مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ 2016 جىلعى جۇمىس قورىتىندىسىنا ارنالعان القا ماجىلىسىندە ۆەدومستۆو باسشىسى قايرات قوجامجاروۆ قازاقستانداعى بەلگىلى ادامداردىڭ ۇستالۋى تۋراسىندا ءوز پىكىرىن ءبىلدىردى.

«ءار ادام جەمقورلىققا قاتىستى وقيعانىڭ كۋاسى بولسا ول تۋرالى قاجەتتى قۇزىرلى ورگاندارعا حابار بەرۋى ءتيىس. جەمقورلىققا قارسى ۆەدومستۆا بارلىعىن تەكسەرۋگە قۇقىلى» دەيى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى قايرات قوجامجاروۆ.

ۇجىممەن جۇمىس ىستەيتىن ءار قازاقستاندىق زاڭعا قايشى، دۇرىس ەمەس ىستەرگە كۋا بولسا  ول تۋرالى باسشىنى نەمەسە قاجەتتى قۇزىرلى ورگانداردى حاباردار ەتۋ كەرەك. بۇل ءاربىر قازاقستاندىق ءۇشىن قالىپتى جاعداي بولۋى ءتيىس. ءاربىر ادام وزىنەن «مەن جەمقورلىقپەن كۇرەسۋ ءۇشىن نە ىستەدىم؟» دەپ سۇراۋى كەرەك. ءبىز كوپ ۋاقىت تومەنگى ساناتتاعى شەنەۋنىكتەرمەن اينالىستىق. ءقازىر جاعداي وزگەردى. شىن مانىسىندە تەكسەرۋگە بولمايتىن ادامدار جوق» دەدى قوجامجاروۆ.

بۇل ءتۇرلى دەڭگەيدەگى  بارلىق وتىرىستاردا جەمقورلىقپەن كۇرەس تۋرالى ايتىپ جۇرگەن  پرەزيدەنتتىڭ شەشىمى ەكەنىن دە جەتكىزدى.

«ەگەر بارلىعىمىز بىرىگىپ وسىنى قولعا الساق جەمقورلىقتى ءتۇپ تامىرىمەن جويۋعا قاۋقارىمىز جەتەدى. وعان دا از قالدى» دەدى اگەنتتىك باسشىسى.

قىلمىستىق پروسەسستىڭ اشىقتىعىنا توقتالا كەلە قوجامجاروۆ زەرتتەۋدىڭ باستاپقى كەزىندە قوعام كەيدە تۇسىنىكسىز كۇي كەشەتىنىن ايتتى. سەبەبى كەيدە قىلمىستىق تەكسەرۋگە بەلگىلى ادامدار ىلىگىپ جاتادى.

«ولار ءتۇرلى سالالانىڭ ادامدارى بولۋى مۇمكىن. ونىڭ ىشىندە شىعارماشىلىق سالالارى دا بار. ماسەلەن، جامانقۇلوۆ. حالىق ءارتىسى، ەل سۇيىكتىسى جامانقۇلوۆ ايىپتالۋشى رولىندە بولادى دەپ كىم ويلاعان. مەنىڭ ەسىمدە بەلگىلى جۋرناليست عابدۋلينگە قاتىستى قىلمىستىق پروسەسس باستالعاندا سوت اشىق تۇردە ءوتتى. بارلىعىن وزدەرىڭىز كوردىڭىزدەر. ول ءوز كىناسىن مويىندادى. بارلىق دالەلدەر ونىڭ ىشىندە قۇپيا تەرگەۋ ناتيجەسى دە قوعام نازارىنا ۇسىنىلدى. وندا ونىڭ تالاپتارى تۋرالى ايتىلعان اڭگىمەلەرى دە ايتىلدى: «ءسىز ماعان وسىنداي سومماعا تاپسىرما بەرەسىز، ويتپەگەن جاعدايدا ۇلكەن قيىندىققا تاپ بولاسىز». ول شىنىمەن دە سونداي ماقالالار جازدى» دەدى قوجامجاروۆ.

بەلگىلى اكتەر تۇڭعىشباي جامانقۇلوۆ 2016 جىلى 2 قاراشادا «فەنيكس» اتتى كوركەم فيلم تۇسىرىلىمىنە ارنالعان  69 ميللون تەڭگەنى جىمقىرۋى مۇمكىن دەگەن كۇدىكپەن ۇستالدى. اكتەر اقشانى العانىن مويىندادى جانە ىستەگەن ىسىنە وكىنىپ، كەلتىرگەن شىعىنىن وتەۋگە ۋادە بەردى. سونىمەن قاتار ول قىلمىستىق جاۋاپكەرشىلىكتەن بوساۋ ءۇشىن ءوتىنىش ءبىلدىردى. جامانقۇلوۆتىڭ، اتالمىش ءفيلمنىڭ اتقارۋشى پروديۋسەرى يۋدينامەن جانە «قازاقفيلم» اق ەكونوميكا مەن قارجى باسقارۋشى ديرەكتورى يسكاكوۆانىڭ كەلتىرگەن شىعىنى ەسەپتەلگەننەن كەيىن ءوتىنىش قارالاتىن بولادى.

Central Asia Monitor جانە Radiotochka.kz باس رەداكتورى بيگەلدى عابدۋلين دە 2016 جىلى ۇستالدى. تەرگەۋدىڭ مالىمەتىنە ساي، جۋرناليست قىزمەت دەڭگەيىن پايدالانىپ اقشا بوپسالاعان. عابدۋلين ق ر قك 194 باپتىڭ 4 بولىگى بويىنشا ايىپتالدى. ءجۋرناليستىڭ ادۆوكاتى امانجول مۋحامەدياروۆ ايىپتالۋشىنىڭ 20 ميلليون 625 تەڭگە كولەمىندە قارجىنى تولەپ، شىعىندى وتەگەنىن جانە ىستەگەن ىسىنە وكىنەتىنىن ايتقان. 2017 جىلدىڭ 24 قاڭتارىندا عابدۋلين سوت زالىنان بوساتىلدى.