ديماش قۇدايبەرگەن قىتايدا ءوتىپ جاتقان «I am a singer» بايقاۋىنىڭ ءتورتىنشى كەزەڭىندە ءۇشىنشى ورىن يەلەندى، دەپ حابارلايدى «قازاقپارات» حاا-نىڭ قىتايداعى ءتىلشىسى.

«ءبىرىنشى ورىندى «سياو سزينتەن شيسزى» («Lion») توبى، ەكىنشى ورىندى - لين يليان، ءۇشىنشى - ديماش، ءتورتىنشى - دۋ ليشا، بەسىنشى - چجان سزە، التىنشى - تان سزين (ءۇشىنشى كەزەڭدە ءبىرىنشى ورىن العان بولاتىن) جانە جەتىنشى ورىندى چجاو لەي يەلەندى»، - دەپ حابارلايدى قىتايلىق ب ا ق.

«Weibo» الەۋمەتتىك جەلىسىندەگى ديماشتىڭ جۇمىس توبىنىڭ پاراقشاسىندا بايقاۋدىڭ 4-كەزەڭىندەگى سۋرەتتەر جاريالاندى. وندا ءارتىستىڭ ءستيليسى BG Fashion، ءۆيزاجيسى ءارى شاشتارازى DO Fashion ەكەندىگى جازىلعان.

ءانشىنىڭ كيىمى - Gucci 17SS، مويىنوراعىشى - Paul Smith 17SS، شلياپاسى - Albertus Swanepoel، اياق كيىمى - Gucci 17SS، جۇزىگى - H&M، بىلەزىگى جاپونيادان.   

ەسكە سالايىق، بۇعان دەيىن «سينحۋا» اگەنتتىگى ديماش قۇدايبەرگەن اتالمىش بايقاۋدىڭ 4-كەزەڭىندە جۇڭگو تىلىندەگى ءاندى اكسەنتسىز ايتىپ بەرگەنىن حابارلاعان بولاتىن. سونداي-اق ديماش ەۋروپالىق ۇلگىدەگى پيدجاك پەن جىبەك مويىنوراعىشىندا تارتىمدى كورىنگەنى جازىلعان ەدى. ونىڭ بويىنا كوز تارتارلىق كەلبەتتى قارا ءتۇستى باس كيىمى كەلتىرىپ تۇردى.

«I am a singer» بايقاۋىنىڭ ءتورتىنشى كەزەڭى 2 اقپان كۇنى جازىلعان ەدى. ول تەلەارنالاردان 11 اقپان كۇنى استانا ۋاقىتىمەن ساعات 20:30-دا كورسەتىلەدى. ديماشتىڭ بۇل كەزەڭ ءۇشىن تاڭداعان «كۇزگى مۇڭ» ءانىن 2013 جىلى «I am a singer» بايقاۋىندا قىتايلىق ءانشى شا باوليان ورىنداعان بولاتىن. 

كەشە قازاقستاندىق جاس تالانت يەسىنىڭ اناسى سۆەتلانا ايتبايەۆا ونىڭ اتالمىش بايقاۋ بارىسىندا قازاق تىلىندە دە ءان ايتاتىنىن جەتكىزگەن بولاتىن.

ايتا كەتەيىك، جۇڭگو تەلەارناسىنداعى ءان بايقاۋىنا قاتىسىپ جاتقان وتانداسىمىز ونىڭ ەكى كەزەڭىندە - ءبىرىنشى، ۇشىنشىسىندە 3-ورىن العان بولاتىن. ونىڭ قىتايلىق الەۋمەتتىك جەلىدەگى جازۋشىلار سانى ميلليوننان استى، وعان اقىندار ولەڭ-جىرلار ارناپ، قىزدار قازاقشا ۇيرەنىپ، حاتتار جازۋدا. جانكۇيەرلەر ءوز پاراقشالارىن ديماشتىڭ سۋرەتتەرىنە تولتىرۋدا. ءتىپتى، جۇڭگو دۇكەندەرىندە وتانداسىمىزدىڭ كەلبەتى بەينەلەنگەن بۇيىمدار، تۇرمىستىق زاتتار ساتىلا باستادى.

ديماشتىڭ ونەرىنە ءتانتى بولعان الەمگە تانىمال ءانشى لارا فابيان ونىمەن كەزدەسكىسى كەلەتىنىن ايتتى. ال كۇنى كەشە عانا بەلگىلى اكتەر، كينورەجيسسەر دجەكي چان د.قۇدايبەرگەنوۆتى كەزدەسۋگە شاقىرىپ، ارقا-جارقا اڭگىمەلەسكەن بولاتىن. ديماش قۇدايبەرگەن قازاق ۇلتتىق ونەر ۋنيۆەرسيتەتىنىڭ 3-كۋرس ستۋدەنتى. كەشە جوو-نىڭ رەكتورى ايمان مۇساقوجايەۆا جاس تالانت الداعى ۋاقىتتا «ەۆروۆيدەنيەگە»، ودان كەيىن «امەريكا داۋىسىنا» قاتىساتىندىعىن ايتتى.