بۇگىن تاڭەرتەڭ ۆەنادان ءىسساپاردان ورالعان ومۋربەك تەكەبايەۆتى بىشكەك اۋەجايىندا ۇستاپ، تەرگەۋگە اكەتكەن. كەيىن بيلىك ونىڭ 48 ساعاتقا ۇستالعانى تۋرالى حابارلادى دەپ جازدى ازاتتىق.

قىرعىزستاننىڭ وڭتۇستىگىندەگى وش قالاسىندا بۇگىن ەل استاناسىندا ۇستالعان «اتا مەكەن» وپپوزيسيالىق پارتياسىنىڭ پارلامەنتتىك فراكسياسى ليدەرى ومۋربەك تەكەبايەۆتى جاقتايتىن جيىرماعا جۋىق ادام مەملەكەتتىك ۇلتتىق قاۋىپسىزدىك كوميتەتى عيماراتى الدىنا جينالىپ، نارازىلىق اكسياسىن وتكىزگەن. بۇدان سوڭ جيىنعا قاتىسۋشىلار باسپا ءسوز ءماسليحاتىن وتكىزىپ، بيلىكتەن «ساياسي قۋعىندى» توقتاتۋدى تالاپ ەتكەن. ەگەر تالاپتارى ورىندالماسا نارازىلىق اكسيالارى جالعاساتىنى تۋرالى مالىمدەگەن.

ءقازىر بىشكەكتەگى مەملەكەتتىك ۇلتتىق قاۋىپسىزدىك كوميتەتى عيماراتى الدىندا تەكەبايەۆتى قولداۋشىلاردىڭ نارازىلىق اكسياسى جالعاسىپ جاتىر. وپپوزيسيالىق دەپۋتاتتى قولداۋ شەرۋى جالالاباد وبلىسى بازارقورعان اۋدانىندا دا وتكەن. وعان قاتىسۋشىلار اكسيانى ەرتەڭ جالعاستىراتىندارىن ايتىپ تاراعان.

سونىمەن بىرگە تەكەبايەۆتى جاقتايتىن جۇزگە جۋىق ادام تالاستان بىشكەككە جولعا شىققانى تۋرالى اقپارات تارادى.

بۇدان ءبىر كۇن بۇرىن بيلىك ومۋربەك تەكەبايەۆقا قاتىستى قىلمىستىق كودەكستىڭ «الاياقتىق» جانە «جەمقورلىق» باپتارى بويىنشا ءىس قوزعاعانى بەلگىلى بولعان. تەكەبايەۆتىڭ ءوزى اۆستريادا ءجۇرىپ ازاتتىقتىڭ سۇراعىنا بەرگەن جاۋابىندا ول قىلمىستىق ءىس تۋرالى بەيحابار ەكەنىن ايتقان ەدى.

 سونداي-اق، قىرعىزستاندا 2010 جىلعى شىلدەدەن 2011 جىلعى جەلتوقسانعا دەيىن ۋاقىتشا پرەزيدەنت مىندەتىن اتقارعان ساياساتكەر ءارى ديپلومات روزا وتۋنبايەۆا بىشكەكتە بۇگىن ۇستالعان پارلامەنتتەگى «اتا مەكەن» وپپوزيسيالىق پارتياسى فراكسياسىنىڭ ليدەرى ومۋربەك تەكەبايەۆتى قولداۋ اكسياسىندا ءسوز سويلەگەن. ول ەلدەگى ساياسي كۇشتەر قىرعىزستاننىڭ قانداي جولمەن جىلجيتىنىن تالقىلاپ، كەڭەسۋى قاجەت دەپ مالىمدەگەن. «ءوزارا ايىپتاۋدى دوعارىپ، كەيىنگى بالالارىمىزعا نە قالدىراتىنىمىزدى ويلانۋىمىز كەرەك. ەلدەگى بارلىق ساياسي كۇشتەردى كەڭەسۋلەر باستاۋعا شاقىرامىن» دەگەن روزا وتۋنبايەۆا.

كەيىننەن بەلگىلى بولعانداي اقپاننىڭ 26-سىنا قاراعان ءتۇنى ميليسيانىڭ ارنايى بولىمشەسىنىڭ قىزمەتكەرلەرى 10 ادامدى ۇستاعان. ولار بۇگىن تاڭعى ساعات ءۇش كەزىندە ۆەنادان ورالعان «اتا مەكەن» پارتياسى پارلامەنتتىك فراكسياسى جەتەكشىسى ومۋربەك تەكەبايەۆتى بىشكەك حالىقارالىق اۋەجايىندا ۇستاعان بيلىكتىڭ ىسىنە نارازىلىق بىلدىرمەك بولعان.

ايتا كەتسەك، ومۋربەك تەكەبايەۆ 2005 جىلى سول كەزدەگى قىرعىزستان پرەزيدەنتى اسقار اقايەۆ پەن 2010 جىلى قۇرمانبەك باكييەۆ قىزمەتتەرىنەن كەتكەن كەزدە بەلسەندى ارەكەت ەتكەن قىرعىز ساياساتكەرلەرىنىڭ ءبىرى بولدى. 2010 جىلى شىلدەدە قىرعىزستان ۋاقىتشا ۇكىمەتى ءتوراعاسىنىڭ ورىنباسارلىعىنا تاعايىندالىپ، كونستيتۋسيالىق رەفورمالاردى جۇرگىزۋگە جاۋاپتى كونستيتۋسيالىق كەڭەس ءتوراعاسى قىزمەتىن اتقارعان. كەيىننەن قىرعىزستاننىڭ سوت جۇيەسىن ءارى قاراي رەفورمالاۋ بويىنشا كوميسسيانى باسقارعان. 2015 جىلى «اتامەكەن» پارتياسىنىڭ تىزىمىمەن پارلامەنت دەپۋتاتى بولىپ سايلانعان.