بەنزيننىڭ باعاسى تەڭگەنىڭ تاعدىرىنا تاۋەلدى 

كەشە سۇرانىسقا  اي-92 ماركالى بەنزينى 137-دەن 139 تەڭگەگە، ال اي-95 بەنزينى 150 تەڭگەگە دەيىن كوتەرىلدى. رەسمي مالىمەتتەرگە سۇيەنسەك، ءبىر  جىلدا باعا  13،7 پايىزعا قىمباتتاعان ەكەن. ساراپشىلار 2017 جىلى  بەنزيننىڭ دە، ديزەلدى وتىننىڭ دا باعاسى قىمباتتاماسا،  ارزاندامايتىنىن ايتادى.   سەبەبى، رۋبل ديەۆالۆاسياعا ۇشىراۋى مۇمكىن.  ال بۇل ءوز كەزەگىندە رەسەيدەن كەلەتىن تاۋارلاردىڭ، سونىڭ ىشىندە بەنزيننىڭ دە قىمباتتايتىنىن بىلدىرەدى.  

ساراپشى عالىم قۇسايىنوۆتىڭ ايتۋىنشا، بەنزيننىڭ قىمباتتايتىنى  بۇرىننان كۇتىلگەن بولاتىن.  «بەنزيننىڭ قىمباتتاۋىنىڭ 3  نەگىزگى  فاكتورى  بار. ءبىرىنشىسى  تەڭگەنىڭ  رۋبلگە  شاققانداعى قۇنىنىڭ  قۇلدىراۋى.  قازىرگى تاڭدا ۆاليۋتا نارىڭىندا 1 رۋبل 5،4-5،6 تەڭگەنىڭ ارالىعىندا  ساۋدالانىپ جاتىر.  سايكەسىنشە،  رەسەيدەن ساتىپ الاتىن تاۋارلارىمىز، ونىڭ ىشىندە بەنزين دە قىمباتتاۋدا. ەكىنشى فاكتور - رەسەي  فەدەراسياسىنداعى  جانارماي باعاسىنىڭ ءوسۋى.ءبىزدىڭ ىشكى  نارىقتىڭ  30-35 پايىزعا دەيىن كورشىنىڭ سۇيىق وتىنىنا تاۋەلدى. سول سەبەپتى  رەسەيدەگى بەنزين  باعاسى ءبىزدىڭ نارىق ءۇشىن  ينديكاتور بولىپ وتىر.  ءۇشىنشى فاكتور،  وتاندىق مۇناي وڭدەۋشى زاۋىتتاردىڭ قۋاتىنىڭ ازدىعى مەن الەمدىك نارىقتاعى مۇناي باعاسىنىڭ  قىمباتتاۋى»،- دەيدى ول.

رەسەيدەگى باعا بىزدەن جوعارى – بەنزين 36،5 پايىزعا، ديزەلدى وتىن 73،7 پايىزعا. مىسالى، سوڭعى كورسەتكىشكە جۇگىنسەك، كورشى ەلدەگى  1 ليتر بەنزين باعاسىنىڭ تەڭگەگە  شاققانداعى قۇنى 185 تەڭگەنى توڭىرەگىندە.  بۇل وتە كوپ، ءارى ەۋرازيالىق ەكونوميكالىق وداق اياسىندا شەكارالاردىڭ اشىقتىعى ايىرماشىلىقتى  ۇستاپ تۇرۋعا  مۇمكىندىك بەرمەيدى.

بەنزيننىڭ قىمباتتاۋىنىڭ باستى سەبەبى -  ەلىمىزدە  جانارماي قورىنىڭ  ازدىعى

ال ەكونوميست  سەرگەي سميرونوۆتىڭ ايتۋىنشا،  بەنزيننىڭ قىمباتتاۋىنىڭ باستى سەبەبى -  ەلىمىزدە  جانارماي قورىنىڭ  ازدىعى.  «بۇرىن   ەنەرگەتيكا  مينيسترلىگى  مۇناي  وڭدەۋشى  زاۋىتتار  مودەرنيزاسيادان وتكەننەن جىلىنا 18-18،5 ملن توننا مۇنايدى وڭدەيدى دەپ جوسپارلانعان ەدى. الايدا  كەيىنگى مالىمەتتەر بويىنشا 15،8 ملن توننا عانا وڭدەيتىن بولىپ بەكىتىلدى. قازاقستانداعى اۆتوموبيل سانى جىل سايىن ءوسىپ جاتقانىن ەسكەرسەك ( 2016 جىلى  6 ملن 200 مىڭ اۆتوكولىك    تىركەلگەن.- اۆتور)، مۇنداي كولەمدەگى بەنزين  ىشكى سۇرانىستى  قامتاماسىز ەتە المايدى. مۇنداي جاعدايدا ءسوزسىز رەسەيگە تاۋەلدىلىگىمىز ارتا تۇسەدى. ونىڭ  ۇستىنە، جاڭا كولىكتەر كوبەيسە  ەۋرو 4 جانە ەۋروپ-5 ستاندارتىنا ساي جانار-جاعارماي قاجەت بولادى. ال ءبىزدىڭ زاۋىتتار ەۋرو-2 ساناتىنداعى بەنزين  وندىرۋگە عانا مۇمكىندىگى بار،»- دەدى  ساراپشى.  

ايتا كەتەيىك،  قاڭتاردىڭ سوڭىندا  «قازمۇنايگاز  ونىمدەرى» ءجشس-ى  بەنزين  وكىلدەرى    145 تەڭگەگە دەيىن كوتەرىلەتىنى تۋرالى ايتقان  بولاتىن.  ساراپشىلار دا مۇنىمەن كەلىسەتىنىن جەتكىزدى. سەرگەي سميرنوۆتىڭ ايتۋىنشا، الداعى ەگىستىك ناۋقانىنا قارساڭىندا جانە  رەسەيدەگى اكسيزدىڭ وسۋىنە بايلانىستى  جانار-جاعارماي باعاسى تاعى دا  قىمباتتاۋى مۇمكىن.  ال عالىم قۇسايىنوۆتىڭ ەسەپتەۋىنشە،  رەسەيدەگى بەنزين باعاسى 185 تەڭگەنىڭ توڭىرەگىندە. ەلىمىزدىڭ مۇناي باعاسىن رەتتەۋشى جۇيە تۇرعىسىنان ەسەپتەگەندە، ياعني  رەسەيلىك سالىقتى (1ليتر قۇنىنىڭ 60 پايىزى)  الىپ تاستاپ، ترانسپورت شىعىندارىن قوسقاندا  1 ليتر بەنزين باعاسى  140-145 تەڭگەنىڭ شاماسىندا بولۋى ءتيىس.

جانيا  ابدىبەك

جۋرناليست