قازاقستاننىڭ ەڭبەك سىڭىرگەن قايراتكەرى، ايتىس جاناشىرى، قازاقستان جازۋشىلار وداعىنىڭ باسقارما مۇشەسى، «انا ءتىلى» حالىقارالىق قوعامىنىڭ قۇرمەتتى مۇشەسى،  قازاقستان ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ ءتوراعاسى ءجۇرسىن ەرمان بۇگىن 66 جاسقا تولدى.

ءجۇرسىن مولداش ۇلى 1951 جىلى 12 اقپاندا قاراعاندى وبلىسىنىڭ بۇرىنعى قارساقپاي اۋدانىنداعى ستالين ۇجىمشارىندا تۋعان.

ەڭبەك جولىن 15 جاسىندا جەزدى اۋداندىق  «وكتيابر تۋى» گازەتىندە ادەبي قىزمەتكەر بولىپ باستاعان. ءال-فارابي اتىنداعى قازاق ۇۋ، الماتى جوعارعى پارتيا مەكتەبىن بىتىرگەن.

1978-1980 جىلدارى جەزقازعان وبلىستىق تەلەديدارىندا باس رەداكتور، 1983-1992 جىلدارى قازاق رەسپۋبليكالىق تەلەديدارىندا باس رەداكتور قىزمەتىن اتقاردى. «قازاق ادەبيەتى» گازەتىنىڭ، «جۇلدىز» جۋرنالىنىڭ پوەزيا بولىمدەرىن باسقاردى. 2006-2010 جىلدارى قازاق راديوسىنىڭ جانە «قازاقستان» ۇلتتىق تەلەارناسىنىڭ باس ديرەكتورى قىزمەتتەرىن اتقارعان. 2013-2016 جىلدارى رەسپۋبليكالىق كىتاپ مۇراجايىنىڭ ديرەكتورى بولىپ قىزمەت  ىستەدى.

جەزقازعان تەلەديدارىندا قىزمەت ىستەگەن جىلدارى (1972-1980) اقىندار ايتىسىنىڭ تەلەنۇسقاسىن جاساۋ ارقىلى اسىل مۇرانى جاڭعىرتۋ جولىن باستادى. 1984 جىلدىڭ ناۋرىز ايىنان بەرگى وتىز جىل بويى ايتىستىڭ رەسپۋبليكالىق تەلەارنالاردان ناسيحاتتالۋ  ىسىنە باس يە بولىپ كەلەدى.

قازاقستان جازۋشىلار وداعىنىڭ باسقارما مۇشەسى. «جانارتاۋ»، «ارايلى كۇن، ارمىسىڭ!»، «ۇلىتاۋعا باردىڭ با...»، «قۇدىرەتكە جۇگىنۋ»، «ەكى تىزگىن، ءبىر شىلبىر»، «قۇستىڭ كولەڭكەسى»، «ىرعاي»، «ارنادىم سىزگە»، «كوكتوبەدەگى كەزدەسۋلەر»، «الىستان جانە جاقىننان»، ت.ب. كىتاپتارى جارىق كورگەن.

م. ماقاتايەۆ اتىنداعى سىيلىقتىڭ ەكى مارتە يەگەرى. قازاقستاننىڭ ەڭبەك سىڭىرگەن قايراتكەرى. «قۇرمەت» وردەنىمەن ماراپاتتالعان.