نۇربوسىن اسانبەردييەۆ ەسىمدى ازامات Facebook پاراقشاسىنا ءوزىنىڭ جانە «7 كونتينەنت» بيزنەس ورتالىعىنداعى كەڭسەنى ساتىپ العانداردىڭ ماسەلەسىمەن ءبولىستى.

32 جاستاعى نۇربوسىن اسانبەردييەۆ 2015 جىلدان باستاپ كاسىپكەرلىكپەن اينالىسا باستاعان. ول فيتنەس-كلۋب اشۋ ءۇشىن «7 كونتينەنت» بيزنەس ورتالىعىنان عيمارات ساتىپ الادى. 4 اي جوندەۋ جۇمىستارىن جۇرگىزىپ، فيتنەس-كلۋبقا قاجەتتى قۇرالداردى ساتىپ العانىن جازادى.

قازىرگى تاڭدا فيتنەس-كلۋبتا 20 ادام جۇمىس ىستەيدى جانە 1000-نان اسا ادام تۇراقتى كەلىپ، جاتتىعىپ تۇرادى ەكەن.

«7 كونتينەنت» بيزنەس ورتالىعىنىڭ قۇرىلىسى 2006 جىلى باستالعان. 2008 جىلى قۇرىلىس نىسانىنىڭ مەنشىك يەسى «Shyryn Ltd» كومپانياسى بولدى. سول جىلى، ياعني 2008 جىلى نۇربانك «Shyryn Ltd» كومپانياسىنا قارىزعا اقشا بەرگەن. ال 2011 جىلى بولاشاقتا بولاتىن كەپىلدەمەنى قويۋ تۋرالى كەلىسىم شارتقا قول قويعان. نۇربوسىن اسانبەردييەۆ اتالمىش كەلىسىم شارتتىڭ تەك 3 جىلدان كەيىن عانا جاسالعانىنا تاڭ قالاتىنىن ايتادى. بەلگىلى بولعانداي جىلجىمايتىن مۇلىككە (عيمارات پايدالانۋعا بەرىلگەننەن كەيىن) كەپىلدەمەگە قاتىستى كەلىسىم شارت مۇلدە جاسالماعان بولىپ شىقتى. 2013 جىلى «7كونتينەنت» بيزنەس ورتالىعى "Shyryn Ltd" كومپانياسىنا قولدانۋعا بەرىلدى. اتالمىش كومپانيا عيماراتتارىن ساتا باستادى.

باستاپقى كەزدە جىلجىمايتىن مۇلىككە كەپىلدەمە قويماعانى جانە بانكتىڭ مۇنداي ءىرى قارىز العان كومپانيانى قالاي باقىلاماعانى تۇسىنىكسىز. ەندى ءقازىر سوت بولىپ «Shyryn Ltd» كومپانياسىنا تيەسىلى «7 كونتينەنت» عيماراتىنا ارەست قويىلدى.

2015 جىلدىڭ 15 قاراشاسىندا سوت «Shyryn Ltd» كومپانياسىنا تيەسىلى بارلىق جىلجىمايتىن مۇلىكتى الۋ تۋرالى شەشىم قابىلداعان.  ونىڭ ىشىندە نۇربوسىن اسانبەردييەۆتىڭ دە ساتىپ العان عيماراتى بار. ونىڭ مۇنداي ماسەلەلەرى بار ەكەنىن كاسىپكەر بىلمەگەنىن جانە 2016 جىلدىڭ ناۋرىز ايىندا مۇلىگىنە ارەست قويىلعانىن جازدى.

نۇربوسىن اسانبەردييەۆ، بانك كومپانياعا كەپىلدەمەسىز قارىز بەرىپ، ودان كەيىن عيمارات سالىنىپ، پايدالانۋعا بەرىلىپ جانە ونداعى تۇرعىن ۇيلەر مەن كوممەرسيالىق جىلجىمايتىن مۇلىكتەردى ساتىپ، ودان كەيىن بانك كومپانيانى سوتقا بەرىپ، زاڭدى يەلەردىڭ پاتەرلەرىن جانە كوممەرسيالىق جىلجىمايتىن مۇلىكتەرىن تارتىپ الۋعا سوت شەشىم شىعاراتىنىنا ناليتىنىن جەتكىزدى.

«جىلجىمايتىن مۇلىكتى ساتىپ،ولاردان اقشا الىپ، ودان كەيىن قايتا سول مۇلىكتەرىن تارتىپ الادى. بۇل قالاي بولدى؟» دەيدى نۇربوسىن اسانبەردييەۆ.

كاسىپكەر عالامتور، تەلەديدار، گازەت پەن راديودان ورتا جانە كىشى كاسىپكەرلىكتى دامىتۋ ءۇشىن ءتۇرلى باعدارلامالار قابىلدانىپ، قىرۋار قارجى ءبولىنىپ جاتقانىن ءجيى ەستىپ، وقيتىنىن، الايدا شىنايى ومىردە كەلەڭسىز ماسەلەلەرمەن بەتپە-بەت كەلەتىنىن ايتادى.

«ايتىڭدارشى مەن سوندا باسقا قازاقستاندا تۇرىپ جاتىرمىن با؟» دەيدى نۇربوسىن اسانبەردييەۆ.  

ول  بۇعان دەيىن باسىنداعى ماسەلەنى ايتىپ ۆيدەو جازىپ، جاريالاعان.