قىتايدا «Singer 2017» ءان دوداسىندا ونەر كورسەتىپ جاتقان قازاقستاندىق ءانشى ديماش قۇدايبەرگەن بايقاۋدىڭ جەتىنشى كەزەڭىندە ءۇشىنشى ورىن الدى.

جوبانىڭ جەتىنشى كەزەڭىنىڭ ءتۇسىرىلىم جۇمىستارى بۇگىن تاڭعا جاقىن اياقتالىپ، انشىلەر ءوز ونەردەرىن كورسەتكەن. ناتيجەسىندە، قازاقتىڭ «دايديداۋ» انىمەن كورەرمەن جۇرەگىنەن ورىن العان وتانداسىمىز ۇزدىك ۇشتىكتەن كورىندى.  گونكونگ قالاسىنىڭ تۋماسى Sandy باس جۇلدەنى، جوباعا جاڭا قوسىلعان لي سزيان ەكىنشى ورىندى يەلەندى. ايتا كەتەرلىگى، جوبانىڭ ون كەزەڭنەن تۇراتىن ىرىكتەۋ باسەكەسىندە العاشقى جەتى انشىدەن تەك تورتەۋى قالدى. ديماش جالپى ەسەپتە ءۇشىنشى ورىننان تۇسكەن جوق. ەسكە سالا كەتەيىك، «Singer 2017» بايقاۋىنىڭ التىنشى كەزەڭى ەفيردەن 25 اقپان كۇنى كورسەتىلەتىن بولادى. 

ەستەرىڭىزگە سالساق، ديماش 1، 2 جانە 6 كەزەڭدە ءبىرىنشى ورىن، 3، 4 كەزەڭدە ءۇشىنشى ورىن، 5 كەزەڭدە 5 ورىن العان بولاتىن.

ايتا كەتسەك، ديماش قۇدايبەرگەنوۆ ۆيتەبسكتە وتكەن "سلاۆيان بازارى-2015" حالىقارالىق بايقاۋىندا جەڭىمپاز اتانعان ەدى. ول، سونىمەن قاتار، "شىعىس بازارى" جانە "مەيكين ازيا" بايقاۋلارىنىڭ گران-پري يەگەرى.

ول قاتىسىپ جاتقان بايقاۋ اياسىندا قىتايدا اسا تانىمال بولدى دەۋگە بولادى. الەمگە ايگىلى اكتەر دجەكي چاننىڭ ءوزى ديماشپەن ارنايى تانىسقان بولاتىن. سونداي-اق ديماش پاندالارمەن كەزدەسكەن رەسمي ءبىرىنشى ەلشى اتاندى.