىر-تۇكپىرىنەن ۇلتى مەن ءناسىلى باسقا بولعان ازاماتتار كوشىپ كەلگەن. وسى ۇدەرىستى جالعاستىرۋ ماقساتىندا، Green Card (Permanent Resident) لوتەرەياسى ۇيىمداستىرىلعان بولاتىن. ەندىگارى، كەز كەلگەن يمميگرانتتىڭ كەيسى جەكەلەي قاتاڭ تۇردە قارالاتىنىنا زاڭداستىرۋ كەرەك ەكەنىن ايتىپ وتىر. وسى وزگەرىستىڭ ەنۋ مۇمكىندىگىن ەسكەرىپ، ترامپقا اقش-تاعى الىپ قالالاردىڭ اكىمدەرى بويكوت جاريالادى.

P.S. ترامپتىڭ پوستقا كەلگەنىن نەبارى 10 كۇن بولدى. راسىندا، اقش پرەزيدەنتىنىڭ شەشىمدەرىمەن كەلىسپەيتىندەر سانى كۇن سايىن ارتىپ كەلەدى. بۇل، ارينە، يمپيچمەنتكە الىپ كەلەدى. ەگەر ترامپ مىرزامەن رەسەيمەن قويان-قولتىق ارالاساتىن بولسا، وندا مىندەتتى تۇردە پوستتان ايىرىلىپ قالادى"، - دەپ جازادى جولداس.