بەلارۋسيا پرەزيدەنتى الەكساندر لۋكاشەنكو رەسەيمەن اراداعى كەلىسىمشارتتىڭ بۇزىلعاندىعىنا جانە ەكى ەل شەكاراسىنداعى ىس-ارەكەتتەرگە قاتىستى رەسەيدى ايىپتى دەپ تاپتى دەپ حابارلايدى tvrain.ru، مالىمەتتىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.

بۇل جايىندا لۋكاشەنكو پرەسس-كونفەرەنسيادا مالىمدەمە جاساعان. ول مۇناي-گاز قاقتىعىسىنا بايلانىستى شەكارالىق اۋداندارعا قاتىستى شەشىم قابىلدادى.

«مەملەكەتارالىق كەلىسىمشارتتار مەن كەلىسىمسوزدەر بولادى. سول نارسەلەردى قۇزىرەتى مىقتى ءبىر مينيستر كەلەدى دە، ءوزىنىڭ ءبىر بۇيرىعىمەن – 801، 802، 803 – بارلىعىن  بۇزىپ تاستاي سالادى. مەن، ءتىپتى، سول بۇيرىقتاردىڭ سانىن اتاپ وتىرمىن»، - دەپ مالىمدەدى لۋكاشەنكو.

رەسەيمەن اراداعى قارىم-قاتىناستىڭ ۋشىعۋىنا «بەلارۋسيا باتىسقا ءوتىپ كەتۋ مۇمكىندىگى» سەبەپ بولعان جانە بۇل جاعدايعا رەسەي اسا ساقتىقپەن قاراپ وتىر. سونىمەن قاتار، لۋكاشەنكونىڭ ايتۋىنشا، رەسەي بيلىگى ءتۇرلى ساياسي كۇشتەردەن تۇرادى جانە ولاردىڭ پوزيسيالارى مەملەكەت بيلىگىنىڭ پىكىرىمەن سايكەس كەلەدى. بەلارۋسيا پرەزيدەنتى: «سوڭعى كۇندەرى جاعداي تىم ۋشىعىپ بارا جاتىر»، - دەپ ايتا كەتتى.

لۋكاشەنكو: «رەسەيمەن اراداعى مۇناي-گاز قاقتىعىسى – ءبىزدى مازاقتاعاندارى. تاۋەلسىزدىك، تۇراقتىلىق پەن ءبىزدىڭ تاريحىمىز – ءبىز ءۇشىن مۇنايدان دا قىمبات. ارتىق ءسوز ايتىپ قويمايىن دەپ مىنا جەردە ءوزىمدى ارەڭ ۇستاپ تۇرمىن، سەبەبى سەماشكونىڭ (بەلارۋسيانىڭ ۆيسە-پرەمەرى) ءتۇرى بوزارىپ كەتكەن شىعار. بەلارۋسيا رەسەيدىڭ مۇنايىنسىز-اق كۇن كورە الادى»، - دەيدى.

سونىمەن قاتار، لۋكاشەنكونىڭ ايتۋىنشا، رەسەيلىك مينيسترلەر كەلىسىم ورناتۋعا كەلگەن بەلارۋسيا ەلىنىڭ ادامدارىنا پىسقىرىپ تا قارامايدى، ولارعا تۇكىرگەندەرى بار ەكەن.

«مينيسترلەردىڭ ءبىزدى مەنسىنبەيدى، تۇكىرگەندەرى بار. ەگەر مۇنداي قارىم-قاتىناس جالعاسا بەرەتىن بولسا، ءبىز ەندى كەلمەيمىز! پۋتينگە ءدال وسىلاي ايتتىم»، - دەپ ايتتى لۋكاشەنكو. قابىلداۋ بولىمىندە بەلارۋسيا دەلەگاسياسى كۇتىپ تۇرعاندىعىن رەسەيلىك مينيستر ۇمىتىپ كەتكەن جاعدايدى مىسالعا كەلتىردى.

اۋدارعان: نازەركە لابيحان