سەنات دەپۋتاتى، كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى بويىنشا كوميتەتتىڭ ءتوراعاسى سەرىك اقىلباي ق ر كونستيتۋسياسىنىڭ 26-بابىنا ەنگىزىلگەلى جاتقان وزگەرىسكە قاتىستى ءوز ويىن جەتكىزدى. بۇل تۋرالى ق ر پارلامەنت سەناتىنىڭ باسپا ءسوز قىزمەتى حابارلاپ وتىر.
ەستەرىڭىزگە سالايىق، اتالعان زاڭ جوباسىندا 26-باپتىڭ باپتىڭ 1-تارماعى "اركىم زاڭدى تۇردە العان قانداي دا بولسىن مۇلكىن جەكە مەنشىگىندە ۇستاي الادى" دەگەن ماتىندە ۇسىنىلىپ وتىر.
سەرىك اقىلبايدىڭ ءتۇسىندىرۋى بويىنشا، "ازاماتتار" دەگەن ءسوز "اركىم" سوزىمەن الماستىرىلادى. "بۇل جەردە "ءارقايسىسى" دەپ قازاقستاننىڭ ازاماتتارى، شەتەلدىك ازاماتتار جانە ازاماتتىعى جوق ادامدار دەپ تۇسىنۋگە ءتيىسپىز. نەگە ءبىز ەلىمىزدىڭ رەزيدەنتى ەمەس ادامنىڭ نەمەسە ازاماتتىعى جوق ادامنىڭ مۇلكىنىڭ ساقتالۋىن قامتاماسىز ەتپەۋىمىز كەرەك؟ ماسەلەن، ونىڭ كولىگى، كيىمى، كومپيۋتەرى بار. مۇنىڭ ءبارى سول ادامنىڭ مۇلكى بولىپ سانالادى. ودان باسقا، شەتەلدىك ازاماتتار مۇندا ينۆەستيسيا اكەلەدى، ول دا مۇلىك. كەلگەن ينۆەستيسيا قورعالۋى كەرەك، ونى كونستيتۋسيامەن ساقتاندىرىلۋىن قامتاماسىز ەتىلۋى كەرەك"، - دەپ اتاپ ءوتتى ول.
"جەر تۋرالى ماسەلە - ول باسقا مارتەبەگە يە، مۇلدە باسقا ەرەجەمەن رەتتەلەدى"، - دەدى سەرىك اقىلباي. "ءبىز بۇل جەردە كونستيتۋسيانىڭ 6-بابىنا جۇگىنۋىمىز كەرەك، وندا جەر زاڭدا كورسەتىلگەن جاعدايلاردا عانا جەكە مەنشىككە بەرىلەتىنى جازىلعان. ياعني، مۇندا جەر تۋرالى جانە ازاماتتىق كودەكستەرگە سىلتەمە جاسالعان، ال ول زاڭداردا شەتەلدىكتەردىڭ اۋىل شارۋاشىلىعىنا ارنالعان جەرلەردى ساتىپ الۋى تۋرالى بىردە-بىر ءسوز جوق"، -دەدى سەناتور.
ونىڭ ايتۋىنشا، 26-باپتىڭ 1-تارماعىنا بايلانىستى جەر تۋرالى پىكىرتالاستىڭ نەگىزى جوق، ويتكەنى، جەر ماسەلەسى بۇل ەرەجەمەن قاراستىرىلمايدى. "شەتەلدىكتەردىڭ قازاقستاندا اۋىل شارۋاشىلىعىنا ارنالعان جەرلەرگە يە بولۋى مۇمكىن ەمەس. دۇرىس تۇسىندىرىلگەندە، ەشقانداي ولقىلىق بولماۋ كەرەك. ءبارى دە ءبىزدىڭ زاڭدارىمىزعا سايكەس بولىپ وتىر. مەملەكەت باسشىسى اۋىل شارۋاشىلىعى جەرلەرىنىڭ شەتەلدىكتەرگە ساتىلمايتىنى تۋرالى بۇرىن دا ايتقان بولاتىن. جەر، سۋ، تابيعي رەسۋرستار - ولار مۇلىك ەمەس. ولار ەرەكشە مارتەبەگە يە"، - دەدى جوعارعى پالاتانىڭ سالالىق كوميتەتىنىڭ باسشىسى.
