مەنىڭ كەبىمدى كيىپ، حالىقتىڭ الدىنا شىعۋعا باتىلى جەتپەيتىندەر كوپ. سولار قيىندىققا بەرىلمەي، كۇرەسسە ەكەن دەيمىن. 

14 جاسىندا اياعىنان ايرىلىپ، ارباعا تاڭىلعان استانالىق ازامات ومار تۇراشيەۆ باسىنا تۇسكەن اۋىر جاعدايعا مويىماي، قيىن ساتتە قۇرداستارىنىڭ سىرت اينالعانىنا قاراماي، بار قيىندىقتى جەڭىپ شىقتى. 21 جاستاعى ومار 1 جىلعا تاياۋ ۋاقىت «جىگەر» كلۋبىندا اربادا بيلەۋ سپورتىمەن اينالىسىپ كەلەدى. وسىنداي قىسقا ارالىقتا جاتتىقتىرۋشىسى ءاليا مايدانوۆامەن بىرگە بىرنەشە رەسپۋبليكالىق جارىستىڭ جەڭىمپازى اتانىپ تا ۇلگەردى. تاعدىردىڭ تاۋقىمەتىن جاستايىنان تارتقان جىگەرلى دە قايسار مىنەزدى جىگىت ءومىرىنىڭ قيىن جانە باقىتتى شاقتارى جايلى abctv.kz تىلشىسىنە بەرگەن سۇحباتىندا اڭگىمەلەپ بەردى.

– ومار مىرزا، 7 جىل بۇرىن ومىرىمدە ۇلكەن وزگەرىس بولدى دەدىڭىز. ول قانداي وزگەرىس؟

– ول كەزدە مەن ون ءتورت جاستامىن. ادەتتەگىدەي دوستارىممەن فۋتبول ويناپ ءجۇر ەدىم. باسقا جەردە ورىن جوقتاي، تەمىر جولدىڭ بويىندا وينايتىنبىز. دوستارىم – 12-14 جاستىڭ اراسىنداعى بالالار. ابايسىزدا، مەن تەمىر جول رەلسىنىڭ ۇستىنە قۇلاپ قالدىم. ورنىمنان تۇرايىن دەسەم، كيىمىم بىردەڭەگە ءىلىنىپ، تۇرا المادىم. جاقىنداپ قالعان جۇك تاسىمالدايتىن پويىز دا جىلدامدىعىن تەجەي الماعان كۇيى ءوتىپ كەتتى، ال مەن سول جەردە ەسىمنەن تانىپ قالدىم. بىرنەشە كۇننەن كەيىن كوزىمدى اشسام، اۋرۋحانادا جاتىر ەكەنمىن. انام قاسىمدا وتىر. دارىگەرلەر كۇردەلى وتا جاساپ، ۇزاق ۋاقىت جاتتىم. سونىمەن اۋرۋحانادان اربامەن شىقتىم. ءومىرىمنىڭ ءمانى قاشىپ، تۇلا بويىمدى قورقىنىش بيلەپ، وزەگىم وكسىككە تولدى. نەبارى 14 جاستامىن. ەندى عانا بالا مۇرتىم تەبىندەپ، جانىمداعى دوستارىممەن اقىل توقتاتىپ، قىزىقتى ۋاقىت وتكىزەتىن كەزىم ەدى.

– ودان ءارى نە بولدى؟

– اتتەڭ، بارلىعى مەن ويلاعانداي بولمادى. ساباققا بىرگە بارعان سىنىپتاستارىم، بىرگە دوپ تەپكەن قۇرداستارىم، كىشىگىرىم سىرىمەن بولىسەتىن ادال دوستارىم بىرتىندەپ جىلىستاي بەردى. ءبارى سىرت اينالدى. بەتىمە باسىپ ايتپاسا دا، مەنىمەن ارالاسقىسى كەلمەيتىنىن كەزدەيسوق كەزدەسىپ قالعاندا اڭعارتاتىن. الدىمنان شىقسا دا، قاسىمدا تۇرسا دا، مەنىمەن امانداسپاي قور قىلدى. جاندى جەرىمە ينە شانشىپ، كوڭىلىمە قاياۋ كەلتىردى. كۇندەلىكتى شىعىستان كوتەرىلەتىن كۇن دە شىقپاي قويعان سياقتى. شىقسا دا، ماعان كورىنبەي باتاتىنداي قاراڭعى تۇنەكتە ءوتىپ جاتتى كۇندەرىم. قايعى مەن ۋايىمىمدى بولىسەتىن، سىرلاساتىن ادام قالمادى... تەك اتا-انام، اپكەم مەنى جالعىزسىراتپادى. قۇددى وزدەرى دە مەنىڭ قالپىمدا جۇرگەندەي. راسىندا، اتا-اناڭ مەن باۋىرىڭنان ارتىق ەشكىم جانىڭدى تۇسىنبەيدى ەكەن. سول جاقىن ادامدارىمنىڭ ىستىق ماحابباتى مەن قامقورلىعى مەنى تۇڭعيىقتان الىپ شىقتى. ال مەنەن سىرت اينالعاندارعا قولىمدى ءبىر-اق سىلتەدىم. ولارعا جاقسىلىق تىلەپ، ءوز ءومىرىمدى جاقسارتۋدى قولعا الدىم. اللاعا شۇكىر!

– سوندا نە ىستەدىڭىز؟ وزگەرۋىڭىزگە نە تۇرتكى بولدى؟

– العاشىندا وڭاي بولعان جوق. الايدا اللانىڭ امىرىنە مويىنسۇنۋ كەرەك. باستىسى، جانىمنىڭ امان قالعانىنا تاۋبە ەتتىم. وسى وي مەنى بولاشاققا جەتەلەدى. مەن ۇيدە وتىرماسىن دەپ انام قانشاما ۇيىرمەگە اپاردى. بالام ءتورت قابىرعانىڭ سۇلباسىن ەمەس، تورتكۇل دۇنيەنىڭ قىزىعىن كورسىن دەپ انا جۇرەك بارىن سالدى. ول جەتەكتەپ ديزاينەر، كومپيۋتەر مامانى ت.ب. جۇمىسقا ورنالاستىرۋدى كوزدەدى. مەنىڭ بوس وتىرماۋىم ءۇشىن قولدان كەلگەنىن جاسادى. ءبىراق مەن جانىما جاقىن ماماندىقتى تابا المادىم. ۇزاق ءجۇردىم. ءار نارسەنىڭ باسىن شالىپ، سانام سان ساققا ساندالدى. ءبىر كۇنى داستان ەسىمدى تانىس اعام «اربامەن بيلەۋگە قالاي قارايسىڭ؟» دەگەن ۇسىنىس ايتتى. مەن ەر ادامعا بيلەگەن جاراسپايدى، ىڭعايسىز دەپ ويلادىم. دەگەنمەن بارىپ كورەيىن دەپ كەلىستىم. داستان اربامەن بيدەن الەمنىڭ بىرنەشە ەلىندە پاراليمپيادالىق جارىسقا قاتىسقان. سۋرەتتەرىن كورسەتىپ ەدى، مەن قاتتى قىزىقتىم. ويىمدى تۇبەگەيلى وزگەرتتىم. ءسويتىپ بي زالىنان ءبىر-اق شىقتىم. اربادا بيلەگەن ماعان ۇناي باستادى. مۋزىكانىڭ ىرعاعىمەن قوسىلا كۇلىمدەي باستادىم. كورەرمەننىڭ قوشەمەتى «تاعى بيلەي ءتۇس» دەپ تۇرعانداي. وسى كوڭىل-كۇيمەن ەلىمىزدىڭ تۇكپىر-تۇكپىرىنە جارىسقا باردىم.

– قانداي جەتىستىكتەرىڭىز بار؟

 – العاش رەت ءوز قالامنان شىعىپ، باسقا قالالارعا باردىم. بۇرىن ۇيدەن شىعۋ قيىن بولسا، ەندى قالالاردى ارالاپ جۇرگەنىمە قاتتى قۋاندىم. الماتى، قاراعاندى، قوستاناي، شىمكەنت، قىزىلوردا تاعى باسقا قالالاردا بي بايقاۋىنا قاتىسىپ، باسىندا ماداقتاما قاعازدارىن، كەيىن ءۇشىنشى ورىن، سوسىن ءبىرىنشى ورىن الدىم. ءار جارىستان كەيىن وزىمە دەگەن سەنىمدىلىگىم ارتا ءتۇستى. قانشاما اداممەن تانىستىم. تەلەديدارداعى باعدارلامالارعا قاتىستىم. ءومىرىم تۇبەگەيلى وزگەردى. جاقىندا قاراعاندىدا وتەتىن رەسپۋبليكالىق جارىسقا دايارلىقتى باستاپ كەتتىم. ەندى «ەشقايدا بارمايمىن، وتىرا بەرەيىنشى، دوستارىم مەنەن باس تارتتى» دەپ قىنجىلاتىن مەن ەمەس. ۇنەمى كوتەرىڭكى كوڭىلمەن كەزدەسۋلەرگە بارىپ ءجۇرمىن.

 – سوندا اربامەن بيلەپ باستاعاننان كەيىن وزىڭىزگە دەگەن سەنىمدىلىك پايدا بولدى ما؟

 – ءيا، مۇمكىن ەكى اياقتا تىك تۇرسام، جۇرە السام، بۇلاي بيلەي الماس پا ەدىم؟! اربامەن بيلەۋ قولىمنان كەلەدى ەكەن جانە بۇل مەنىڭ تۇيىقتالىپ قالعان مىنەزىمدى اشتى. رۋحاني جان دۇنيەمدى قاتتى وزگەرتتى. كەز كەلگەن جاعدايدا وز-وزىمە سەنىمدى بولىپ، باتىل قيمىلدايتىن بولدىم. اربامەن بيلەۋ ومىرىمە ءمان بەردى.

– كىم جاتتىقتىرادى؟

– حورەوگراف ءاليا مايدانوۆا جاتتىقتىرادى، بي ۇيرەتەدى. ەكەۋمىز قويىلىم قويامىز. بۇگىنگە دەيىن بىرنەشە بي مەڭگەردىم. قيىن ەمەس. كۇندەلىكتى اربامەن جۇرگەن بولەك، ال ونىمەن بيلەۋ – ءبىر عانيبەت. اربا – روليك سەكىلدى، ياعني كونكي. مانەرلەپ سىرعاناۋدا كونكيمەن جۇگىرسە، ال مەن اربامەن بيلەيمىن. ەش ايىرماشىلىعى جوق. ەكەۋى دە – سپورت.

– ومار، العان بەتىڭىزدەن قايتپاي، بيىك بەلەستەردى باعىندىرۋىڭىزعا تىلەكتەسپىز. سىزگە سەنەمىز. ەكەۋمىزدىڭ سۇحباتىمىز ۇيدە اربادا وتىرعان جاس بۋىننىڭ دا سەنىمىن، ءۇمىت وتىن وياتار دەپ ويلايمىن.

– راقمەت! ءيا، مەن سياقتى جاعدايعا دۋشار بولىپ، حالىقتىڭ الدىنا شىعۋعا باتىلى جەتپەي وتىرعاندار كوپ. سولار وز-وزدەرىن قولعا الىپ، ۇمتىلىس جاساسا ەكەن دەيمىن. ءبىز دە قوعامنىڭ ءبىر بولشەگىمىز، ءبىز دە ەلىمىزگە قىزمەت ەتۋىمىز كەرەك.
 

مۇمكىن ول بولاشاقتا حالىقارالىق پاراليمپيادالىق جارىستارعا بارىپ، ەلىمىزدىڭ تۋىن كوككە جەلبىرەتەتىن چەمپيونىمىز شىعار. ونىڭ ماقساتى دا – سول، پاراليمپيادالىق ءبيدى دامىتۋ. ۇيدە وتىرساڭ اتا-اناڭ مەن باۋىرلارىڭ ۋايىمدايدى. جاقىن ادامدارعا سەنىڭ كۇيزەلىستە وتىرعانىڭدى كورۋ قيىن، ولارعا اۋىر باتادى. ومار سونى ءتۇسىنىپ، ءوز ءومىرىن قولعا العان، جارقىن بولاشاققا سەنىممەن قارايدى.

ءبىز دە وماردىڭ الداعى جارىستاردا جەڭىسكە جەتۋىنە تىلەكتەسپىز. پاراليمپيادانىڭ جەڭىمپازدارى اراسىنان كورىنگەنىن قالايمىز. اربادا وتىرعان ءاربىر بالا وماردىڭ ءبيىن كورىپ، اناسىنا «مەنى دە بيگە اپارشى» دەگەنىن قالايمىز. كىم بىلەدى؟ «جاقسى ءسوز – جارىم ىرىس» دەگەندەي، ءقازىر مۇنى بولاشاق پاراليمپيادا چەمپيوندارى وقىپ وتىرعان شىعار.