جۇڭگو باق-تارىندا جەرلەسىمىز قاتىسىپ جاتقان حۋ نان تەلەارناسىنداعى «مەن ءانشىمىن» بايقاۋىنىڭ ءۇشىنشى اپتاسىنىڭ ناتيجەسى تۋرالى اقپاراتتار پايدا بولدى دەپ حابارلايدى «قامشى» پورتالى.

تاراعان اقپاراتقا ساي، وتانداسىمىز ديماش قۇدايبەرگەن  «The Show Must Go On» ءاندى التىنشى بولىپ ايتىپ، بايقاۋدىڭ اپتالىق ناتيجەسىندە ءۇشىنشى ورىن العان.

قىتايدا «I’m singer» جوباسىنا قاتىسىپ جاتقان ديماش بۇعان دەيىنگى العاشقى ەكى اپتادا دا ءبىرىنشى بولعان بولاتىن. ونىڭ تانىمالدىعى اياقاستى ارتىپ، الەۋمەتتىك جەلىدەگى جازىلۋشىلارى كۇرت كوبەيگەن. سونداي-اق، قىتايلار ديماش كيگەن كيىم ۇلگىلەرىن، ديماش بەينەلەنگەن زاتتاردى تانىمال ساۋدا سايتتارى ارقىلى ساتا باستاعان.

ايتا كەتەر بولساق، ديماش ەكىنشى اپتاداعى جەڭىسىنەن كەيىن الماتىعا ۇشىپ كەلىپ، ەلباسىنىڭ ءوزى قاتىسقان ۋنيۆەرسيادانىڭ اشىلۋ سالتاناتىندا ونەر كورسەتتى.

سونىمەن قاتار، وعان بايقاۋدىڭ ەكىنشى اپتاسىندا جەڭىس سىيلاعان «وپەرا 2» ءانىن ۆيتاس داۋلاپ، قىتايدا ادۆوكاتتار القاسىنا شاعىمدانىپ ۇلگەردى.

وقىرماننىڭ ەسىنە سالا كەتەر بولساق، «مەن ءانشىمىن» جوباسىنىڭ ءۇشىنشى اپتاسىنىڭ كورسەتىلىمى ەرتەڭ، سەنبى كۇنى بەيجىڭ ۋاقىتىمەن تۇنگى ون ءبىر شاماسىندا بايقاۋدى وتكىزۋشى تەلەارنانىڭ ەفيرىنەن كورسەتىلەدى.

تارالعان اقپارات راسقا اينالىپ، ديماش بايقاۋدىڭ ءۇشىنشى اپتاسىندا ءبىرىنشى ورىن الا الماسا دا، بۇل وتانداسىمىز ءۇشىن جەڭىلىس ەمەس. الدا ءالى 11 اپتاعا جالعاسقان تايتالاس بايقاۋ تۇر. وسىعان وراي «قامشى» پورتالى ءوز وقىرماندارىن وتانداسىمىز ديماشتى قولداۋعا شاقىرادى.