ياروسلاۆل اۋدانىنىڭ تۇرعىنى بۇل وقيعانى ءالى كۇنگە دەيىن بىلەدى: بىرنەشە كۇن بويى ولار كىشكەنتاي بالانىڭ جىلاعان داۋسىن ەستيدى. الدىمەن بۇعان ءمان بەرمەيدى، كەيىننەن جىلاعان داۋىستىڭ بوس ۇيدەن شىعىپ جاتقانىن تۇسىنگەندە الاڭداي باستايدى. ولار پوليسيا شاقىرتادى.

جابىق تۇرعان ەسىكتىڭ ارتىندا پوليسەيلەر نە كۇتىپ تۇرعانىن بىلمەدى: جەردە، قاراڭعى بولمەدە السىرەپ جاتقان كىشكەنتاي قىزدى كورەدى. ونىڭ ابدەن ءالى قۇرىپ، ارەڭ تىنىس الىپ جاتىر ەكەن.

باسقا بولمەلەر بوس ەكەن. ءۇيدىڭ تۇرعىندارى ءبارىن الىپ، كوشىپ كەتكەنگە ۇقسايدى. تەك ءوز بالاسىن عانا تاستاپ كەتىپتى.

قىزدى دەرەۋ اۋرۋحاناعا جەتكىزەدى. ونىڭ جامباسى سىنعانىن جانە بوس ۇيدە ءبىر اپتا بويى سىزداعان جەردە جاتقانىن بىلگەندە دارىگەرلەر تاڭعالادى. پوليسەيلەر ءبىر جاسقا ەندى تولعان ءسابيدىڭ اتى ليزا ۆەربيسكايا ەكەنىن انىقتايدى. ونىڭ اتا-اناسىن ىزدەۋگە بەرەدى. ولار قۇددى جوق بولىپ كەتكەندەي... ليزانى جەرگىلىكتى بالالار ۇيىنە اۋدارۋ ءۇشىن شەشىم شىعىپ قويعان بولاتىن.

بۇل ۋاقىتتا جەرگىلىكتى تۇرعىن يننا نيكا ەسىمدى ايەل بالاسى اۋىرىپ قالعانىنا بايلانىستى سول اۋرۋحانادا بولادى. كەزەكتى رەت اۋرۋحاناعا بارىپ جۇرگەن كۇندەردىڭ بىرىندە ول كورشى پالاتادان قىزدىڭ جىلاعان داۋسىن ەستىپ، ول قىزدى كورۋگە اسىعادى. وسىلايشا يننا كىشكەنتاي ليزامەن تانىس بولادى. ول مەدبيكەلەردەن سۇراستىرىپ، كىشكەنتاي ليزانىڭ اۋىر تاعدىرى جايىندا ءبارىن ءبىلىپ الادى. ايەل وعان ءجيى-جيى كەلىپ، ويىنشىقتار مەن جايالىقتارىن اكەلىپ تۇرادى.

يننا ەكى بالانى تاربيەلەپ وتىرعان انا جانە ليزامەن كەزدەسكەنگە دەيىن ول اسىراپ الۋ جايىندا ويلانباعان ەدى. ءبىراق، ءبىر كۇنى قىزدى بالالار ۇيىنە وتكىزىپ جىبەرگەنىن ەستىگەندە، ليزاسىز ءومىر سۇرە المايتىنىن تۇسىنەدى. بالالار ءۇيىنىڭ ادرەسىن دارىگەرلەردەن انىقتاپ، بالاعا قاراي اسىعادى.

بىرنەشە ايدان سوڭ، ليزانى قامقورلىعانا الۋعا تولىق قۇقىلى بولادى. قىز دا ءوزىنىڭ جاڭا ۇيىنە كەلەدى. ول ەكى جاسىندا تەك سۇيىق تاعامداردى عانا ىشە الاتىن ەدى، جۇرە المايتىن، قاتتى دىبىستاردان ۇرەيلەنەتىن. قىزعا كومەكتەسۋ ءۇشىن يننا ونى بي مەكتەبىنە بەرەدى.

ليزا كوپ وتپەي-اق قۇلپىرىپ سالا بەرەدى. مەكتەپكە باراتىن ۋاقىتى كەلگەندە وسىنداي سىمباتتى دا سۇلۋ قىزدىڭ اتا-اناسى بالاسىن ولىمگە قيىپ، بوس ۇيدە تاستاپ كەتكەنىنە، ناعىز سۇمدىقتى باسىنان كەشىرگەنىنە سەنە المايدى.

ليزا جارقىن دا ەرەكشە قىز، سوندىقتان قىز ءوز ورتاسىندا ۇنەمى ەرەكشەلەنىپ جۇرەتىن. كەيبىرەۋلەرى ونى مازاق ەتىپ، «سىعان قىزى»، «قارا» دەپ ونىڭ شامىنا تيەتىن. ءبىراق ليزا وعان كوڭىل بولمەيتىن. ويتكەنى قيىن شاقتا ونىڭ تىرەگى بولىپ ۇنەمى اسىراپ العان اناسى تۇراتىن. اناسى وعان: «ويتكەنى سەن ادەمىسىڭ، ەشكىمنىڭ سوزىنە ءمان بەرمە!» دەپ ايتىپ وتىراتىن. جانە بۇل تالاسسىز ەدى. ءوزىنىڭ 12 جاسىندا ول بىرنەشە سۇلۋلىق بايقاۋلارىن جەڭىپ الدى، ءسان كەشتەرىنە قاتىسىپ ءجۇردى جانە بالالار كيىمىنە جارناما جاسايدى.

كىشكەنتاي سۇلۋلىق حانشايىمى تانىمالدىلىققا يە بولادى، ونىڭ ەرەكشە تاعدىرى جايلى باسپا ءسوز بەتتەرىندە جاريالانا باستايدى. قىزدىڭ بيولوگيالىق اناسى كەنەتتەن پايدا بولىپ، بالاسى بار ەكەنى ەسىنە تۇسەدى. تەليەۆيدەنيەعا جۇگىنگەن ايەل قىزىن قايتارىپ بەرۋىن تالاپ ەتەدى. ارينە، بۇل جايىندا ءسوز قوزعالمايتىن ەدى. ءبىراق بالاسىن نە ءۇشىن تاستاپ كەتكەنىن تۇسىندىرە الماعان انانىڭ وسىلايشا كەنەتتەن پايدا بولعانى ليزا مەن ونىڭ وتباسىنىڭ تىنىشىن قاشىردى. يننا ءوز قىزى  ءۇشىن كۇرەسەتىنىن ايتادى. ونىڭ ۇستىنە، ليزا قاي جاقتا قالاتىنىن شەشە الاتىن جاستا ەدى!

قامقورلىق پەن ماحابباتتىڭ ءبىزدىڭ ءومىرىمىزدى قالاي وزگەرتەتىنى تاڭ قالدىرادى. وزگە ادامنىڭ ماحابباتى تاستاندى قىزدى ادەمى، وز-وزىنە سەنىمدى قىزعا اينالدىردى. ليزانىڭ ءوز ارماندارىنا جەتەتىنىنە ەش كۇمان جوق. مۇنداي قولداۋدان كەيىن ونىڭ قولىنان ءبارى كەلەدى!