وسكەمەندە اناسى بالاسىن ورتەنىپ جاتقان ۇيدە ۇمىتىپ كەتكەن. قۇتقارۋشىلاردىڭ ۇيدە بىرەۋ بار ما دەگەن سۇراعىنا ايەل ادام "جوق" دەپ جاۋاپ بەرگەن. قۇتقارۋشىلار ۇيدە ءتىنتۋ جۇرگىزۋ بارىسىندا كىشكەنتاي بالانىڭ ءمايىتىن الىپ شىققان، - دەپ حابارلايدى Tengrinews.kz جاڭالىقتارى.
 

شقو ءىىد مالىمەتىنشە، وقيعا بولعان كەزدە ءۇي يەسى قۇربىلارىمەن بىرگە سپيرتتىك ىشىمدىك ءىشىپ وتىرعان. ۇيدە تاعى كامەلەت جاسىنا تولماعان ءۇش بالا بولعان. 14 جاستاعى ءجاسوسپىرىم تۋعاندارىن وياتىپ، ءىنىسىن سىرتقا الىپ شىققان. ۇيدەن بارلىعى شىعىپ ۇلگەرگەن. كورشىلەر مەن شاقىرىلعان پوليسەيلەر ۇيدە تاعى بىرەۋلەردىڭ بار-جوعىن سۇراعان. وسى كەزدە ايەل ادام ۇيدە ەشكىم جوعىن ايتقان. مۇنداي جاۋاپتى ول قۇتقارۋشىلارعا دا بەرگەن.  "زال بولمەسى ءسوندىرىلىپ جاتقان كەزدە ءورت سوندىرۋشىلەر بالانىڭ ءمايىتىن تاپتى، ونىڭ جاسى شامامەن 2،5-تە بولعان. ونىڭ اناسى پوليسياعا تاپسىرىلدى. ءورت اۋماعى 120 شارشى مەتر بولدى. ءورت كورشى ۇيگە ءتۇسىپ، كىرەبەرىسى مەن شاتىرى ورتەنگەن. ءورتتىڭ ارى قاراي تاراۋى دەر كەزىندە توقتاتىلدى"، - دەدى شقو ءىىد-نىڭ باسپا ءسوز قىزمەتىنىڭ وكىلدەرى. 

نەگىزگى نۇسقا بويىنشا، ءورت قاۋىپسىزدىگى ەرەجەلەرىن ساقتاماعاندىقتان وسىنداي قايعىلى وقيعا بولعان. قۇقىق قورعاۋ ورگاندارىندا پوليسەيلەر قايتىس بولعان بالانىڭ اناسىنان جاۋاپ الىپ جاتىر.